ପାଟଣାଗଡ଼ (ବାଘୁଆବାର୍ତ୍ତା): ବଲାଙ୍ଗୀର ଅବକାରୀ ବିଭାଗର ମୋବାଇଲ ଟିମ ଦ୍ୱାରା ଆଜି ଭୋର ସକାଳୁ ଏକ ଗଂଜେଇ ଗାଡ଼ି ଜବତ କରାଯାଇଥିବା ବେଳେ ଚାଳକକୁ ଗିରଫ କରାଯାଇଛି । ସୂଚନା ଅନୁଯାୟୀ ଆଜି ଭୋର ସକାଳୁ ବିଶେଷ ସୂତ୍ରରୁ ଖବର ପାଇ ବଲାଙ୍ଗିର ଅବକାରୀ ବିଭାଗର ମୋବାଇଲ ଟିମ ପାଟଣାଗଡ଼ ପଦ୍ମପୁର ରାସ୍ତାର ରମ୍ଭା ଥାନା ଅନ୍ତର୍ଗତ ଝରନିପାନି ଗ୍ରାମ ନିକଟରେ ଅଟକିଥିବା ବେଳେ ଏକ ଡିଜାୟାର କାର ନଂ-ଓଡି.୦୩.କ୍ୟୁ.୮୮୧୮ ରେ ପଦ୍ମପୁର ପଟୁ ପାଟଣାଗଡ଼ ପଟକୁ ଆସୁଥିବା ବେଳେ ତାକୁ ଅଟକାଇଥିଲେ । ଡ୍ରାଇଭର ଜଣକ ଅବକାରୀ ବିଭାଗକୁ ଦେଖି କିରାବାହାଲ ରାସ୍ତାରେ ଦୃତ ଗତିରେ ପଳାଇଥିଲା । ତେବେ ଅବକାରୀ ଟିମ ପଛରୁ ପିଛା କରୁଥିବା ବେଳେ କିରାବାହାଲ ଗ୍ରାମର କିଛି ଲୋକ ଗାଡିକୁ ଅଟକାଇଥିଲେ । ଅବକାରୀ ଟିମ ସେଠାରୁ ଡ୍ରାଇଭର ତରଣି ବାଗକୁ ଗିରଫ କରି ଗାଡିରୁ ୧୮ କେଜି ଗଂଜେଇ ଜବତ କରିଥିଲେ । ତରଣୀ ବାଗଙ୍କ କହିବାନୁଯାୟୀ ଲରମ୍ଭା ଥାନା ଅନ୍ତର୍ଗତ ଗଉଡପାଲି ଗ୍ରାମରୁ ପାଟଣାଗଡ଼ ଥାନା ଅନ୍ତର୍ଗତ ଝୁଲେନବର ଗ୍ରାମକୁ ସେ ଗଂଜେଇ ଆଣୁଥିଲେ । ଆଜି ଅପରାହ୍ନ ୪ ଘଣ୍ଟା ସମୟରେ ଅଭିଯୁକ୍ତ ତରଣୀ ବାଗକୁ ପାଟଣାଗଡ଼ କୋର୍ଟକୁ ନିଆଯାଇଥିଲା ସେଠାରେ ଜାମିନ ନାମଞ୍ଜୁର ହେବାରୁ ତାକୁ ପାଟଣାଗଡ଼ ଜେଲକୁ ପଠାଯାଇଛି । ଏହି ଚଢ଼ାଉରେ ଅବକାରୀ ଉପଅଧିକ୍ଷକ ଅରୁଣ କୁମାର ଯୋଷୀ, ଏ.ଏସ.ଆଇ. ଜି.କୁମ୍ଭାର, ହାବିଲଦାର ଜେ ମଲ୍ଲିକ, ଆର.ଷଡଙ୍ଗୀ ଏବଂ ଟି.ନାଗ ପ୍ରମୁଖ ଉପସ୍ଥିତ ଥିଲେ ।
