ଭୁବନେଶ୍ୱର, (ବାଘୁଆବାର୍ତ୍ତା): ଓଡ଼ିଶା ଫୁଟବଲ୍ପ୍ରେମୀଙ୍କ ପାଇଁ ଖୁସି ଖବର । ଗତ ଜୁନରେ ପ୍ରଥମ ଅନ୍ତର୍ଜାତୀୟ ଫୁଟବଲ୍ ଟୁର୍ଣ୍ଣାମେଣ୍ଟ ‘କଣ୍ଟିନେଣ୍ଟାଲ୍ କପ୍’ର ସଫଳ ଆୟୋଜନ ପରେ ଓଡ଼ିଶା ଆଗାମୀ ୨୦୨୬ ଫିଫା ବିଶ୍ୱକପ୍ ଓ ୨୦୨୭ ଏଫ୍ସି ଏସିଆନ୍ କପ୍ ଯୋଗ୍ୟତା ପର୍ୟ୍ୟାୟ (ରାଉଣ୍ଡ-୨)ର ଏକ ମ୍ୟାଚ୍ ଆୟୋଜନ କରିବାକୁ ଯାଉଛି । ଆସନ୍ତା ନଭେମ୍ବର ୨୧ ତାରିଖରେ ଏହି ମ୍ୟାଚ୍ଟି କଳିଙ୍ଗ ଷ୍ଟାଡିୟମରେ ଖେଳାଯିବ । ଏହି ମ୍ୟାଚ୍ରେ ଭାରତ ଏଏଫ୍ସି ଏସିଆନ୍ କପ୍ ଚାମ୍ପିଅନ୍ କତାରକୁ ସାମ୍ନା କରିବ । ଆଜି ସର୍ବଭାରତୀୟ ଫୁଟବଲ୍ ସଂଘ (ଏଆଇଏଫ୍ଏଫ୍) ଏବିଷୟ ଘୋଷଣା କରିଛି । ଯୋଗ୍ୟତା ପର୍ୟ୍ୟାୟରେ ଭାରତ ମୋଟ ୨ଟି ମ୍ୟାଚ୍ ଘରୋଇ ଗ୍ରାଉଣ୍ଡରେ ଖେଳିବାର କାର୍ୟ୍ୟକ୍ରମ ରହିଛି । ଦ୍ୱିତୀୟ ମ୍ୟାଚ୍ଟି ଗୌହାଟୀରେ ଖେଳାଯିବ । ଯୋଗ୍ୟତା ପର୍ୟ୍ୟାୟ ରାଉଣ୍ଡ-୨ରେ ଭାରତ ଗ୍ରୁପ୍-ଏ’ରେ ସ୍ଥାନ ପାଇଛି । ଏହି ଗ୍ରୁପ୍ରେ ଅନ୍ୟ ଦଳ ଭାବେ କତାର, କୁଏତ୍ ଏବଂ ଆଫଗାନିସ୍ତାନ-ମଙ୍ଗୋଲିଆ ମ୍ୟାଚ୍ର ବିଜେତା ସ୍ଥାନ ପାଇଛନ୍ତି । ଆସନ୍ତା ନଭେମ୍ବର ୧୬ ତାରିଖରେ ଭାରତ ଘରୋଇ କୁଏତ୍ ବିପକ୍ଷରେ ଅଭିଯାନ ଆରମ୍ଭ କରିବ । ଏହାପରେ ଦଳ ଘରୋଇ ଗ୍ରାଉଣ୍ଡରେ କତାର ବିପକ୍ଷ ମ୍ୟାଚ୍ ଖେଳିବ । ପରବର୍ଷ ଭାରତ ଆଫଗାନିସ୍ତାନ କିମ୍ବା ମଙ୍ଗୋଲିଆ ବିପକ୍ଷରେ ୨ଟି ମ୍ୟାଚ୍ ଖେଳିବାର କାର୍ୟ୍ୟକ୍ରମ ରହିଛି । ୨୦୨୪, ମାର୍ଚ୍ଚ ୨୧ ତାରିଖ ବିଦେଶରେ ପ୍ରଥମ ମ୍ୟାଚ୍ ଏବଂ ମାର୍ଚ୍ଚ ୨୬ ତାରିଖ ଗୌହାଟୀର ଇନ୍ଦିରା ଗାନ୍ଧୀ ଷ୍ଟାଡିୟମରେ ଦ୍ୱିତୀୟ ମ୍ୟାଚ୍ ଖେଳିବ । ପୂର୍ବରୁ ୨୦୨୨ ଫିଫା ବିଶ୍ୱକପ୍ ଯୋଗ୍ୟତା ପର୍ୟ୍ୟାୟ ଟୁର୍ଣ୍ଣାମେଣ୍ଟରେ ଭାରତ-କତାର ମ୍ୟାଚ୍ କଳିଙ୍ଗ ଷ୍ଟାଡିୟମରେ ଖେଳାଯିବାର ସୂଚୀ ରହିଥିଲା । କିନ୍ତୁ କରୋନା ମହାମାରୀ ଯୋଗୁ ଏହାକୁ ପ୍ରଥମେ ସ୍ଥଗିତ ରଖାଯିବା ପରେ ଶେଷରେ ବାତିଲ୍ ଘୋଷଣା କରାଯାଇଥିଲା । ଓଡ଼ିଶାରେ ଫୁଟବଲ୍ ଭିତ୍ତିଭୂମୀ ବେଶ୍ ସୁଦୃଢ଼ ରହିଛି । ଭୁବନେଶ୍ୱରରେ ଫିଫା ମାନର ୪ଟି ଅଭ୍ୟାସ ଗ୍ରାଉଣ୍ଡ ସହ ଐତିହାସିକ କଳିଙ୍ଗ ଷ୍ଟାଡିୟମର ମୁଖ୍ୟ ଗ୍ରାଉଣ୍ଡ ପ୍ରସ୍ତୁତ ରହିଛି । କଣ୍ଟିନେଣ୍ଟାଲ୍ କପ୍ର ସଫଳ ଆୟୋଜନ ପରେ ଏଆଇଏଫ୍ଏଫ୍ କଳିଙ୍ଗ ଷ୍ଟାଡିୟମକୁ କତାର ବିପକ୍ଷ ମୁକାବିଲା ପାଇଁ ଭାରତର ଘରୋଇ ଗ୍ରାଉଣ୍ଡ ଭାବେ ଚୂଡ଼ାନ୍ତ କରିଥିଲା । ଏଆଇଏଫ୍ଏଫ୍ର ମହାସଚିବ ଡ. ସାଜି ପ୍ରଭାକରନ କହିଛନ୍ତି, ଫିଫା ବିଶ୍ୱକପ୍ ଯୋଗ୍ୟତା ପର୍ୟ୍ୟାୟ ମ୍ୟାଚ୍ର ଆୟୋଜନ ଅଧିକାର ପାଇଥିବା ଫୁଟବଲ୍ ଆସୋସିଏସନ୍ ଅଫ୍ ଓଡ଼ିଶା ଓ ଆସାମ ଫୁଟବଲ୍ ଆସୋସିଏସନ୍କୁ ଶୁଭେଚ୍ଛା ଜଣାଉଛି । ରାଜ୍ୟ ସରକାରଙ୍କ ସହଯୋଗରେ ଉଭୟ ରାଜ୍ୟ ସଂଘ ବିଶ୍ୱସ୍ତରୀୟ କ୍ରୀଡ଼ା ଭିତ୍ତିଭୂମୀ ସ୍ଥାପନ କରିଛନ୍ତି । ଖୁସି ପ୍ରକାଶ କଲେ ମୁଖ୍ୟମନ୍ତ୍ରୀ: ଓଡ଼ିଶାକୁ ଫିଫା ବିଶ୍ୱକପ୍ ଯୋଗ୍ୟତା ପର୍ୟ୍ୟାୟ ମ୍ୟାଚ୍ ଆୟୋଜନ ଅଧିକାର ମିଳିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସୋସିଆଲ୍ ମିଡିଆ ‘ଏକ୍ସ’ରେ ଟ୍ୱିଟ୍ କରି ଖୁସି ବ୍ୟକ୍ତ କରିଛନ୍ତି । ସେ ଲେଖିଛନ୍ତି, ୨୦୨୬ ଫିଫା ବିଶ୍ୱକପ୍ ଓ ୨୦୨୭ ଏଏଫ୍ସି ଏସିଆ କପ୍ ଯୋଗ୍ୟତା ପର୍ୟ୍ୟାୟର ଭାରତ-କତାର ମ୍ୟାଚ୍ ଆୟୋଜନ ଅଧିକାର ପାଇ ଆମେ ବେଶ ଉତ୍ସାହିତ ରହିଛୁ । ଏହା ଆମ ପାଇଁ ସମ୍ମାନର ବିଷୟ । ଏହି ଆୟୋଜନ କେବଳ ଓଡ଼ିଶାର ଫୁଟବଲ୍ ପ୍ରତି ଉତ୍ସାହକୁ ଦର୍ଶାଉ ନାହିଁ ବରଂ ଏହା ଆମ ରାଜ୍ୟରେ ଫୁଟବଲ୍ର ପ୍ରଚାର ପ୍ରସାର ଏବଂ ପ୍ରତିବଦ୍ଧତାକୁ ସୂଚାଉଛି । ଓଡ଼ିଶାର ଏହି ଐତିହାସିକ ମୁହୂର୍ତ୍ତର ମୁକସାକ୍ଷୀ ହେବାକୁ ଆମେ ଖେଳାଳି, ପ୍ରଶଂସକ ଏବଂ ଫୁଟବଲ୍ପ୍ରେମୀମାନଙ୍କୁ ସ୍ୱାଗତ କରିବା ପାଇଁ ଅପେକ୍ଷା କରିଛୁ ।’
ଓଡ଼ିଶା ଫୁଟବଲ୍ପ୍ରେମୀଙ୍କ ପାଇଁ ଖୁସି ଖବର, କଳିଙ୍ଗରେ ଭାରତ-କତାର ମୁକାବିଲା
