ନୂଆଦିଲ୍ଲୀ, (ବାଘୁଆବାର୍ତ୍ତା): ଭାରତ ଓ ଶ୍ରୀଲଙ୍କା ମଧ୍ୟରେ ଜୁଲାଇରେ ଦିନିକିଆ ଓ ଟି-୨୦ ସିରିଜ୍ ଖେଳାଯିବ। ଆଇପିଏଲ୍ ପୂର୍ବରୁ ଏହି ସିରିଜ୍ ଖେଳାଯିବ। ବିସିସିଆଇ ପକ୍ଷରୁ ଏ ପର୍ୟ୍ୟନ୍ତ ସିରିଜ୍ର କାର୍ୟ୍ୟସୂଚୀ ନେଇ କୌଣସି ଆନୁଷ୍ଠାନିକ ଘୋଷଣା କରାଯାଇ ନାହିଁ। ମାତ୍ର ଅଫିସିଆଲ ବ୍ରଡକାଷ୍ଟର ସିରିଜ୍ କାର୍ୟ୍ୟକ୍ରମ ଘୋଷଣା କରିଛି। ଏହା ଅନୁଯାୟୀ, ଜୁଲାଇ ୧୩ରୁ ସିରିଜ୍ ଆରମ୍ଭ ହେବ ଏବଂ ଜୁଲାଇ ୨୫ରେ ଅନ୍ତିମ ମୁକାବିଲା ଖେଳାଯିବ। ପ୍ରସାରଣକର୍ତ୍ତା ଟେନ ସ୍ପୋର୍ଟ୍ସ ଏହି ସିରିଜ୍ର ପୂରା କାର୍ୟ୍ୟକ୍ରମ ଘୋଷଣା କରିଛି। ଭାରତର ଗସ୍ତ ଦିନିକିଆ ସିରିଜ୍ରୁ ଆରମ୍ଭ ହେବ। ପ୍ରଥମ ଦିନିକିଆ ଜୁଲାଇ ୧୩, ଦ୍ଵିତୀୟ ଦିନିକିଆ ଜୁଲାଇ ୧୬ ଏବଂ ତୃତୀୟ ଦିନିକିଆ ଜୁଲାଇ ୧୮ରେ ଖେଳାଯିବ। ଅନ୍ୟପଟେ ଟି-୨୦ ମୁକାବିଲା ଜୁଲାଇ ୨୧, ଜୁଲାଇ ୨୩ ଏବଂ ଜୁଲାଇ ୨୫ରେ ଖେଳାଯିବ। ସୂଚନା ଅନୁଯାୟୀ, ସମସ୍ତ ମୁକାବିଲା ଗୋଟିଏ ଷ୍ଟାଡିୟମରେ ଖେଳାଯିବ। କଲୋମ୍ବୋର ପ୍ରେମଦାସା ଷ୍ଟାଡିୟମରେ ଏହି ସିରିଜ୍ ଖେଳାଯିବ। ଶ୍ରୀଲଙ୍କା ବିପକ୍ଷ ସିରିଜ୍ ସମୟରେ ବରିଷ୍ଠ ଖେଳାଳି ଇଂଲଣ୍ଡ ଗସ୍ତରେ ଥିବେ। ତେଣୁ ଶ୍ରୀଲଙ୍କା ଗସ୍ତ ପାଇଁ ଯୁବ ଖେଳାଳିଙ୍କୁ ଦଳରେ ସୁଯୋଗ ଦିଆଯିବ। ଓପନର ଓ ବରିଷ୍ଠ ବ୍ୟାଟସମ୍ୟାନ ଶିଖର ଧାଓ୍ଵନଙ୍କୁ ଏହି ଗସ୍ତ ପାଇଁ ଅଧିନାୟକ ଦାୟିତ୍ଵ ଦିଆଯାଇପାରେ। ଆହତ ଶ୍ରେୟସ ଆୟରଙ୍କ ଖେଳିବା ନେଇ ସଂଶୟ ରହିଛି। ପୃଥ୍ଵୀ ସ, ଦେବଦତ୍ତ ପାଡିକଲ, ନୀତିଶ ରାଣାଙ୍କ ପରି ବ୍ୟାଟସମ୍ୟାନଙ୍କୁ ଦଳରେ ସାମିଲ କରାଯାଇପାରେ। ଅନ୍ୟପଟେ ଚଳିତ ବର୍ଷ ବିଶ୍ଵ କପ୍ ଖେଳାଯିବ।
