ବୌଦ୍ଧ, (ବାଘୁଆବାର୍ତ୍ତା): ଗାଡ଼ି ଛାଡ଼ି ମାଫିଆ ଫେରାର । ଅପରେସନ ଗ୍ରୀନ୍ କ୍ଲିନ୍ ମାଧ୍ୟମରେ ଗଞ୍ଜେଇ ଧରିବାରେ ବୌଦ୍ଧ ପୋଲିସକୁ ମିଳିଛି ସଫଳତା । ମାଫିଆ ଫେରାର ହୋଇଯାଇଥିବା ବେଳେ ଗାଡିରେ ଥିବା ସମସ୍ତ ଗଞ୍ଜେଇକୁ ଜବତ କରିଛି ପୋଲିସ । ଖବର ଅନୁଯାୟୀ, ବୌଦ୍ଧ ବଘିଆପଡ଼ା ଫାଣ୍ଡି ପନ୍ଥେଇ ଛକ ନିକଟରେ ବାହାର ରାଜ୍ୟକୁ ଗଞ୍ଜେଇ ଚାଲାଣ ଲାଗି ଗଚ୍ଛିତ କରି ରଖାଯାଇଥିଲା । କୌଣସି ସୁତ୍ରରୁ ଖବର ପାଇ ଥାନା ଅଧିକାରୀ ରଞ୍ଜିତ ମୁନିଙ୍କ ନେତୃତ୍ୱରେ ଏକ ଟିମ୍ ଗଠନ କରାଯାଇ ଉକ୍ତ ସ୍ଥାନରେ ଚଢାଉ କରାଯାଇଥିଲା । ତେବେ ଚଢାଉ ଲାଗି ପୋଲିସ ଆସୁଥିବା ଦେଖି ମାଫିଆମାନେ ଘଟଣାସ୍ଥଳରେ ଗାଡ଼ି ଛାଡି ଫେରାର ମାରିଥିଲେ । ପୋଲିସ ସେମାନଙ୍କୁ ଧରିବା ପାଇଁ ଚେଷ୍ଟା କରିଥିଲେ ମଧ୍ୟ ସଫଳ ହୋଇନଥିଲା । ଶେଷରେ ମାଫିଆ ଛାଡିଯାଇଥିବା ୨ ହଜାର ୭୨୦ କେଜି ଗଞ୍ଜେଇକୁ ଜବତ କରିଛି ପୋଲିସ । ଯାହାର ମୂଲ୍ୟ ୨ କୋଟି ୭୦ ଲକ୍ଷ ବୋଲି ଅନୁମାନ କରାଯାଉଛି । ତେବେ ଗତ କିଛି ଦିନ ହେବ ବୌଦ୍ଧ ପୋଲିସ ଜିଲ୍ଲାର ବିଭିନ୍ନ ସ୍ଥାନରେ ଚଢାଉ ଜାରି ରଖିଛି । ଅପରେସନ ଗ୍ରୀନ୍ କ୍ଲିନ୍ ଜରିଆରେ ଲକ୍ଷାଧିକ ଟଙ୍କାର ସମ୍ପତ୍ତି ଜବତ କରୁଛି । ହେଲେ ମାଫିଆଙ୍କୁ ଧରିବାରେ ସଫଳ ହେଉନାହିଁ ପୋଲିସ । ଯାହାକି ପୋଲିସର କାର୍ଯ୍ୟସୂଚୀ ଉପରେ ପ୍ରଶ୍ନ ଉଠାଇଛି ।
