ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଟାଉନଥାନା ଅନ୍ତର୍ଗତ ପିଡବ୍ଲ୍ୟୁଡି ବଙ୍ଗଳଠାରୁ ଆଜି ପୁଲିସ ୩୯ କେଜି ୮ ଶହ ଗ୍ରାମ ଗଞ୍ଜେଇ ଏବଂ ଏକ କାରକୁ ଜବତ କରିବା ସହ ୩ ଜଣଙ୍କୁ ଧରିଥିବା ଜଣାଯାଇଛି । ସୂଚନାନୁସାରେ, ଆଜି ଟାଉନଥାନା ପୁଲିସ ଖମାରିସାହି ନିକଟରେ ପ୍ରେଟୋଲିଂ କରୁଥିବା ବେଳେ ଏକ ସାଣ୍ଟ୍ରୋକାର ବେପରୁଆ ଭାବେ ଆସୁଥିବାରୁ ପ୍ରେଟୋଲିଂ ଟିମ୍ ଥାନାକୁ ଖବର ଦେଇଥିଲେ । ଫଳରେ ଏହି କାରକୁ ଧରିବାକୁ ଟାଉନଥାନା ଏସ୍ଆଇ ଧର୍ମେନ୍ଦ୍ର ଶିଆଳ ଡାକବଙ୍ଗଳାଠାରେ ତାଙ୍କ ଟିମ୍ ସହ ପ୍ରସ୍ତୁତ ହୋଇ ରହିଥିଲେ । ସେ କାର ଅଟକାଇବା ବେଳକୁ ଗାଡ଼ି ଚାଲୁଥିବା ଅବସ୍ଥାରେ ତିନିଜଣ ବ୍ୟକ୍ତି ସେଥିରୁ ଦୈାଡ଼ି ପଳାଇବାକୁ ଚେଷ୍ଟା କରିଥିଲେ । ଫଳରେ ପଛରୁ ପିଛା କରୁଥିବା ଏସ୍ଆଇ ସ୍ମୃତିରଂଜନ ମହାନ୍ତିଙ୍କ ଟିମ୍ ଗଞ୍ଜେଇ ଚାଲାଣକାରୀମାନଙ୍କୁ କାବୁ କରି ନେଇଥିବା ସୂଚନା ମିଳିଛି । ଏହି ୩ ଜଣ ବ୍ୟକ୍ତି କନ୍ଧମାଳ ଜିଲ୍ଲାର ଏବଂ ସେମାନେ କନ୍ଧମାଳରୁ ଭୂବନେଶ୍ୱର ଗଞ୍ଜେଇ ଚାଲାଣ କରୁଥିବା ଥାନା ଅଧିକାରୀ ଜୟଦୀପ ମହାନ୍ତି ସୂଚନା ଦେଇଛନ୍ତି । ଆସନ୍ତାକାଲି ପଚରାଉଚରା ପରେ ସମସ୍ତ ତଥ୍ୟ ଜଣାପଡ଼ିବ ବୋଲି ଥାନା ଅଧିକାରୀ କହିଛନ୍ତି ।
