ନୟାଗଡ଼: (ବାଘୁଆବାର୍ତ୍ତା): ନୟାଗଡ଼ ଜଗନ୍ନାଥ ମନ୍ଦିରରୁ ଲୁଟ ପରେ ପୁରୁଣା ସହର ଗୋପୀନାଥ ମନ୍ଦିରରୁ ଗତକାଲି ରାତିରେ ଚୋରୀ ହୋଇଛି। ଜଣେ ଦୃର୍ବୁତ୍ତ ମୁଖା ପିନ୍ଧି ରାତି ୨ ଟା ସମୟରେ ମନ୍ଦିରରେ ପଶିଥିଲା। ହାତରେ ଲୁହା ରଡ ଧରିଥିଲା। ସିସିଟିଭି ଫୁଟେଜରୁ ଦୃର୍ବୁତ୍ତ ମନ୍ଦିରରେ ପଶିବା ଦେଖା ଯାଇଛି। ଗୋପୀନାଥ ଜୀଉଙ୍କ ନାକ ବସଣି, ଚିତା ଏବଂ ପୂଜକଙ୍କ ବାକ୍ସରୁ କିଛି ଟଙ୍କା ମଧ୍ୟ ଚୋରୀ ହୋଇଛି। ମନ୍ଦିର ତାଲା ଭାଙ୍ଗି ଦୃର୍ବୁତ୍ତ ଭିତରେ ପଶି ଠାକୁରଙ୍କ ସିଂହାସନ ଉପରେ ଚଢ଼ିଛି। ଠାକୁର ପିନ୍ଧିଥିବା ଅଳଙ୍କାର ଲୁଟ ହୋଇଛି। ଆଜି ସକାଳୁ ମନ୍ଦିର ପୂଜକ ପରମାନନ୍ଦ ଦାଶ ନୀତି କରିବାକୁ ଆସିବା ପରେ ଘଟଣା ସାମ୍ନାକୁ ଆସିଥିଲା। ଖବରପାଇ ଏସଡିପିଓ ଜ୍ୟୋତି ରଞ୍ଜନ ସାମନ୍ତରାୟ, ଟାଉନଥାନା ଅଧିକାରୀ ରଶ୍ମି ରଞ୍ଜନ ମହାପାତ୍ର ସଦଳବଳେ ମନ୍ଦିରରେ ପହଞ୍ଚି ଛାନଭିନ କରିଛନ୍ତି। ଦୃର୍ବୁତ୍ତ ପ୍ରଥମେ ଦକ୍ଷିଣକାଳି ମନ୍ଦିରରେ ପଶିବାକୁ ଚେଷ୍ଟା କରିଛି। ବିଫଳ ହେବା ପରେ ଗୋପୀନାଥ ମନ୍ଦିରରୁ ଲୁଟ କରିଛି। ନୟାଗଡ଼ ଜିଲ୍ଲାରେ ବାରମ୍ବାର ମନ୍ଦିରରୁ ଚୋରୀ ହୋଇଛି। ବଡ଼ପଣ୍ଡୁସର ଉଗ୍ରେସ୍ୱର ମନ୍ଦିର, ଓଡ଼ଗାଁ ଦୂତିକେଶ୍ୱର ମନ୍ଦିର, ନୟାଗଡ଼ ଜଗନ୍ନାଥ ମନ୍ଦିର ପରେ ଆଜି ଚତୁର୍ଥ ପର୍ଯ୍ୟାୟରେ ଗୋପୀନାଥ ମନ୍ଦିରରୁ ଲୁଟ ହୋଇଛି।
