ନୟାଗଡ଼, (ବାଘୁଆବାର୍ତ୍ତା) : ଗଣିଆରେ ଥିବା ଇଣ୍ଡିୟାନ ବ୍ୟାଙ୍କରେ ସୋମବାର ପ୍ରବଳ ଗହଳି ଦେଖିବାକୁ ମିଳିଥିଲା । ଦୂର ଦୂରାନ୍ତରରୁ ଶହ ଶହ ଲୋକ ଧାଡି ବାନ୍ଧି ଦୀର୍ଘ ୨ ଘଣ୍ଟା କାଳ ଅପେକ୍ଷା କରିବା ପରେ କର୍ମଚାରୀ ମାନଙ୍କର ଦେଖା ମଳିନଥିଲା । ବ୍ୟାଙ୍କ ପାସ୍ବୁକ୍ ଅପ୍ଡେଟ୍,ଟଙ୍କା ଉଠାଣ,ଟଙ୍କା ଜମା,ନୂତନ ଖାତା ଏପରିକି ସୁନା ରୁଣ ପରିଶୋଧ ପାଇଁ ଶହ ଶହ ଲୋକ ବ୍ୟାଙ୍କ ଭିତରେ ଜମା ହୋଇ ରହିଥିଲେ । ଏତେ ସଂଖ୍ୟକ ଲେଶକ ବ୍ୟାଙ୍କ ଭିତରେ ଜାଗା ନଥିବାରୁ ଠେଲା ପେଲା ଆରମ୍ଭ ହେବା ସହିତ ପରସ୍ପର ମଧ୍ୟରେ ପାଟିତୁଣ୍ଡ ଆରମ୍ଭ ହୋଇଥିଲା । ସମୟ ଦିବା ୧୨ଟା ବାଜିଥିଲେ ମଧ୍ୟ ଜଣେ ବି କର୍ମଚାରୀ ଆସି ନଥିଲେ । କ୍ୟାସିୟରଙ୍କ ଟେବୁଲ ଠାରୁ ଆରମ୍ଭ କରି ସହକାରୀ ବ୍ୟାଙ୍କ ମ୍ୟାନେଜରଙ୍କ ପର୍ଯ୍ୟନ୍ତ ସବୁଠାରେ ଫାଙ୍କା ଥିଲା । କେହି ବି ଜଣେ ନିଜ ସିଟକୁ ଆସି ନଥିବା ବେଳେ ମ୍ୟାନେଜର ନିଜ ଚାମ୍ବରରେ ବସି ନିଜ କାମରେ ବ୍ୟସ୍ତ ଥିଲେ । ନା ସେ ଲୋକଙ୍କ ପାଖକୁ ଆସୁଥିଲେ ନା ଲୋକଙ୍କୁ କିଛି ଆଶ୍ୱାସନା ଦେଉଥିଲେ । ଏହି ସମୟରେ ସରପଞ୍ଚ ସଂଘର ସଭାପତି ପ୍ରଫୁଲ୍ଲ କୁମାର ବେହେରା ବ୍ୟାଙ୍କରେ ପହଞ୍ଚି ବ୍ୟାଙ୍କରେ କେହି ନାହାନ୍ତି କାହିଁକି ବୋଲି ପ୍ରଶ୍ନ କରିବାରୁ ବ୍ୟାଙ୍କ ମ୍ୟାନେଜର ତାଙ୍କୁ ଗାଲି ଗୁଲଜ କରିଥିବା ସରପଞ୍ଚ ଅଭିଯୋଗ କରିଛନ୍ତି । ଏପରିକି ଉଭୟଙ୍କ ମଧ୍ୟରେ ପାଟିତୁଣ୍ଡ ବଚସା ହେବା ପରେ ମ୍ୟାନେଜର ନିଜ ଚାମ୍ବରରୁ ଆସି କ୍ୟାସ ସେକ୍ସନରେ ବସିଥିଲେ । କିଛି ସମୟ ପରେ ଆଉ ଜଣେ ବାବୁ ଆସି ନିଜ ଟେବୁଲରେ ବସିଥିଲେ । ଗଣିଆରେ ଇଣ୍ଡିୟାନ ବ୍ୟାଙ୍କରେ ସବୁବେଳେ ଗହଳି ଲାଗି ରହିଥିବା ବେଳେ କର୍ମଚାରୀଙ୍କର ଦେଖା ମିଳୁନଥିବା ବାରମ୍ବାର ଅଭିଯୋଗ ହେଉଛି । ଲୋକମାନେ ଦିନ ୯ଟା ବେଳୁ ବ୍ୟାଙ୍କକୁ ଆସୁଥିବା ବେଳେ କର୍ମଚାରୀ ମାନଙ୍କର କୈାଣସି ସମୟ ଜ୍ଞାନ ରହୁନାହିଁ ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ବ୍ୟାଙ୍କକୁ ଆସି ଘରକୁ ଫେରିଲା ବେଳକୁ ସଂଧ୍ୟ୍ୟା ହୋଇ ଯାଉଛି । ଉଚ୍ଚ କତ୍ତୃପକ୍ଷ ଏ ଦିଗରେ ହସ୍ତକ୍ଷେପ କରିବାକୁ ସାଧାରଣରେ ଦାବୀ ହେଉଛି ।
