ଭଦ୍ରକ (ବାଘୁଆବାର୍ତ୍ତା): କୋଭିଡ କଟକଣାକୁ ଉଲଙ୍ଘନ କରିବା ମହଙ୍ଗା ପଡିଲା । ଲକଡାଉନ ସମୟରେ ସକାଳ ୬ଟାରୁ ଦିନ ୧୨ଟା ଯାଏଁ ଦୋକାନ ଖୋଲା ରହିବ । ହେଲେ ୧୨ଟା ପରେ ବି ଦୋକାନ ଖୋଲି ପଛ ପଟ କବାଟରେ ବେପାର କରିବା ଜଣେ ଦୋକାନୀଙ୍କୁ ବହୁତ ମହଙ୍ଗା ପଡିଛି । ଫାଇନ ତ ଲାଗିଲା ଏହା ସହ ଦୋକାନ ମଧ୍ୟ ସିଲ ହେଲା । ଏମିତି ଘଟଣା ଘଟିଛି ଭଦ୍ରକ ଜିଲ୍ଲା ଗେଟ ବଜାରରେ । କୋଭିଡ ଗାଇଡଲାଇନ ଉଲଘଂନ କରିବା ଅଭିଯୋଗରେ ୫୦ ହଜାର ଟଙ୍କାର ଫାଇନ ଲଗାଇବା ସହ ଭଦ୍ରକ ଜିଲ୍ଲା ଦୋଳସାହି ଗେଟ ବଜାରରେ ଦୋକାନକୁ ସିଲ କଲେ ତିହିଡି ପ୍ରଶାସନ । ତିହିଡି ତହସିଲଦାର ରମେଶ ଚନ୍ଦ୍ର ପଣ୍ଡା ପେଟ୍ରୋଲିଂ କରୁଥିବା ସମୟରେ ଦୋଳସାହି ଠାରେ ୧୨ଟା ପରେ ଏକ ହୋଲସେଲିଂ ଦୋକାନ ଖୋଲି ଦୋକାନର ପଛପଟରୁ ଜିନିଷ ବିକ୍ରି କରିବାର ଖବର ପାଇଥିଲେ । ତହସିଲଦାର ରମେଶ ଚନ୍ଦ୍ର ପଣ୍ଡା ଘଟଣା ସ୍ଥଳରେ ପହଞ୍ଚି ଉକ୍ତ ଦୋକାନଟିକୁ ୭ ଦିନ ପାଇଁ ସିଲ କରିବା ସହ ୫୦ ହଜାର ଟଙ୍କା ଜୋରିମାନା କରିଥିଲେ । ସଙ୍ଗେ ସଙ୍ଗେ ସମ୍ପୃକ୍ତ ଦୋକାନୀ ବିରୋଧରେ ଏକ ମାମଲା ରୁଜୁ କରିଥିବାର ତହସିଲଦାର ସୂଚନା ଦେଇଛନ୍ତି ।
