ଭୁବନେଶ୍ୱର (ବାଘୁଆବାର୍ତ୍ତା): ଦେଶରେ ଅକ୍ସିଜେନ ଅଭାବର ଆଉ ଏକ ଦୁଃଖଦ ଘଟଣା । ଗୋଆର ସବୁଠାରୁ ବଡ଼ କୋଭିଡ ହସ୍ପିଟାଲରେ ଗତ ୪ ଦିନରେ ୭୪ ଜଣଙ୍କ ମୃତ୍ୟୁ ହୋଇଛି । ଅମ୍ଳଜାନ ଅଭାବରୁ ‘ଗୋଆ ମେଡିକାଲ କଲେଜ ଆଣ୍ଡ ହସ୍ପିଟାଲ’ ରେ ୭୪ ଜଣ ରୋଗୀଙ୍କର ମୃତ୍ୟୁ ହୋଇଥିବା ଜଣା ପଡିଛି । ଗତରାତିରୁ ୨ଟାରୁ ଆଜି ସକାଳ ୬ଟା ମଧ୍ୟରେ ୧୩ଜଣ ରୋଗୀ ପ୍ରାଣ ହରାଇଥିବା ବେଳେ ଗୁରୁବାର ବଡି ଭୋର ସୁଦ୍ଧା ଅନ୍ୟ ୧୫ ଜଣଙ୍କର ମୃତ୍ୟୁ ହୋଇଯାଇଥିଲା । ସେହିପରି, ମଙ୍ଗଳବାର ଦିନ ୨୬ ଜଣ ଏବଂ ବୁଧବାର ଦିନ ୨୦ ଜଣ ବ୍ୟକ୍ତି ମୃତ୍ୟୁମୁଖରେ ପଡିଥିଲେ । ଏ ସପ୍ତାହର ପ୍ରାରମ୍ଭରେ ଡାକ୍ତରଖାନା ପରିଦର୍ଶନରେ ଯାଇଥିବା ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାସ୍ୱନ୍ତ କହିଛନ୍ତି, ସମ୍ଭବତଃ, ଡାକ୍ତରୀ ଅମ୍ଳଜାନ ଉପଲବ୍ଧତା ଏବଂ ଯୋଗାଣ କାରଣରୁ ଏଭଳି ସମସ୍ୟା ସୃଷ୍ଟି ହୋଇଛି । ରାଜ୍ୟରେ ଅକ୍ସିଜେନ ଅଭାବ ନାହିଁ ବୋଲି ସେ ଗୁରୁତ୍ୱାରୋପ କରି କହିଛନ୍ତି । ମୁଖ୍ୟମନ୍ତ୍ରୀ ସାୱନ୍ତଙ୍କ ଦୃଢ଼ୋକ୍ତି କେନ୍ଦ୍ର ସରକାରଙ୍କୁ ମଙ୍ଗଳବାର ଦିନ ଗୋଆର ପ୍ରମୁଖ ସଚିବ ପିକେ ଗୋଏଲ କେନ୍ଦ୍ର ସରକାରଙ୍କୁ ଲେଖିଥିବା ପତ୍ରର ବିରୁଦ୍ଧାଚରଣ କରୁଛି । ଉକ୍ତ ପତ୍ରରେ ପ୍ରମୁଖ ସଚିବ ଗୋଏଲ ଲେଖିଥିଲେ ଯେ, ମେ ୧ରୁ୧୦ ତାରିଖ ମଧ୍ୟରେ ମହାରାଷ୍ଟ୍ରର କୋହ୍ଲାପୁରରୁ ଆବଣ୍ଟିତ ହୋଇଥିବା ୧୧୦ ମେଟ୍ରିକଟନ ଅମ୍ଳଜାନରୁ ରାଜ୍ୟ ମାତ୍ର ୬୬.୭୪ ମେଟ୍ରିକ ଟନ ପାଇଛି । ଏଭଳି ସଙ୍କଟକ୍ଷଣରେ କୋହ୍ଲାପୁର ସମୁଦାୟ ମେଡିକାଲ ଅକ୍ସିଜେନର ମାତ୍ର ୪୦% ଗୋଆକୁ ପଠାଇଛି । ଅନ୍ୟୁନ ଗୋଟିଏ ସପ୍ତାହ ପାଇଁ ୧୧ ମେଟ୍ରିକ ଟନ ପରିବର୍ତ୍ତେ ଦୈନିକ ୨୨ ମେଟ୍ରିକ ଟନ ଡାକ୍ତରୀ ଅମ୍ଳଜାନ ଦିଆଯିବା ଉଚିତ ବୋଲି ବିଜେପି ଶାସିତ ଗୋଆ କେନ୍ଦ୍ର ସରକାରଙ୍କୁ ଆକୁଳ ନିବେଦନ କରିଛି । ତେଣେ, ଗୋଆ ମେଡିକାଲ କଲେଜ ଓ ହସ୍ପିଟାଲ ରୋଗୀପୂର୍ଣ୍ଣ ହୋଇଯାଇଥିବାରୁ ନୂଆ ରୋଗୀଙ୍କ ପାଇଁ ସେଠାରେ ଆଉ ସ୍ଥାନ ନାହିଁ । ଶେଷ ଥର ପାଇଁ ଯେଉଁ କେତେଜଣ ରୋଗୀ ଭର୍ତ୍ତି ହୋଇଥିଲେ ସେମାନଙ୍କୁ ଶଯ୍ୟା ପରିବର୍ତ୍ତେ ଚଟାଣରେ ଶୁଆଇ ଦିଆଯାଇଛି ।
