ଟି-୨୦ ମାଇଲଖୁଣ୍ଟ ହାସଲ କଲେ ବିସ୍ପୋରକ ଓପ୍ନର

ନୂଆଦିଲ୍ଲୀ, (ବାଘୁଆବାର୍ତ୍ତା): ଟି-୨୦ ମାଇଲଖୁଣ୍ଟ ହାସଲ କରିବାରେ ସକ୍ଷମ ହୋଇପାରିଛନ୍ତି ୱେଷ୍ଟଇଣ୍ଡିଜର ବିସ୍ପୋରକ ଓପ୍ନର ବ୍ୟାଟ୍ସମ୍ୟାନ୍ କ୍ରିସ୍ ଗେଲ । ଗେଲ୍ ଟି-୨୦ ଦୁନିଆରେ ପ୍ରଥମ ବ୍ୟାଟ୍ସମ୍ୟାନ୍ ଭାବେ ୧୪ହଜାର ରନର ମାଇଲଖୁଣ୍ଟ ଛିଡା କରିଛନ୍ତି । ମଙ୍ଗଳବାର ଅଷ୍ଟ୍ରେଲିଆ ବିପକ୍ଷରେ ତୃତୀୟ ଟି-୨୦ ମ୍ୟାଚରେ କ୍ରିସ୍ ଗେଲ୍ ବଡ଼ ରେକର୍ଡ ଅଧିକାରୀ ହୋଇପାରିଛନ୍ତି । ଅଷ୍ଟ୍ରେଲିଆ ଟି-୨୦ ମ୍ୟାଚରେ ୨୦ ଓଭରରେ ୧୪୧ ରନ କରିଥିଲେ ମାତ୍ର ୱେଷ୍ଟଇଣ୍ଡିଜ ୧୪.୫ ଓଭରରେ ୪ଟି ୱକେଟ୍ ହରାଇ ବିଜୟ ଲକ୍ଷ ହାସଲ କରିଥିଲେ । ଏଥିରେ ଗେଲ୍ ବିସ୍ପୋରକ ବ୍ୟାଟିଂ କରି ମାତ୍ର ୩୮ଟି ବଲର ସମ୍ମୁଖୀନ ହୋଇ ୬୭ରନ୍ କରିଥିଲେ । ଯେଉଁଥିରେ କି ୭ଟି ଛକା ଓ ୪ଟି ଚୌକା ସାମିଲ୍ ଥିବା ସୂଚନା ମିଳିଛି । ଗେଲ୍ ଟି-୨୦ରେ ସର୍ବମୋଟ ୪୩୧ଟି ମ୍ୟାଚ୍ ଖେଳି ୧୪ହଜାର ୩୮ରନ୍ କରିପାରିଛନ୍ତି । ତାଙ୍କରି ନାମରେ ଟି-୨୦ରେ ୨୨ଟି ଶତକ ମଧ୍ୟ ରହିଛି । କ୍ରିସ୍ ଗେଲ୍ ପଛକୁ ୧୦୮୩୬ ରନ୍ କରି କିରନ୍ ପୋଲାର୍ଡ ଦ୍ୱିତୀୟରେ ଥିବା ବେଳେ ପାକିସ୍ତାନର ସୋଏବ୍ ମଲ୍ଲିକ୍ ୧୦୭୪୧ ରନ୍ କରି ତୃତୀୟ, ଅଷ୍ଟ୍ରେଲିଆର ଡେଭିଡ୍ ୱାନର ୧୦୦୧୭ ରନ୍ କରି ଚତୁର୍ଥ ସ୍ଥାନରେ ଓ ପଞ୍ଚମ ସ୍ଥାନରେ ଭାରତର କ୍ୟାପଟେନ୍ ବିରାଟ କୋହିଲ୍ ୯୯୨୨ରନ୍ କରିବାରେ ସକ୍ଷମ ହୋଇ ପାରିଛନ୍ତି ।