ଦେଶୀ ମଦ, ଦେଶୀ ବନ୍ଧୁକ ଜବତ୍, ଜଣେ ଗିରଫ

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ସଦର ଥାନା ପୁଲିସ ଆଜି ସନ୍ଧ୍ୟାରେ ପାଉଚ୍ ସହିତ ସମୁଦାୟ ୨୨୦ ଲିଟର ଦେଶୀ ମଦ ଜବତ୍ କରିଛି। ମଦ ବେପାରୀକୁ ଧରିବାକୁ ଚଢାଉ ବେଳେ ତାଙ୍କ ଘରୁ ଏକ ଦେଶୀ ବନ୍ଧୁକ ମଧ୍ୟ ଜବତ୍ କରାଯାଇଛି। ଏଥିନେଇ ବୋଦାପଡ଼ା ଗ୍ରାମର ପୂର୍ଣ୍ଣଚନ୍ଦ୍ର ମହାପାତ୍ର ଓରଫ୍ ପୁନିଆ(୪୫)କୁ ପୁଲିସ ଗିରଫ କରିଛି। ବିଶ୍ବସ୍ତ ସୂତ୍ରରୁ ଖବର ପାଇ ପୁଲିସ ପୁନିଆର ଘରେ ଚଢାଉ କରିଥିଲା। ଶିକାର ଉଦ୍ଦେଶ୍ୟରେ ପୁନିଆ ବନ୍ଧୁକ ରଖିଥିବା ଜଣାପଡ଼ିଛି। ତେବେ ସେ ଦୀର୍ଘଦିନ ହେବ ଦେଶୀ ମଦ କାରବାର କରୁଥିବା ପୁଲିସ ସୂତ୍ରରୁ ପ୍ରକାଶ। ପୁନିଆକୁ ଆଜି କୋର୍ଟ ଚାଲାଣ କରାଯିବ ବୋଲି ଆଇଆଇସି ଦୀପକ ଖଣ୍ଡାୟତରାୟ ସୂଚନା ଦେଇଛନ୍ତି।