ଭୁବନେଶ୍ୱର, (ବାଘୁଆବାର୍ତ୍ତା): ସାମାନ୍ୟ ବଚସାକୁ ନେଇ ଗୁଳି ଚଳାଇଲେ ଯୁବକ । ନାବାଳକର ଜଙ୍ଘରେ ବାଜିଲା ଗୁଳି । ଚିକିତ୍ସା ପାଇଁ ଆହତ ନାବାଳକକୁ ପ୍ରଥମେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟ ଏବଂ ପରେ କଟକ ସ୍ଥାନାନ୍ତର କଲେ ପରିବାର ଲୋକେ । ଅନୁଗୁଳ ଜିଲ୍ଲା ଇଣ୍ଡଷ୍ଟ୍ରିଆଲ୍ ଥାନା (ନିଶା) ଅନ୍ତର୍ଗତ ସାନକେରଜଙ୍ଗ ଗାଁରେ ଏଭଳି ଘଟଣା ଘଟିଥିବା ଜଣାପଡ଼ିଛି । ସୂଚନା ଅନୁଯାୟୀ, ମଙ୍ଗଳବାର ରାତିରେ କୌଣସି କଥାକୁ ନେଇ କିଛି ଯୁବକଙ୍କ ସହ ଗୁଳିମାଡ଼ର ଶିକାର ହୋଇଥିବା ନାବାଳକଙ୍କ ପରିବାରର ବଚସା ହୋଇଥିଲା । ଏଥିରେ ଉତକ୍ଷିପ୍ତ ହୋଇ ଜଣେ ଯୁବକ ଗୁଳିମାଡ଼ କରିଥିଲା । ଦୁର୍ଭାଗ୍ୟବଶତଃ ଗୋଟିଏ ଗୁଳି ନାବାଳକ ଜଙ୍ଘରେ ବାଜିଥିଲା । ଏହା ଦେଖି ପରିବାର ଲୋକେ ତୁରନ୍ତ ନାବାଳକକୁ ଚିକିତ୍ସା ପାଇଁ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ । ପରେ ନାବାଳକକୁ କଟକ ସ୍ଥାନାନ୍ତରିତ କରାଯାଇଛି । ତେବେ କେଉଁ କାରଣରୁ ଗୁଳି ମାଡ଼ ହୋଇଛି ତାହା ଅସ୍ପଷ୍ଟ ରହିଛି । ଅନ୍ୟପଟେ ଏହି ଘଟଣା ସମ୍ପର୍କରେ ପୋଲିସର ପ୍ରତିକ୍ରିୟା ବି ମିଳିନାହିଁ ।
