ଖଣ୍ଡପଡ଼ା,(ବାଘୁଆବାର୍ତ୍ତା) : ଖଣ୍ଡପଡ଼ା ଥାନା ଅଧିନ କଂଟିଲୋ ଫାଣ୍ଡି ଅଧିକାରୀ ଜୟକୃଷ୍ଣ ପରିଡ଼ାଙ୍କ ମାତ୍ରାଧିକ କାର୍ଯ୍ୟକଳାପ ଓ ଥାର୍ଡ଼ ଡିଗ୍ରୀକୁ ନେଇ ଅଂଚଳବାସୀଙ୍କ ମଧ୍ୟରେ ତୀବ୍ର ପ୍ରତିକ୍ରୀୟା ପ୍ରକାଶ ପାଇଛି । ଫାଣ୍ଡି ଅଧିକାରୀ ଘଟଣାର ସତ୍ୟାସତ୍ୟ ଅନୁସନ୍ଧାନ ନକରି ମାଧବଚୈାଧୁରୀ ପାଟଣା ଗ୍ରାମର ସଭାପତି ବିଜୟ କୁମାର ମହାରଣାଙ୍କୁ ମଙ୍ଗଳବାର ଦିନ ଫାଣ୍ଡିକୁ ଡ଼ାକି ଅଶ୍ଳ୍ଳୀଳ ଭାଷାରେ ଗାଳିଗୁଲଜ କରିବା ସହ ମାଡ଼ ମାରିଥିବା ନେଇ ଶ୍ରୀ ମହାରଣା ଅଭିଯୋଗ କରିଛନ୍ତି । ଘଟଣା ଜଣାପଡ଼ିବା ପରେ ଗତକାଲି ମାଧବଚୈାଧୁରୀ ପାଟଣା ଗ୍ରାମର ୫୦ରୁ ଉର୍ଦ୍ଧ ବ୍ୟକ୍ତି କଂଟିଲୋ ଫାଣ୍ଡି ସମ୍ମୁଖରେ ପହଁଚି ପାଟିତୁଣ୍ଡ କରିବା ସହ ଘଟଣାର ତୀବ୍ର ପ୍ରତିବାଦ କରିଥିଲେ । ମିଥ୍ୟା ଅଭିଯୋଗ ବଳରେ ଫାଣ୍ଡି ଅଧିକାରୀ ଏଭଳି କାଣ୍ଡ ଘଟାଇଥିବା ସ୍ଥାନୀୟ ବାସିନ୍ଦା ଗୁରୁତର ଅଭିଯୋଗ କରିଛନ୍ତି । ଘଟଣାରୁ ପ୍ରକାଶ ମାଧବଚୈାଧୁରୀ ପାଟଣା ଗ୍ରାମସ୍ଥିତ ଏକ ପୁରାତନ କୂଅର କିଛି ଅଂଶକୁ ଜଣେ ସ୍ଥାନୀୟ ବାସିନ୍ଦା ରାଜେଶ କୁମାର ମହାରଣା ଦୀର୍ଘ ଦିନ ଧରି ଅନଧିକାର ଭାବେ ଜବରଦଖଲ କରି ରଖିବାକୁ କେନ୍ଦ୍ର କରି ଗଣ୍ଡଗୋଳର ସୁତ୍ରପାତ ହୋଇଥିଲା । ବାରମ୍ବାର ସ୍ଥାନୀୟ ବାସିନ୍ଦାଙ୍କ ବିରୋଧ ସତ୍ୱେ ମଧ୍ୟ ଜବରଦଖଲକାରୀ ଜଣଙ୍କ ସେଠାରୁ ନହଟିବାକୁ ନେଇ ବିଭିନ୍ନ ସମୟରେ ପାଟିତୁଣ୍ଡ ହେଉଥିଲା । ସ୍ଥାନୀୟ ବାସିନ୍ଦା ସର୍ବସାଧାରଣଙ୍କ ନିମନ୍ତେ ଉଦ୍ଦିଷ୍ଟ କୂଅ ପାଖକୁ ଲାଗି ସୁରକ୍ଷା ଉଦ୍ଦେଶ୍ୟରେ ଖୁଂଟ ପୋତିଥିବା ବେଳେ ସଂପୃକ୍ତ ଜବରଦଖଲକାରୀ ଉଦ୍ଦେଶ୍ୟମୂଳକ ଭାବେ ଫାଣ୍ଡିରେ ଏନେଇ ଅଭିଯୋଗ କରିଥିଲେ । ଅଭିଯୋଗ ଆଧାରରେ ପୁଲିସ ସଭାପତିଙ୍କ ସମେତ ପୂର୍ଣ୍ଣଚନ୍ଦ୍ର ମହାରଣା, କାଳନ୍ଦି ଚରଣ ମହାରଣା ପ୍ରମୁଖଙ୍କୁ ଫାଣ୍ଡିକୁ ଡାକି ଏଭଳି ଆଚରଣ ପ୍ରଦର୍ଶିତ କରିଥିବା ଅଭିଯୋଗ ହୋଇଛି । ଅଭିଯୋଗକାରୀଙ୍କ ପ୍ରରୋଚନାରେ ଫାଣ୍ଡି ଅଧିକାରୀ ଏଭଳି କାରନାମା କରିଥିବାରୁ ନୟାଗଡ ଏସ୍ପି ଓ ଖଣ୍ଡପଡ଼ା ଏସଡିପିଓ ଘଟଣାରେ ହସ୍ତକ୍ଷେପ କରିବାକୁ ସ୍ଥାନୀୟ ବାସିନ୍ଦା ଦାବି କରିଛନ୍ତି ।
