ବିଷ କ୍ରିୟା ଯୋଗୁଁ ଦମ୍ପତ୍ତି ମୃତ ଘଟଣା, ଗ୍ରାମବାସୀ ଦ୍ୱାରା ୩ ଅଟକ

ନୟାଗଡ଼,(ବାଘୁଆବାର୍ତ୍ତା) : ଗତ କିଛିଦିନ ତଳେ ଖଣ୍ଡପଡ଼ା ବ୍ଳକ ଅଧିନ ବୋଦସା ପଂଚାୟତର ଗୋଲା ବୋଦସା ଗ୍ରାମରେ ବିଷାକ୍ତ ଖାଦ୍ୟ ଖାଇ ପତି-ପତ୍ନୀଙ୍କର ଅକାଳ ମୃତ୍ୟୁ ହେବା ଘଟଣା ଆଜି ଭିନ୍ନ ମୋଡ଼ ନେଇଛି । ଏହି ଘଟଣାରେ ସଂପୃକ୍ତି ଥିବା ସନ୍ଦେହରେ ଗ୍ରାମବାସୀ ୩ ଜଣଙ୍କୁ ଅଟକ ରଖିଛନ୍ତି । ଏହି ତିନିଜଣ ହେଲେ ମୃତ ମହିଳାଙ୍କ ଯାଆ ନର୍ମଦା ସ୍ୱାଇଁ, ଏବଂ ନର୍ମଦାଙ୍କ ଭିଣୋଇ ତଥା ଅବସରପ୍ରାପ୍ତ ଶିକ୍ଷକ ହରିହର ପ୍ରଧାନ, ହରିହରଙ୍କ ପôତୀ ସୁକାନ୍ତି ପ୍ରଧାନ । ଜାଗାବାଡ଼ିକୁ କେନ୍ଦ୍ର କରି ଖାଦ୍ୟରେ ବିଷ ଦେଇ ଏମାନେ ବୃଦ୍ଧ ଦମ୍ପତ୍ତିକୁ ହତ୍ୟା କରିଥିବା ଅଭିଯୋଗ ହୋଇଛି । ସୂଚନାନୁସାରେ, ଗୋଲାବୋଦସା ଗ୍ରାମର ଭାଗିରଥି ସ୍ୱାଇଁ (୬୦ ବର୍ଷ)ଙ୍କ ଘରେ ରଜ ସଂକ୍ରାନ୍ତି ଅବସରରେ ସୁସ୍ୱାଦୁ ଖାଦ୍ୟପେୟର ବନ୍ଦୋବସ୍ତ କରାଯାଇଥିଲା । ମଧ୍ୟାହ୍ନ ଭୋଜନ ଖାଇସାରିବା ପରେ ଭାଗିରଥି ଓ ତାଙ୍କ ପତ୍ନୀ କୈାଶଲ୍ୟା ସ୍ୱାଇଁ(୫୪)ହଠାତ୍ ଅସୁସ୍ଥ ହୋଇ ପଡ଼ିଥିଲେ । ଭାଗିରଥିଙ୍କ ୨ପୁଅ ବାହାରେ ରହୁଥିବା ବେଳେ ସ୍ଥାନୀୟ ବାସିନ୍ଦା ଊଭୟ ପତି-ପତ୍ନୀଙ୍କୁ ଆଶୁ ଚିକିତ୍ସା ନିମନ୍ତେ ପ୍ରଥମେ ଖଣ୍ଡପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତୀ କରିଥିଲେ । ମାତ୍ର ଡ଼ାକ୍ତରଙ୍କ ପରାମର୍ଶକ୍ରମେ ସେମାନଙ୍କୁ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣା ଯାଇଥିଲା । ସେଠାରେ ସ୍ୱାସ୍ଥ୍ୟ ଅବସ୍ଥାରେ ଅବନତି ଦେଖାଦେବାରୁ ୧୦୮ ଆମ୍ବୁଲାନ୍ସ ଯୋଗେ ଉଭୟଙ୍କୁ ଭୁବନେଶ୍ୱର ୬ନଂ ସ୍ଥିତ କ୍ୟାପିଟାଲ ହସପିଟାଲକୁ ନିଆ ଯାଇଥିଲା । ସେଠାରେ ଚିକିତ୍ସିତ ହେଉଥିବା ଅବସ୍ଥାରେ କୈାଶଲ୍ୟାଙ୍କର ସୋମବାର ସନ୍ଧ୍ୟା ୮ଟାରେ ମୃତ୍ୟୁ ହୋଇଥିବା ବେଳେ ଭାଗିରଥିଙ୍କୁ କଟକ ବଡ଼ ଡ଼ାକ୍ତରଖାନାକୁ ସ୍ଥାନାନ୍ତର କରାଯାଇଥିବା ବେଳେ ବାଟରେ ତାଙ୍କର ମୃତ୍ୟୁ ହୋଇଥିଲା । ଏହି ଘଟଣା ସନ୍ଦେହ ଜନକ ପରିସ୍ଥିତି ସୃଷ୍ଟି କରିଥିବା ବେଳେ ଗୋଲାବୋଦସା ଗ୍ରାମବାସୀ ଆଜି ତିନିଜଣଙ୍କୁ ଅଟକ ରଖି ପୁଲିସକୁ ହସ୍ତାନ୍ତର କରିଥିବା କହୁଥିବା ବେଳେ ଖଣ୍ଡପଡ଼ା ଥାନା ଅଧିକାରୀ ବିମଳ ମଲ୍ଲିକ ଘଟଣାକୁ ଅଶ୍ୱୀକାର କରିଛନ୍ତି । ଗ୍ରାମବାସୀ କିଛି ଲୋକଙ୍କ ନାମରେ ଅଭିଯୋଗ କରୁଛନ୍ତି, ମାତ୍ର ଏଯାଏଁ ଏତଲା ଦେଇ ନାହାନ୍ତି ବୋଲି ସୂଚନା ଦେଇଛନ୍ତି । ଅନ୍ୟପକ୍ଷେ, ପୁଲିକୁ ଗ୍ରାମବାସୀ କାହାକୁ ହସ୍ତାନ୍ତର କରି ନାହାନ୍ତି ବୋଲି କହିଛନ୍ତି ।