ନୂଆଦିଲ୍ଲୀ, (ବାଘୁଆବାର୍ତ୍ତା): ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ମୁମ୍ବାଇର ଓ୍ବାଙ୍ଖେଡେ ଷ୍ଟାଡିୟମରେ ଆରମ୍ଭ ହୋଇଛି ଅନ୍ତିମ ଟେଷ୍ଟ । ବର୍ଷା ବାଧାପ୍ରାପ୍ତ ପ୍ରଥମ ଦିନରେ ଖେଳ ବିଳମ୍ବରେ ଆରମ୍ଭ ହୋଇଥିଲା । ପ୍ରଥମରୁ ସାମାନ୍ୟ ବ୍ୟାଟିଂ ବିପର୍ୟ୍ୟୟର ସମ୍ମୁଖୀନ ହୋଇଥିବା ଭାରତ ପ୍ରଥମ ଦିନ ଖେଳ ଶେଷ ସୁଦ୍ଧା ୪ ଓ୍ବିକେଟ ହରାଇ ସଂଗ୍ରହ କରିଛି ୨୨୧ ରନ । ମୟଙ୍କ ଅଗ୍ରଓ୍ବାଲଙ୍କ ଦମଦାର ଅପରାଜିତ ଶତକ ବଳରେ ବଡ ସ୍କୋର ଆଡକୁ ଅଗ୍ରସର ହେଉଛି ଦଳ । ପ୍ରଥମରୁ ହିଁ ଭଲ ଆରମ୍ଭ କରିଥିଲା ଟିମ ଇଣ୍ଡିଆ । ଦୁଇ ଓପନର ମୟଙ୍କ ଅଗ୍ରଓ୍ବାଲ ଏବଂ ଶୁଭମାନ ଗିଲ ଦଳକୁ ଭଲ ଷ୍ଟାର୍ଟ ଦେଇଥିଲେ । ପ୍ରଥମ ଓ୍ବିକେଟ ଯୋଡିରେ ଉଭୟ ୮୦ ରନ କରିଥିଲେ । ଶୁଭମାନ ଗିଲ ସେଟ୍ ହୋଇସାରିଥିଲେ କିନ୍ତୁ ଖରାପ ସଟ୍ ଖେଳି ୪୪ ରନ କରି ଆଉଟ ହୋଇଛନ୍ତି । ପରେ ବ୍ୟାଟିଂ କରିବାକୁ ଆସିଥିବା ଚେତେଶ୍ବର ପୂଜାରା ଖାତା ଖୋଲିବାକୁ ସକ୍ଷମ ହୋଇନାହାନ୍ତି । ଅଧିନାୟକ ବିରାଟ କୋହଲି ମଧ୍ୟ ଖାତା ଖୋଲିପାରିନାହାନ୍ତି । ଏକଦା ୭୯ ରନରେ କୌଣସି ଓ୍ବିକେଟ ହରାଇଥିବା ଦଳ ୮୦ ରନରେ ୩ଟି ଓ୍ବିକେଟ ପଡିଥିଲା । ଗୋଟିଏ ପଟେ ମୟଙ୍କ ଅଗ୍ରଓ୍ବାଲ ଧୈର୍ୟ୍ୟର ସହ ବ୍ୟାଟିଂ ଜାରି ରଖିଛନ୍ତି । ସେ ୨୪୬ ବଲ ଖେଳି ୧୪ ଚୌକା ଏବଂ ୪ଟି ଛକା ସହାୟତାରେ ୧୨୦ ରନ କରି ଅପରାଜିତ ଅଛନ୍ତି । ଶ୍ରେୟସ ଆୟର ବ୍ୟକ୍ତିଗତ ୧୮ରନ କରି ଆଉଟ ହୋଇଛନ୍ତି । ରିଦ୍ଧିମାନ ଶାହା ୨୫ ରନ କରି ଅପରାଜିତ ଅଛନ୍ତି । ନ୍ୟୁଜିଲାଣ୍ଡ ପକ୍ଷରୁ ଏକ ମାତ୍ର ସଫଳ ବୋଲର ଭାବେ ଏଜାଜ୍ ପଟେଲ ୨୯ ଓଭର ବୋଲିଂ କରି ୭୩ ରନ ଦେଇ ସମସ୍ତ ୪ଟି ଯାକ ଓ୍ବିକେଟ ନେଇଛନ୍ତି । ସେହିଭଳି ଟିମ ସାଉଦୀ ୧୫ ଓଭରରେ ୨୯ ରନ ଦେଇଥିବା ବେଳେ, କାଇଲ ଜିମିସନ୍ ୯ଓଭରରେ ୩୦ ରନ, ଓ୍ବିଲ ସୋମରଭିଲ୍ଲେ ୮ ଓଭରରେ ୪୬ରନ, ରଚିନ୍ ରବିନ୍ଦ୍ର ୪ ଓଭରରେ ୨୦ରନ ଏବଂ ଡାରିଲ ମିଚେଲ ୫ ଓଭରରେ ୯ରନ ଦେଇଛନ୍ତି ।
ଭାରତ-ନ୍ୟୁଜିଲାଣ୍ଡ ଦ୍ୱିତୀୟ ଟେଷ୍ଟ ମ୍ୟାଚ୍: ମୟଙ୍କ ଅପରାଜିତ ଶତକରେ ଭାରତ ୨୨୧/୪
