ଦୁଇ ନାବାଳକଙ୍କୁ ୨୦ ବର୍ଷ ଜେଲଦଣ୍ଡ

ନୟାଗଡ଼ (ବାଘୁଆବାର୍ତ୍ତା): ନୟାଗଡ଼ ଅତିରିକ୍ତ ଜିଲ୍ଲାଜଜ୍ ତଥା ଶିଶୁ ଅଦାଲତର ସ୍ୱତନ୍ତ୍ର ବିଚାରପତି ଇତିଶ୍ରୀ ମହାପାତ୍ର ଏକ ନାବାଳିକା ଦୁଷ୍କର୍ମ ଘଟଣାର ବିଚାର କରି ଅଭିଯୁକ୍ତ ଦ୍ୱୟଙ୍କୁ ୨୦ ବର୍ଷ ଲେଖାଏଁ ସଶ୍ରମ କାରାଦଣ୍ଡାଦେଶ ସହିତ ୫୨ ହଜାର ଟଙ୍କା ଲେଖାଏଁ ଜୋରିମାନା ରାୟ ଶୁଣାଇଛନ୍ତି । ମାମଲା ପରିଚାଳନା କରୁଥିବା ସରକାରୀ ଓକିଲଠାରୁ ମିଳିଥିôବା ସୂଚନାମୁତାବକ ୨୦୧୭ ମସିହା ଏପ୍ରିଲ ୨ ତାରିଖରେ ଶରଣକୁଳ ଥାନାରେ ଜଣେ ନାବାଳିକାକୁ ଦୁଷ୍କର୍ମ ଏବଂ ଅଶ୍ୱୀଳ ଭିଡିଓ ଭାଇରାଲ ହୋଇଥିବା ଅଭିଯୋଗ ହୋଇଥିଲା । କିଛିଦିନ ପୂର୍ବରୁ ଉକ୍ତ ନାବାଳିକାଙ୍କୁ ତାଙ୍କର ସହପାଠୀ ଏବଂ ଅନ୍ୟ ଦୁଇ ଜଣ ନାବାଳକ ବାହାନା ଦେଖାଇ ପାହାଡ଼ ଉପରକୁ ନେଇ ଦୁଷ୍କର୍ମ କରିଥିଲେ । ଏହାର ଭିଡିଓ ମଧ୍ୟ ଭାଇରାଲ କରିଥିଲେ । ଯାହା ଫଳରେ ନାବାଳିକା ନିଜ ବାପା ଓ ମାଆଙ୍କ ସହ ଯାଇ ଏ ବିଷୟରେ ଶରଣକୁଳ ଥାନାରେ ଅଭିଯୋଗ କରିଥିଲେ । ଘଟଣାରେ ନାବାଳିକାର ସହପାଠୀକୁ ଜୁଭେନାଇଲ ଜଷ୍ଟିସ ବୋର୍ଡ଼ ଦୋଷୀ ସାବ୍ୟସ୍ତ କରି ୩ ବର୍ଷ ପାଇଁ ବାଳ ସୁଧାର ଗୃହକୁ ପଠାଇ ଦେଇଥିଲେ । ଅନ୍ୟ ଦୁଇ ଜଣ ନାବାଳକଙ୍କୁ ବିଚାର ପ୍ରକିୟା ନୟାଗଡ଼ ଶିଶୁ ଅଦାଲତରେ କରାଯିବା ନେଇ ନିଷ୍ପତ୍ତି ନେଇଥିଲେ । ସେହିଦିନଠାରୁ ଏହି ମାମଲାର ବିଚାର ଶିଶୁ ଅଦାଲତରେ ଚାଲିଥିଲା । ଅଦାଲତ ୧୦ ଜଣ ସାକ୍ଷୀଙ୍କ ବୟାନ, ଡାକ୍ତରୀ ମାଇନା ରିପୋର୍ଟ ପ୍ରତିପକ୍ଷ ଓକିଲ ଓ ସରକାରୀ ଓକିଲଙ୍କ ଜବାବ ସୁଆଲ ବିଚାରକୁ ନେଇ ଆଜି ଅଭିଯୁକ୍ତ ଦୁଇ ନାବାଳକଙ୍କୁ ୩୭୬(ଡି) ଦଫାରେ ୨୦ ବର୍ଷ ସଶ୍ରମ କାରାଦଣ୍ଡ ସହ ୫୦ ହଜାର ଜୋରିମାନା ଏବଂ ୨୯୨ ଦଫାରେ ୨ ବର୍ଷ କାରାଦଣ୍ଡ ସହ ୨ ହଜାର ଟଙ୍କା ଜୋରିମାନା ଆଦାୟ କରିବାକୁ ରାୟ ଶୁଣାଇଛନ୍ତି । ଜେଲ ଦଣ୍ଡ ଏକକାଳୀନ ଭୋଗ ହେବ ବୋଲି ଜଣାଯାଇଛି । ସରକାରଙ୍କ ତରଫରୁ ଆଇନଜୀବୀ ଅମିୟ ପଟ୍ଟନାୟକ ଏହି ମାମଲାକୁ ପରିଚାଳନା କରୁଥିଲେ ।