ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାରୁ ପ୍ରକାଶ ପାଉଥିବା ସାପ୍ତାହିକ ଖବରକାଗଜ ‘ଗ୍ରହରାଜ’ର ସଂମ୍ପାଦକ ହରିହର ମହାପାତ୍ରଙ୍କ ଆଜି ସଂନ୍ଧ୍ୟାରେ ପରଲୋକ ଘଟିଛି । ଦୀର୍ଘଦିନ ହେବ ସେ ଅସୁସ୍ଥ ଥିଲେ । ମୃତ୍ୟୁ ବେଳକୁ ତାଙ୍କୁ ୮୨ ବର୍ଷ ବୟସ ହୋଇଥିବା ସୂଚନା ମିଳିଛି । ନୟାଗଡ଼ ସହରରେ ଖବରକାଗଜ ସଂସ୍ଥା ସ୍ଥାପନ କରି ସେ ଲୋକ ଲୋଚନକୁ ଆସିଥିବା ବେଳେ ଜଣେ ନିର୍ଭିକ ସଂପାଦକ ଭାବେ ସେ ଜଣାଶୁଣା ଥିଲେ । ଦୀର୍ଘ ୨୫ ବର୍ଷରୁ ଉର୍ଦ୍ଧ୍ୱ ସମୟ ସାମ୍ବାଦିକତା ସହିତ ଜଡ଼ିତ ଶ୍ରୀଯୁକ୍ତ ମହାପାତ୍ର କିଛି ବର୍ଷ ହେବ ରୋଗ ଶର୍ଯ୍ୟାରେ ପଡ଼ିଥିଲେ । ଏଥିସହିତ ଜଣେ ଶିକ୍ଷାବିତ୍ ଏବଂ ସମାଜସେବୀ ଭାବରେ ସେ ନିଜର ପ୍ରତିଷ୍ଠା ଲାଭ କରିବା ସହ ଦଶପଲ୍ଲା ଅଂଚଳରେ ଆଦିବାସୀ ଛାତ୍ରଛାତ୍ରୀ ଉଚ୍ଚଶିକ୍ଷା ପାଇଁ ଏକ ମହାବିଦ୍ୟାଳୟ ସ୍ଥାପନ କରିବାରେ ସେ ମୁଖ୍ୟ ଭୂମିକା ନିର୍ବାହ କରିଥିଲେ । ଦଶପଲ୍ଲା ବ୍ଲକ ଅନ୍ତର୍ଗତ ଟାକେରା ସ୍ଥିତ ମଣିନାଗ ବହୁମୂଖୀ ମହାବିଦ୍ୟାଳୟ ପ୍ରତିଷ୍ଠା କରି ସେ ଚର୍ଚ୍ଚାକୁ ଆସିଥିଲେ । ଏଥିସହିତ ସେ ଜଣେ ବିଚକ୍ଷଣ ରାଜନେତା ଭାବେ ପରିଚୟ ଲାଭ କରିଥିଲେ । ସେ ଭାରତୀୟ ଜନତା ପାର୍ଟିର ନୟାଗଡ଼ ଜିଲ୍ଲା ପ୍ରତିଷ୍ଠାତା ସଦସ୍ୟ ଭାବେ ପରିଚୟ ଲାଭ କରିଥିଲେ । ଜଣେ ବ୍ୟଙ୍ଗ କବି ଭାବରେ ତାଙ୍କର ଅନ୍ୟ ଏକ ସୁପରିଚିତି ରହିଥିବା ଜଣାଯାଇଛି । ଆଜି ଭାଟସାହି ପଂଚାୟତ ଅନ୍ତର୍ଗତ ଡିଆଁପଡ଼ା ସ୍ଥିତ ବାସଭବନରେ ତାଙ୍କର ପରଲୋକ ଘଟିଥିବା ବେଳେ ତାଙ୍କ ମୃତ୍ୟୁକୁ ନେଇ ବିଭିନ୍ନ ମହଲରେ ଶୋକ ପ୍ରକାଶ ପାଇଛି । ନୟାଗଡ଼ ଜିଲ୍ଲାରେ ଗଣମାଧ୍ୟମ ଜଗତ ସହ ଜଡ଼ିତ ଥିବା ବହୁ ବ୍ୟକ୍ତି ଶୋକ ବ୍ୟକ୍ତ କରିଛନ୍ତି । ଏଥିସହିତ ଜିଲ୍ଲା ଓ ବ୍ଲକ ସାମ୍ବାଦିକମାନେ ମଧ୍ୟ ଶୋକ ବ୍ୟକ୍ତ କରିଛନ୍ତି ।
