ଗୁରୁବାର ସରିବ ତିନି ରଥର ଚକ ନିର୍ମାଣ

ପୁରୀ, (ବାଘୁଆବାର୍ତ୍ତା): ବୁଧବାର ରଥତ୍ରୟର ଚକ, ଚଉତା, ନିରାଡ଼ି, ଖମ୍ବୀ ଓ ଗୁଜ ତିଆରି ଚାଲିଛି । ଭଉଁରି ପରେ ଗୟଳ ନିର୍ମାଣ ଆରମ୍ଭ ହେବା କଥା । ହେଲେ କାଠ ଅଭାବ ରହିଛି । ଏଣୁ ଅଖ, ଗୟଳ ଓ ଦଣ୍ଡା ନିର୍ମାଣ ପାଇଁ ୪୦ ଫୁଟିଆ କାଠକୁ ଅପେକ୍ଷା କରିଛନ୍ତି ରଥ ନିର୍ମାଣକାରୀ । ରଥର ଗୁଜ ଉପରେ ରହିବ ନିରାଡ଼ି । ରଥ ଚାରି ପାର୍ଶ୍ବକୁ ଲୋଡ଼ା ଚାରି ନିରାଡ଼ି । ତିନି ରଥର ୧୨ଟି ନିରାଡ଼ି ନିର୍ମାଣ ଚାଲିଛି । ରଥ ଖଳାରେ ଭୂଇଁର ଚଉତା କାଠ ତିଆରି ଚାଲିଛି । ପ୍ରତି ରଥର ୧୨ଟି ଚଉତା କରି ମୋଟ ୩୬ ଚଉତା କାଠ ପ୍ରସ୍ତୁତ ହୋଇଥାଏ । ରଥ ଅମିନ ଲକ୍ଷ୍ମଣ ମହାପାତ୍ରଙ୍କ ପରାମର୍ଶକ୍ରମେ ଭୋଇ ସର୍ଦ୍ଦାର ରବି ଭୋଇଙ୍କ ତତ୍ତ୍ୱାବଧାନରେ ଭୋଇ ସେବକମାନେ ଚଉତା କାଠ ରଥଖଳାକୁ ଯୋଗାଇଛନ୍ତି । ଏଥିସହ ଆଜି ତିନୋଟି ଅଖ କାଠ ରଥ ଖଳାକୁ ଯୋଗାଯାଇଛି । ଚକ ତିଆରି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଛି । ୪୨ ଚକରୁ ପ୍ରାୟ ୩୨ ଚକ ନିର୍ମାଣ ସରିଛି । କରତକଳରୁ ପହି ଆସିଲେ ବାକି ଚକ ପ୍ରସ୍ତୁତ ହେବ । ରୂପକାରମାନେ ଗୁଜ ନିର୍ମାଣରେ ନିମଗ୍ନ । ମୁଗୁର ଓ ନିହଣ ମୁନରେ ଚାଲିଛି ସିଂହବିରାଳ ମୂର୍ତ୍ତି ଖୋଦେଇ । ନୃସିଂହ ଜନ୍ମ ଅବସରରେ ଶ୍ରୀନୃସିଂହଙ୍କୁ ଆବାହନ କରି କାର୍ଯ୍ୟ ଆରମ୍ଭ ହୋଇଥିଲା । ସେବେଠାରୁ ତିନି ରଥର ରୂପକାରମାନେ ଗୁଜରେ ଖୋଦେଇ ଲାଗିଛନ୍ତି । ଗୁଜରେ ପଲିସ କାର୍ଯ୍ୟ ଜାରି ରହିଛି । ଦୋଳବେଦିରେ ତିନି ରଥ ପାଇଁ ସ୍ୱତନ୍ତ୍ର ୩ଟି ଶାଳରେ ପ୍ରସ୍ତୁତ ହେଉଛି ଲୌହ ସାମଗ୍ରୀ । ଓଝା ସେବକମାନେ ଦଣ୍ଡା କଣ୍ଟା, ଗୟଳ କଣ୍ଟା ଓ ପନ୍ଦାରି ବଳା ଆଦି ପ୍ରସ୍ତୁତ କରୁଛନ୍ତି । କରତି ସେବକମାନେ ମେସିନ୍ ସାହାଯ୍ୟରେ ସିଙ୍ଗଡ଼ାରେ ଅଖ ବିନ୍ଧ ଜାରି ରଖିଛନ୍ତି ।