ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ରଣପୁର ଅନ୍ତର୍ଗତ ଚାନ୍ଦପୁର ଥାନା ଅଂଚଳରେ ଆଜି ଏକ କାଜୁ ଜଙ୍ଗଲକୁ କେନ୍ଦ୍ର କରି ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ ଘଟିଛି । ଏହି ଗୋଷ୍ଠୀ ସଂଘର୍ଷରେ ୨ ଜଣ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ ୫ଜଣଙ୍କ ଅବସ୍ଥା ଗୁରୁତର ରହିଛି । ସୂଚନାନୁସାରେ, ଚାନ୍ଦପୁର ଥାନା ଅନ୍ତର୍ଗତ ରାଇପଡ଼ା ଗାଁରେ କାଜୁ ଜଙ୍ଗଲକୁ ସେଇ ଗାଁର ବେଣୁଧର ପ୍ରଧାନ ନିଲା ଆଣି ଜଗାରଖା କରୁଥିଲେ । ଯାହାକୁ ନେଇ ଗାଁର ଅନ୍ୟ ଗୋଷ୍ଠୀ ସହ ବିବାଦ ସୃଷ୍ଟି ହୋଇଥିଲା । ଆଜି ବେଣୁଧର କିଛି ଶ୍ରମିକଙ୍କୁ ନେଇ କାଜୁ ଜଙ୍ଗଲରୁ କାଜୁ ମଂଜି ସଂଗ୍ରହ କରୁଥିବା ଅନ୍ୟ ଗୋଷ୍ଠୀର ୨୫ରୁ ଉର୍ଦ୍ଧ୍ୱ ଯୁବକ ବିଭିନ୍ନ ମାରଣାସ୍ତ୍ର ଧରି ଅତର୍କିତ ଆକ୍ରମଣ କରିଥିଲେ । ଫଳରେ ସେଠାରେ କାମ କରୁଥିବା ଦୁର୍ଗା ପ୍ରଧାନ ଓ ବିରଂଚି ପ୍ରଧାନଙ୍କ ଘଟଣା ସ୍ଥଳରେ ମୃତ୍ୟୁ ଘଟିଥିବା ବେଳେ ମୋଟ ୧୧ ଜଣ ଆହାତ ହୋଇଥିଲେ । ସେମାନଙ୍କ ମଧ୍ୟରୁ ୫ ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ଥିବାରୁ ତାଙ୍କୁ ପ୍ରଥମେ ଚାନ୍ଦପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଓ ପରେ ଭୂବନେଶ୍ୱର ସ୍ଥାନାନ୍ତରିତ କରାଯାଇଛି । ପୁଲିସ ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିବା ସହ ଶବ ଜବତ କରି ବ୍ୟବେଚ୍ଛଦ ପାଇଁ ପଠାଇଛି ।
