ସର୍ବଭାରତୀୟ ଫୁଟବଲ ଟୁର୍ଣ୍ଣାମେଣ୍ଟ ପ୍ରସ୍ତୁତି
ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଖେଳପଡିଆରେ ସର୍ବଭାରତୀୟ ଫୁଟବଲ ଟୁର୍ଣ୍ଣାମେଣ୍ଟ ନୟାଗଡ଼ କପ ୨୦୨୫ ପାଇଁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଜାନୁୟାରୀ ୧୪ରୁ ୧୯ ତାରିଖ ମଧ୍ୟରେ ନୟାଗଡ଼ କପ୍ ଅନୁଷ୍ଠିତ ହେବ ବୋଲି ସୂଚନା ଦିଆଯାଇଛି। ଏହି ପ୍ରସ୍ତୁତି ବୈଠକରେ ନୟାଗଡ଼ ବିଧାୟକ ଡ. ଅରୁଣ କୁମାର ସାହୁ, ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ରଣପୁର ପୂର୍ବତନ ବିଧାୟକ ସତ୍ୟ ନାରାୟଣ ପ୍ରଧାନ, ଜିଲ୍ଲା ପରିଷଦ ଅଧ୍ୟକ୍ଷ ଦେବାଶିଷ ପଟ୍ଟନାୟକ, ବିଜେଡି ନେତ୍ରୀ ଇରାନୀ ରାୟ, ଜିଲ୍ଲା କଂଗ୍ରେସ ସଭାପତି ରଣଜିତ୍ ଦାଶ, ପୌର ପରିଷଦ ଅଧ୍ୟକ୍ଷା ନିରୁପମା ଖଟେଇ, ବ୍ଲକ ଅଧ୍ୟକ୍ଷ କିଶୋର ଚନ୍ଦ୍ର ସାହୁ, ଦଶପଲ୍ଲା ଏନଏସି ଅଧ୍ୟକ୍ଷା ପୁନମ୍ ପ୍ରିୟଦର୍ଶିନୀ, ଓଡ଼ିଶା ସାହିତ୍ୟ ଏକାଡେମୀ ସଦସ୍ୟ ଅଶୋକ କୁମାର ନାୟକ, ସଭାପତି ଶେଖ୍ ୟୁସୁଫ ପ୍ରମୁଖ ଉପସ୍ଥିତ ରହିଥିଲେ।
ଫୁଟବଲ ମ୍ୟାଚ ପାଇଁ ରାଜ୍ୟ ଓ ରାଜ୍ୟ ବାହାରୁ ୬ ଟିମ୍ ଚୟନ କରାଯାଇଥିବା ଆୟୋଜକ ସୂଚନା ଦେଇଥିଲେ। ୧୪ ତାରିଖରେ ସାଇହାଲ୍ ସୁନାବେଢ଼ା, ମଙ୍ଗଳା କ୍ଲବ କଟକ ମଧ୍ୟରୁ ବିଜୟୀ ଦଳ ୧୬ ତାରିଖରେ ଜେବିଏମ୍ ୟୁନାଇଟେଡ୍ ଏଫସି ମଣିପୁର ସହ ଖେଳିବ । ସେହିଭଳି ଭାବେ ୧୫ ତାରିଖରେ ସମ୍ବଲପୁର ଫୁଟବଲ ଏକାଡେମୀ ଓ ଭୁବନେଶ୍ୱର ୟୁନାଇଟେଡ୍ କ୍ଲବ ମଧ୍ୟରେ ମ୍ୟାଚ ଅନୁଷ୍ଠିତ ହୋଇ ବିଜୟୀ ଦଳ ୧୭ ତାରିଖରେ କୋଲକାତା ଉତ୍ତର ପଲ୍ଲୀ ମିଳନ ସଂଘ ମଧ୍ୟରେ ମୁକାବିଲା ହେବ । ୧୬ ଓ ୧୭ ତାରିଖ ମ୍ୟାଚର ବିଜୟୀ ଦଳକୁ ନେଇ ୧୯ ତାରିଖ ଫାଇନାଲ ମ୍ୟାଚ ଅନୁଷ୍ଠିତ ହେବ । ୧୮ ତାରିଖ ଚାରି ନିର୍ବାଚନ ମଣ୍ଡଳୀକୁ ନେଇ ବନ୍ଧୁତ୍ୱପୂର୍ଣ୍ଣ ମ୍ୟାଚ ଅନୁଷ୍ଠିତ ହୋଇଥିଲା। ଏହି ଟୁର୍ଣ୍ଣାମେଣ୍ଟକୁ ପୂର୍ବ ଭଳି ଆର୍କସନୀୟ କରିବାକୁ ଆଲୋଚନା ହୋଇଥିଲା। ନୟାଗଡ଼ କପ୍ ରାଜ୍ୟରେ ସ୍ଵତନ୍ତ୍ର ବୋଲି ଅତିଥିମାନେ ମତ ରଖିଥିଲେ।
