ବାତ୍ୟା ପ୍ରଭାବିତ ଅଞ୍ଚଳରେ ରନ୍ଧା ଖାଦ୍ୟ ବାଣ୍ଟୁଛି ଭାରତୀୟ ନୌସେନା

ଭୁବନେଶ୍ୱର, (ବାଘୁଆବାର୍ତ୍ତା): ବାତ୍ୟା ‘ୟଶ’ରେ ପ୍ରଭାବିତ ହୋଇଥିବା ବାଲେଶ୍ୱରରେ ଭାରତୀୟ ନୌସେନା ପକ୍ଷରୁ ରନ୍ଧା ଖାଦ୍ୟ ବଣ୍ଟନ କରାଯାଇଛି । ନୌସେନା ପକ୍ଷରୁ ବାଲେଶ୍ୱର ସଦର ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ ପହଞ୍ଚି ସ୍ଥିତି ପରଖି ଆଜି ରିଲିଫ୍ ବଣ୍ଟନ କରିଛନ୍ତି । ବାତ୍ୟା ‘ୟଶ’ ଚାଲିଗଲା ପରେ ଗାଁ ଗଣ୍ଡା ଜଳବନ୍ଦୀ ହୋଇ ରହିଛି । ନୌସେନା ପକ୍ଷରୁ ସେଠାରେ ଥିବା ବାତ୍ୟା ଆଶ୍ରୟସ୍ଥଳୀରେ କମ୍ୟୁନିଟ୍ କିଚେନ୍ ର ବ୍ୟବସ୍ଥା କରାଯାଇଛି । ନନ୍ଦାଚକ, ବଉଳବେଣୀ ଓ ବୁଢ଼ିଗଡ଼ିଆ ଆଦି ମତ୍ସ୍ୟଜୀବୀ କଲୋନୀରେ ୭୦୦ରୁ ଉର୍ଦ୍ଧ ଲୋକଙ୍କୁ ଭାରତୀୟ ନୌସେନା ପକ୍ଷରୁ ରନ୍ଧା ଖାଦ୍ୟ ଯୋଗଇ ଦିଆଯାଇଛି । ନୌସେନାର ଆଉ ଏକ ଟିମ୍ ତାଳସାରୀ, ଭୋଗରାଇ, ଇଞ୍ଚୁଡ଼ି ଓ ଚନ୍ଦ୍ରମଣି ଅଞ୍ଚଳରେ ଆଜି ରିଲିଫ୍ ବଣ୍ଟନ କରାଯାଇଛି । ତତ୍ ସହିତ ବହୁ ସ୍ଥାନରେ ରାସ୍ତା ଅବରୋଧ ହୋଇ ଥିବା ବେଳେ ନୌସେନା ଟିମ୍ ରାସ୍ତା ଅବରୋଧ ହଟାଇଛି ।ଧମରାରେ ଭାରତୀୟ ନୌସେନାର ୪ଟି ଜାହାଜ ରିଲିଫ୍ ସାମଗ୍ରୀ ଧାମରାରେ ପହଞ୍ଚି ଥିବା ବେଳେ ନୌସେନାର ହେଲିକପ୍ଟର ମଧ୍ୟ ରିଲିଫ୍ କାର୍ଯ୍ୟରେ ନିୟୋଜିତ ଥିବା ସୂଚନା ମିଳିଛି ।