ନୟାଗଡ଼, (ବାଘୁଆବାର୍ତ୍ତା): ଯଦୁମଣି ଆଥଲେଟିକ ଆସୋସିଏସନ ଆନୁକୂଲ୍ୟରେ ସ୍ଥାନୀୟ ବାମନ ଅବକାଶ ହାଇସ୍କୁଲ ପଡିଆଠାରେ ଚାଲିଥିବା ଇଟାମାଟି କପ: ୨୦୨୩ ରାଜ୍ୟ ସ୍ତରୀୟ ଫୁଟବଲ ଟୁର୍ଣ୍ଣାମେଣ୍ଟର ଆଜି ତୃତୀୟ ଦିବସରେ ଘରୋଇ ଇଟାମାଟି ଦଳକୁ ଭେଟିଥିଲା ନୀଳଚକ୍ର ସ୍ପୋର୍ଟସ କ୍ଲବ ପୁରୀ । ଖେଳ ପ୍ରଥମରୁ ସଂଘର୍ଷ ପୂର୍ଣ୍ଣ ହୋଇଥିଲା । ଆଜିର ଖେଳରେ ମୁଖ୍ୟ ଅତିଥି ଭାବେ ନୟାଗଡ଼ ଟାଉନ ଥାନା ସବ ଇନିସପେକ୍ଟର ଧର୍ମେନ୍ଦ୍ର ଶିଆଳ, ଜିଲ୍ଲା ପରିଷଦ ସଭ୍ୟ ଆଶିଷ କୁମାର ଅଗ୍ରୱାଲ, ସରପଞ୍ଚ ସ୍ୱପ୍ନେଶ୍ୱରୀ ସେଠୀ, ସମିତି ସଭ୍ୟା ଗୋଲାପରାଣୀ ସେଠୀ, କାର୍ଯ୍ୟକାରୀ ସଭାପତି ପ୍ରଦୀପ କୁମାର ସେଠୀ, ପ୍ରମୁଖ ଅତିଥି ଭାବେ ଯୋଗ ଦେଇ ଦୁଇ ଦଳର ଖେଳାଳି ମାନଙ୍କ ସହ କର ମର୍ଦ୍ଦନ କରିଥିଲେ । ମୁଖ୍ୟ ରେଫରି ଭାବେ ଏସ କେ ହାୟତ ଆଜିର ଖେଳ ପରିଚାଳନା କରିଥିଲେ । ରେଫରୀ ବିଦେଶୀ କୁମାର ନାୟକ, ବାଗିର ମହମଦ ଓ ବୁଦ୍ଧିରାମ ହେମ୍ବ୍ରମ ପ୍ରମୁଖ ତାଙ୍କୁ ସହାୟତା କରିଥବଲେ । ପ୍ରଥମାର୍ଦ୍ଧର ୧୧ ମିନିଟ ସମୟରେ ଇଟାମାଟି ଦଳର ୬ ନମ୍ବର ଖେଳାଳି ବାପୁନି ବେହେରା ପ୍ରଥମ ଗୋଲ ଏବଂ ଶେଷ ମୁହୁର୍ତ୍ତରେ ଆଉଗୋଟିଏ ଗୋଲ ଦେଇ ବେଷ୍ଟ ସ୍କୋରର ହୋଇଥିଲେ । ଏଥି ସହିତ ପୁରୀର ୧୦ ନମ୍ବର ଖେଳାଳି କାହ୍ନୁ ମଲ୍ଲିକ ଆଜିର ଖେଳରେ ମ୍ୟାନ ଅଫ ଦି ମ୍ୟାଚ ବିବେଚିତ ହୋଇଥିଲେ । ଶେଷରେ ଇଟାମାଟି ୨-୦ ଗୋଲରେ ବିଜୟୀ ହୋଇଥିଲା । ଖେଳ ଶିକ୍ଷକ ଅମୀୟ ମୋହନ ସାହୁ ଖେଳର ଧାରା ବିବରଣୀ ପ୍ରଚାର କରିଥିଲେ । ଆସନ୍ତା କାଲି ଏଠାରେ ବଜରଙ୍ଗ ବାଲି ସ୍ପୋର୍ଟିଂ କ୍ଲବ ଭୁବନେଶ୍ୱର ଓ ଭଞ୍ଜନଗର ଦଳ ପରସ୍ପରକୁ ଭେଟିବେ ।
