ନୟାଗଡ଼, (ବାଘୁଆବାର୍ତ୍ତା): ଲକଡାଉନ୍ ଓ ସଟଡାଉନ୍ କଟକଣା ମଧ୍ୟରେ ସାଧାରଣରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଏହାରି ମଧ୍ୟରେ କୋଭିଡ୍ କଟକଣା ମାନିବା ମଧ୍ୟ ସମସ୍ତଙ୍କ ପାଇଁ ଜରୁରୀ ହୋଇପଡିଛି । ଯାନବାହାନ ଚଳାଚଳ ବନ୍ଦ ହୋଇଯିବା ଫଳରେ ଅନେକ ବରିଷ୍ଠ ନାଗରିକଙ୍କ ସ୍ୱାସ୍ଥ୍ୟ ସମସ୍ୟାକୁ ନେଇ ସେମାନେ ଚିକିତ୍ସା ନିମନ୍ତେ ଡାକ୍ତରଖାନାରେ ପହଞ୍ଚି ପାରୁନାହାନ୍ତି । ଏପରିକି ପରିବାର ଲୋକ ଡାକ୍ତରଖାନାରେ ପହଞ୍ଚାଇବାରେ ମଧ୍ୟ ଅନେକ ସମସ୍ୟାର ସମ୍ମୁଖୀନ ହୋଇଛନ୍ତି । ଏପରି ମଧ୍ୟ ଅନେକ ବରିଷ୍ଠ ନାଗରିକ ଏକାନ୍ତରେ ଜୀବନଯାପନ କରୁଛନ୍ତି । କେଉଁଠି ପରିଣତି ବୟସରେ ସ୍ୱାମୀ ସ୍ତ୍ରୀକୁ ହରାଇଛି ତ ସ୍ତ୍ରୀ ସ୍ୱାମୀକୁ ହରାଇ ଏକାକି ଦୁର୍ବିସହ ଜୀବନ ବିତାଉଛନ୍ତି । ଆର୍ଥିକ ପରିସ୍ଥିତି ଦୃଷ୍ଟିରୁ ପରିବାର ଲୋକ ସେମାନଙ୍କ ଉପଯୁକ୍ତ ଯତ୍ନ ନେବା ପରିବର୍ତ୍ତେ ପରିବାର ଉପରେ ବୋଝ ଭାବି ଖରାପ ବ୍ୟବହାର ପ୍ରଦର୍ଶନ କରୁଛନ୍ତି । ଜିଲ୍ଲାର ବରିଷ୍ଠ ନାଗରିକମାନଙ୍କ ପାଇଁ ତୁରନ୍ତ ହେଲ୍ପଲାଇନ ଜାରୀ କରିବା ସଙ୍ଗେ ସଙ୍ଗେ ସ୍ୱତନ୍ତ୍ର ଅଟୋ ସେବା ଏବଂ ଜରୁରୀକାଳୀନ ସମୟରେ ଉକ୍ତ ଅଟୋ ସହ ଟେଲିଫୋନରେ ଯୋଗାଯୋଗ କରିବାର ସୁବିଧା ଯୋଗାଇ ଦେବା ପାଇଁ ଜିଲ୍ଲା ବରିଷ୍ଠ ନାଗରିକ ସଂଘର ସଭାପତି ପ୍ରମୋଦ ପଟ୍ଟନାୟକ ଜିଲ୍ଲାପାଳ ଡ଼ ପୋମା ଟୁଡୁ ଓ ଆରକ୍ଷୀ ଅଧିକ୍ଷକ ସିଦ୍ଧାର୍ଥ କଟ୍ଟାରିଆଙ୍କ ନିକଟରେ ଦାବି ଜଣାଇଛନ୍ତି ।
