ଭୁବନେଶ୍ୱର, (ବାଘୁଆବାର୍ତ୍ତା): ଭାରତୀୟ ହକି ବିଶ୍ୱକପ୍ ଦଳରେ ସାମିଲ ହୋଇଥିବା ଦୁଇ ଓଡ଼ିଆ ଡିଫେଣ୍ଡର ଅମିତ ରୋହିଦାସ ଏବଂ ନିଲମ ସଞ୍ଜୀବ ଖେସଙ୍କ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପୁରସ୍କାର ରାଶି ଘୋଷଣା କରିଛନ୍ତି । ଉଭୟ ଖେଳାଳିଙ୍କୁ ୧୦ ଲକ୍ଷ ଟଙ୍କା ଲେଖାଏଁ ମିଳିବ । ମୁଖ୍ୟମନ୍ତ୍ରୀ କହିଛନ୍ତି, ଯେତେବେଳେ ଅମିତ ଓ ନିଲମ ଭାରତୀୟ ଜର୍ସି ପରିଧାନ କରି ପିଚ୍ର ମଝିରେ ଛିଡ଼ା ହେବେ ଏହା ସୁନ୍ଦରଗଡ଼ ପାଇଁ ଗୌରବର ମୁହୂର୍ତ୍ତ ହେବ । ବିର୍ସା ମୁଣ୍ଡା ଷ୍ଟାଡିୟମର ସମସ୍ତ ଦଶକଙ୍କ ସମର୍ଥନ ଏହି ଦୁଇ ଖେଳାଳିଙ୍କ ସହ ରହିବ ।’ଅମିତ ଭାରତୀୟ ଅଲିମ୍ପିକ୍ସ ବ୍ରୋଞ୍ଜ ପଦକ ବିଜେତା ଦଳର ସଦସ୍ୟ ଥିଲେ । ଏହି ବିଶ୍ୱକପ୍ରେ ସେ ଉପ୍ ଅଧିନାୟକ ନିଯୁକ୍ତ ହୋଇଛନ୍ତି । ନିଲମ ଏଥର ବିଶ୍ୱକପ୍ରେ ପଦାର୍ପଣ କରିଛନ୍ତି । ଅମିତ ପଦାର୍ପଣରେ ଅଲିମ୍ପିକ୍ସ ପଦକ ଜିତିବାର ସୌଭାଗ୍ୟ ଲାଭ କରିଥିଲେ । ଶୁକ୍ରବାର ପୁଣି ବିର୍ସା ମୁଣ୍ଡା ଷ୍ଟାଡିୟମରେ ପ୍ରଥମ ଗୋଲ ଦେଇଥିଲେ । ସେ ୧୩୦ରୁ ଊର୍ଦ୍ଧ୍ୱ ମ୍ୟାଚ୍ ଖେଳି ସାରିଲେଣି । ୨୦୧୮ ବିଶ୍ୱକପ୍ରେ ଅମିତ ପଦାର୍ପଣ କରିଥିଲେ । ଜଣେ ଯୁବ ଡିଫେଣ୍ଡର ଭାବେ ନିଲମ ଏ ପର୍ୟ୍ୟନ୍ତ ୩୪ ମ୍ୟାଚ୍ ଖେଳିଛନ୍ତି । ତାଙ୍କ କ୍ୟାରିୟରରେ ଶ୍ରେଷ୍ଠ ସଫଳତା ହେଉଛି ୨୦୨୨ ଏସିଆ କପ୍ରେ ବ୍ରୋଞ୍ଜ । ପୂର୍ବରୁ ସେ ୧୮ ବର୍ଷରୁ କମ୍ ଏସିଆ କପ୍ରେ ଭାରତୀୟ ଦଳର ନେତୃତ୍ୱ ନେଇଥିଲେ ।
