ନୂଆଦିଲ୍ଲୀ (ବାଘୁଆବାର୍ତ୍ତା) କରୋନା ମହାମାରୀ ଦ୍ୱିତୀୟ ଲହର ଭାରତରେ ସବୁଠାରେ ଅଧିକ ପ୍ରଭାବ ପକାଇଛି । ଗାଁରେ ମଧ୍ୟ ଏବେ ଲୋକମାନେ କରୋନା ସଂକ୍ରମିତ ହେଉଛନ୍ତି । ଏହି କାରଣରୁ ବହୁ ଅସହାୟ ଲୋକ ଭାଇରସରୁ ରକ୍ଷା ପାଇବା ପାଇଁ ବିଭିନ୍ନ ପ୍ରକାର ଉପାୟକୁ ଗ୍ରହଣ କରୁଛନ୍ତି । ତେବେ ଡାକ୍ତରମାନେ ଲଗାତାର ଭାବରେ ଏହି ଉପାୟଠାରୁ ଦୂରେଇ ରହିବାକୁ ପରାମର୍ଶ ଦେଉଛନ୍ତି । ଗୁଜୁରାଟର କିଛି ଲୋକ ଗୋଶାଳାକୁ ଯାଇ ନିଜ ଶରୀରରେ ଗୋବର ଓ ଗୋମୁତ୍ର ଲଗାଉଚନ୍ତି । ଏହି ଲୋକଙ୍କ ମତରେ ଏହାଦ୍ୱାରା କରୋନା ସହ ଲଢ଼ିବା ପାଇଁ ଇମ୍ୟୁନିଟି ମଜବୁତ ହୋଇପାରିବ ଓ କରୋନା ହେବା ସ୍ଥିତିରେ ଏହି ବିପଦଜନକ ଭାଇରସଠାରୁ ନିଜକୁ ରକ୍ଷା କରିପାରିବେ । ଏକ ଫାର୍ମା କମ୍ପାନୀର ଆସୋସିଏସ ମ୍ୟାନେଜର ଗୌତମ ମଣିଲାଲ ବୋରିସା କହିଛନ୍ତି, ଗୋଶାଳାକୁ ବହୁ ଡାକ୍ତର ମଧ୍ୟ ଆସୁଛନ୍ତି । ତାଙ୍କ ମତରେ ଗାଈର ଗୋବର ଓ ମୁତ୍ରରୁ ଇମ୍ୟୁନିଟି ଭଲ ହୁଏ । ଏହାପରେ ସେମାନେ କରୋନା ରୋଗୀଙ୍କ ଚିକିତ୍ସା ବିନା ଭୟରେ କରିଥାନ୍ତି । ଗୌତମ ଏହା ମଧ୍ୟ କହିଛନ୍ତି ଯେ, ଗତ ବର୍ଷ ସେ କରୋନା ପଜିଟିଭ ହୋଇଥିଲେ, କିନ୍ତୁ ଏହି ପ୍ରଣାଳୀରେ ସେ ଏଭଳି ବିପଦ ଜନକ ଭାଇରସକୁ ହରାଇ ପାରିଥିଲେ । ଏହି ଲୋକମାନେ ଗୋଶାଳା ଯାଇ ଗୋବର ଓ ଗୋମୁତ୍ର ଲଗାଇ ଏହାପରେ ଯୋଗ କରିଥାନ୍ତି । ତେବେ ଭାରତର ବହୁ ଡାକ୍ତର ଓ ବୈଜ୍ଞାନିକମାନେ ଲଗାତାର କରୋନାର ମନଗଢ଼ା ଚିକିତ୍ସା ପଦ୍ଧତିକୁ ନେଇ ଚେତାବନୀ ଜାରି କରିଛନ୍ତି । ଏହି ଡାକ୍ତରଙ୍କ କହିବା ଅନୁସାରେ, ଏଭଳି କରିବା ଦ୍ୱାରା ଲୋକଙ୍କର ସ୍ଥିତି ଅଧିକ ଜଟିଳ ହୋଇପାରେ । ଏହି ମାମଲାରେ ଇଣ୍ଡିଆନ ମେଡିକାଲ ଆସୋସିଏସନର ନ୍ୟାସନାଲ ପ୍ରେସିଡେଣ୍ଟ ଡାକ୍ତର ଜେଏ ଜୟଲାଲ କହିଛନ୍ତି, ଏହି କଥାର କୌଣସି ବିଜ୍ଞାନ ସମ୍ମତ ପ୍ରମାଣ ନାହିଁ ଯେ ଗୋବର ଓ ଗୋମୁତ୍ରରୁ ଇମ୍ୟୁନିଟି ଶକ୍ତି ବଢ଼ିଥାଏ । ଗୋବର ଖାଇବା କିମ୍ବା ଲଗାଇବା ଦ୍ୱାରା କରୋନା ସଂକ୍ରମଣ ବିପଦ ବଢ଼ିଯାଏ । କାରଣ ଗୋମୁତ୍ର ଓ ଗୋବରର ଥେରୋପି ନେବା ପାଇଁ ବହୁଚ ଲୋକ ଗୋଟିଏ ସ୍ଥାନରେ ଗହଳି କରିଥାନ୍ତି ଫଳରେ ସାମାଜିକ ଦୂରତ୍ୱ ନରହିବା କାରଣରୁ ସ୍ଥିତି ଆହୁରି ବିଗିଡିପାରେ । କେବଳ ସେତିକି ନୁହେଁ ଗୋବର ଲଗାଇବା ଦ୍ୱାରା ମଣିଷ ଶରୀରରେ ଅନ୍ୟ ରୋଗ ହୋଇପାରେ ବୋଲି ଡାକ୍ତର ଜେଏଲ ଜୟଲାଲ କହିଛନ୍ତି ।
