ବଡ଼ ଧରଣର ଗଞ୍ଜେଇ ଚୋରା ଚାଲାଣ ପଣ୍ଡ କଲା ଅବକାରୀ ବିଭାଗ; ଦୁଇ ଗିରଫ

ବାଲେଶ୍ୱର, (ବାଘୁଆବାର୍ତ୍ତା): ବଡ଼ ଧରଣର ଗଞ୍ଜେଇ ଚୋରା ଚାଲାଣକୁ ଜିଲ୍ଲା ଅବକାରୀ ବିଭାଗ ପଣ୍ଡ କରିଛି। ଚୋରା ଗଞ୍ଜେଇ ବ୍ୟବସାୟୀ କୋଲକାତା ପଠାଉଥବା ବେଳେ ବିଭାଗ ଏଭଳି ଏକ ଯୋଜନାକୁ ପଣ୍ଡକରିଛି । ଓଡ଼ିଶାରୁ କୋଲକାତା ଯାଏ ଲମ୍ବିଥିବା ଲିଙ୍କ ଠାବ କରିଛି। ଏଥିରେ ସମ୍ପୃକ୍ତ ଦୁଇ ଅଭିଯୁକ୍ତଙ୍କୁ ଗିରଫ କରିବା ସହ ୨କୁଇଣ୍ଟାଲ୍ ୮କେଜି ଗଞ୍ଜେଇ ଭର୍ତ୍ତି ଟ୍ରକକୁ ଜବତ କରିଛି। ଜବତ ଗଞ୍ଜେଇର ବଜାର ମୂଲ୍ୟ ପାକାପାଖି ୧୫ଲକ୍ଷ ଟଙ୍କା ହେବ ବୋଲି ଅନୁମାନ କରାଯାଉଛି। ଗିରଫ ଦ୍ୱୟ ହେଲେ ଅନୁଗୁଳ ଜିଲ୍ଲା ଆଠମଲ୍ଲିକ୍ ଥାନା ଅଧିନରେ ଥିବା ଶ୍ରୀଧରପୁର ଅଞ୍ଚଳର ନରେନ୍ଦ୍ର ଗହୀର(୩୯) ଓ କୁନା ବିଶ୍ୱାଳ (୩୫)। ସୂଚନାନୁସାରେ, ଚୋରା ଗଞ୍ଜେଇ ବ୍ୟବସାୟୀ ଦ୍ୱୟ ଅନୁଗୁଳରୁ ଗଞ୍ଜେଇ ନେଇ କୋଲକାତା ଯାଉଥିଲେ । ଯୋଜନା ମୁତାବକ ଗୁରୁବାର ଦିନ ସେଠାରେ ଜଣେ ବ୍ୟବସାୟୀଙ୍କୁ ଗଞ୍ଜେଇ ଦେବା ପରେ ମୋଟା ରକମର ଟଙ୍କା ହାତେଇ ଥାଆନ୍ତେ। ହେଲେ ଏକ ବିଶେଷ ସୂତ୍ରରୁ ଖବର ମିଳିବା ପରେ ଅବକାରୀ ଏସ୍ପି ସେଖ୍ ଆସଫ୍ ଅଲ୍ଲୀ ଚଢ଼ାଉ ପାଇଁ ନିର୍ଦେଶ ଦେଇଥିଲେ। ଏହାପରେ ଅବକାରୀ ବିଭାଗର ଏକ ୧୦ ଜଣିଆ ଟିମ୍ ସେରଗଡ଼ ଜାତୀୟ ରାଜପଥ ନିକଟ ଗୋଉଡ଼ୁଣି ପୋଖରୀ ଛକ ନିକଟରେ ଛକି ରହିଥିଲେ। ଆଜି ମଧ୍ୟାହ୍ନରେ ଟ୍ରକ ପହଞ୍ଚିବା ପରେ ବିଭାଗୀୟ କର୍ମଚାରୀ ଚାରିଆଡ଼ୁ ଘେରିଯାଇଥିଲେ। ଅଭିଯୁକ୍ତମାନେ ଖସିପଳାଇବାକୁ ଚେଷ୍ଟା କରିଥିଲେ ବି ଖସିପାରି ନଥିଲେ। ସେମାନଙ୍କୁ କାବୁ ପରେ ବିଭାଗୀୟ କାର୍ୟ୍ୟାଳୟକୁ ଆଣି ଜେରା କରାଯାଇଥିଲା। ଏନେଇ ଅବକାରୀ ବିଭାଗ ମାମଲା ରୁଜୁକରି ଦୁଇଜଣ ଚୋରା ଗଞ୍ଜେଇ ବ୍ୟବସାୟୀକୁ ଗିରଫ୍ କରିଥିବା ସୂଚନା ମିଳିଛି ।