ନୟାଗଡ଼,(ବାଘୁଆବାର୍ତ୍ଥା): ସଂସାରର ମୋହମାୟାକୁ ତୁଟାଇ ଭଗବାନଙ୍କର ଶରଣାଶ୍ରିତ ହେବାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି । ରାସ୍ତାରେ ଗୁହାରିଆ ପଡି ପଡି ଦୀର୍ଘତମ ରାସ୍ତା ଅତିକ୍ରମ କରି ହରିଦ୍ୱାର ଯିବା ପାଇଁ ସଙ୍କଳ୍ପ ନେଇଛନ୍ତି । ଏଭଳି ଜଣେ ଭକ୍ତଙ୍କୁ ଆଜି ଦେଖିବାକୁ ମିଳିଥିଲା ଗଣିଆରେ । ହାତରେ ଗୋଟିଏ ଘଣ୍ଟି ଧରି ରାସ୍ତାରେ ଗୁହାରିଆ ପଡି ପଡି ଚାଲିଥିଲେ ଆଗକୁ ଆଗକୁ । ରାସ୍ତାରେ ସାଷ୍ଟାଙ୍ଗ ପ୍ରଣିପାତ କରି ଘଣ୍ଟି ରଖୁଛନ୍ତି ଓ ପୁଣି ଥରେ ଉଠି ଘଣ୍ଟି ରଖିବା ସ୍ଥାନରୁ ତଳେ ଶୋଉଛନ୍ତି । ଏଭଳି ରାସ୍ତାରେ ଗୁହାରିଆ ପଡି ପଡି ଆଗକୁ ଆଗକୁ ମାଡି ଚାଲିଛନ୍ତି । ପଚାରିଲେ କେବଳ ଦୁଇ ପଦ କଥା କହୁଛନ୍ତି । ଦୀର୍ଘ ୩ ମାସ ଧରି ସେ ଏଭଳି କଷ୍ଟସାଧ୍ୟ ଯାତ୍ରା ଆରମ୍ଭ କରିଛନ୍ତି । ସେ ପୁରୀରୁ ନିଜର ଯାତ୍ରା ଆରମ୍ଭ କରିଥିବା ବେଳେ ହରିଦ୍ୱାର ଯିବେ ବୋଲି ଜଣାଇଛନ୍ତି । ଏଭଳି କଷ୍ଟସାଧ୍ୟ ଯାତ୍ରାର ରହସ୍ୟ ପଚାରିଲେ ସବୁ ଭଗବାନଙ୍କର ଇଛା ବୋଲି ସେ ପ୍ରକାଶ କରିଛନ୍ତି । ଦିନ ତମାମ ସେ ତାଙ୍କର ଯାତ୍ରା ଚାଲୁ ରଖିଥିବା ବେଳେ ରାତି ହେଲେ ବିଶ୍ରାମ ନେଉଛନ୍ତି । ଯଦି କିଏ କିଛି ଦେଲେ ଖାଉଛନ୍ତି ନହେଲେ ଉପାସ ରହୁଛନ୍ତି । ସାଙ୍ଗରେ ଗୋଟିଏ ଟ୍ରଲି ଥିବା ବେଳେ ରାତିରେ ସେଥିରେ ବିଶ୍ରାମ ନେଉଛନ୍ତି । ତେବେ ସେ କେଉଁଠାରୁ ଆସିଛନ୍ତି,ଘର ଠିକଣା କିଛି କହୁ ନାହାନ୍ତି । ଭଗବାନଙ୍କର ଚରଣାଶ୍ରିତ ହେବା ପାଇଁ ସେ ଏଭଳି ପଦକ୍ଷେପ ଗ୍ରହଣ କରିଥିବା ପ୍ରକାଶ କରିଛନ୍ତି । ସଂସାରର କଳୁଷିତ ଜୀବନରୁ ନିଜକୁ ବଞ୍ଚାଇବା ପାଇଁ ସେ ଏଭଳି ଉଦ୍ୟମ କରିଛନ୍ତି ବୋଲି ପ୍ରକାଶ କରିଛନ୍ତି । ନିଜ ପରିବାର ସମ୍ପର୍କରେ ମଧ୍ୟ କିଛି ବି ତଥ୍ୟ ଦେଉ ନାହାନ୍ତି । ଏଭଳି ଘଟଣା ଦେଖି ଗଣିଆରେ ଲୋକ ଚକିତ ହେବାରେ ଲାଗିଥିବା ଦେଖିବାକୁ ମିଳିଥିଲା ।
