ନୟାଗଡ଼, (ବାଘୁଆବାର୍ତ୍ତା): ଜିଲ୍ଲା ମୁଖ୍ୟ ବିଚାର ବିଭାଗୀୟ ଜଜ୍ ତଥା ସହକାରୀ ଦୌରା ଜଜ୍ ଶ୍ରୀମତୀ ସ୍ମୃତିସ୍ନିଗ୍ଧା ଦାସ ଏକ କାର ଡକାୟତି ଘଟଣାରେ ୩ ଜଣ ଅଭିଯୁକ୍ତଙ୍କୁ ୬ ବର୍ଷ ଜେଲ ଦଣ୍ଡାଦେଶ ଶୁଣାଇଛନ୍ତି । ଏଥି ସହିତ ଅନାଦେୟ ୧ ହଜାର ଟଙ୍କା ଜୋରିମନା କରାଯାଇଛି । ସୁଚନାନୁସାରେ ୨୦୨୨ ମସିହା ନଭେମ୍ବର ମାସ ୧୪ ତାରିଖରେ ସିପାହି ଅସୁରଢିପା ଗ୍ରାମର ଦେବାଶିଷ ମହାପାତ୍ରଙ୍କ ଠାରୁ ତାଙ୍କ ସାଙ୍ଗ ସୁଧୀର ଗୌଡ଼ ହୁଣ୍ଡାଇ ୟନ କାର ତାଙ୍କ ମାଙ୍କ ଚିକିତ୍ସା ନିମନ୍ତେ ଭୁବନେଶ୍ୱର ମାଗି କରି ନେଇଯାଇଥିଲେ । ଗାଡି ନଂ – ଓଡି୦୭ଭି୯୩୯୧ ଗାଡିରେ ସୁଧୀର ଗୌଡ଼ ଭୁବନେଶ୍ୱରରୁ ଫେରି ତାଙ୍କ ଗ୍ରାମ ଛଅମାଣ ଶଙ୍ଖ ଠାରେ ରାତି ଗୋଟାଏ ବେଳେ ଗାଡି ଭିତରେ ଖାଦ୍ୟ ଖାଉଥିଲେ । ଏହି ସମୟରେ ୬ ଜଣ ଦୁର୍ବୁତ ମଟର ସାଇକେଲରେ ଆସି ଖଣ୍ଡା, ଭୁଜାଲି ଦେଖାଇ ଗାଡିଟିକୁ ଚୋରି କରି ନେଇଥିଲେ । ଗାଡିର ମାଲିକ ଦେବାଶିଷ ମହାପାତ୍ର ନୟାଗଡ଼ ସଦର ଥାନାରେ ଏକ ଲିଖିତ ଅଭିଯୋଗ କରିଥିଲେ । ପୋଲିସର ତଦନ୍ତ ପରେ ୩ ଜଣଙ୍କୁ ଗିରଫ କରାଯାଇ କୋର୍ଟ ଫରୁୱାର୍ଡ କରାଯାଇଥିଲା । ତଦନ୍ତକାରୀ ଦଳ ଉକ୍ତ ଗାଡିକୁ ଭୁବନେଶ୍ୱରରୁ ଉଦ୍ଧାର କରିଥିଲେ । ଆଜି ଏହି ମାମଲାର ରାୟ ପ୍ରକାଶ ପାଇଛି । ରଣପୁର ଥାନା ଅନ୍ତର୍ଗତ ସାନଗଡ଼ ଗ୍ରାମର ନାରଣ ନାୟକଙ୍କ ପୁଅ ସିଲୁ ନାୟକ, ଫତେଗଡ଼ ଥାନା ଚକ୍ରଧର ପ୍ରସାଦ ଗ୍ରାମର ଯୋଗୀ ପରିଡ଼ାଙ୍କ ପୁଅ ଦିଲ୍ଲୀପ ପରିଡ଼ା ଓ ଶରଣକୁଳ ଥାନା ଅନ୍ତର୍ଗତ କୁଷାପାଣ୍ଡେରୀ ଗ୍ରାମର ସନ୍ୟାସୀ ପ୍ରଧାନଙ୍କ ପୁଅ ମାନସ ପ୍ରଧାନକୁ ୬ ବର୍ଷ କାରାଦଣ୍ଡାଦେଶ ଶୁଣାଇଛନ୍ତି ସହକାରୀ ଦୌରାଜଜ୍ । ୧୭ ଜଣ ସାକ୍ଷୀଙ୍କ ବୟାନ ଓ ଟିଆଇ ପ୍ୟାରେଡ ରେକର୍ଡକୁ ଆଧାର କରି ଆଜି ଅଭିଯୁକ୍ତ ମାନଙ୍କୁ ୬ ବର୍ଷ କାରାଦଣ୍ଡାଦେଶ ନିର୍ଦ୍ଦେଶ ଦେଇଛନ୍ତି ସହକାରୀ ଦୌରା ଜଜ୍ ଶ୍ରୀମତୀ ସ୍ମୃତିସ୍ନିଗ୍ଧା ଦାସ । ଏହି ମାମଲାରେ ସରକାରୀ ଆଇନଜିବୀ ପ୍ରଭାତ ଆଦିତ୍ୟ ବରାଡ଼ ମାମଲା ପରିଚାଳନା କରିଛନ୍ତି ।





