ବେଙ୍ଗାଲୁରୁ (ବାଘୁଆବାର୍ତ୍ତା): ଜଣେ ବାପା ତା ପିଲାର ମଙ୍ଗଳ ପାଇଁ କ’ଣ ନକରିପାରେ । ନିଜ ପୁତ୍ରର ସୁସ୍ଥତା ଲାଗି ବାପା ୩ ଦିନରେ ୩୦୦ କିଲୋମିଟର ସାଇକେଲ ଚଲାଇ ଔଷଧ ଆଣିଥିଲେ । ପିଲାମାନଙ୍କୁ ପିତା-ମାତା ସର୍ବଦା ନିଃସ୍ବାର୍ଥପର ଭାବେ ଭଲ ପାଇବା, ସ୍ନେହ, ଶ୍ରଦ୍ଧା, ଆଶିର୍ବାଦ ଦେଇଥାନ୍ତି । ଯେତେବେଳେ କୌଣସି ଜିନିଷର ଆବଶ୍ୟକତା ପଡେ କଷ୍ଟ ହେଲେବି ମା-ବାପା ତାହାକୁ ପୂରଣ କରନ୍ତି । ତେଣୁ ନିଜର ପିଲାମାନଙ୍କ ପ୍ରତି ଭଲ ପାଇବାର ଗଭୀରତା ମାପିବା ହୁଏତ କଷ୍ଟସାଧ୍ୟ ହୋଇପଡିବ । ପୁଅ ପାଇଁ ବାପାର କର୍ତ୍ତବ୍ୟର ଆଉ ଏକ ନିଚ୍ଛକ ଉଦାହରଣ ଦେଖିବାକୁ ମିଳିଛି ବେଙ୍ଗାଲୁରୁରେ । ଆଉ ମାତ୍ର ଦିନ କେଇଟା ପରେ ରୋଗ ଶଯ୍ୟାରେ ପଡିଥିବା ପୁଅର ଔଷଧ ଶେଷ ହୋଇଯିବ । ଆଖପାଖ ବଜାରରେ ଯେତେ ଖୋଜିଲେ ମଧ୍ୟ ମେଡିସିନ୍ ମିଳିଲା ନାହିଁ । ଯେତେ ଯାହାକୁ ଅନୁରୋଧ କରିବା ପରେ ମଧ୍ୟ କେହି ଶୁଣିଲେନି । ଆଉ ଡେରି ନକରି ଶେଷରେ ବାଧ୍ୟ ହୋଇ ନିଜେ ବାହାରିପଡିଲେ ମେଡିସିନ ପାଇଁ । ମଇଶୂର କୋପ୍ପାଲୁ ଗାଁର ୪୫ ବର୍ଷୀୟ ଆନନ୍ଦ ପୁଅର ମେଡିସିନ୍ ଆଣିବା ପାଇଁ ସାଇକେଲରେ ପ୍ରାୟ ୩୦୦ କିଲୋମିଟର ଯାତ୍ରା କରି ବେଙ୍ଗାଲୁରୁରେ ପହଞ୍ଚିଥିଲେ । ସେଠାରୁ ଏକ ମେଡିସିନ ଦୋକାନରୁ ଔଷଧ ଆଣି ପୁଣି ଫେରିଥିଲେ ନିଜ ଗା କୋପ୍ପାଲୁକୁ । ସୁଦୂର ବେଙ୍ଗାଲୁରୁ ଯାଇ ପୁଅ ପାଇଁ ଔଷଧ ଆଣିବା ପାଇଁ ଆନନ୍ଦଙ୍କୁ ୩ ଦିନ ସମୟ ଲାଗିଥିଲା । ପୁଅର ଚିକିତ୍ସାକୁ ନେଇ ଆନନ୍ଦ କହିଛନ୍ତି ‘ ମାତ୍ର ୬ ମାସର ହୋଇଥିବା ବେଳେ ଅଜଣା ରୋଗରେ ଆକ୍ରାନ୍ତ ହୋଇଥିଲା ପୁଅ । ଡାକ୍ତର କହିଥିଲେ ୧୮ ବର୍ଷ ହେବା ଯାଏଁ ପ୍ରତିଦିନ ଔଷଧ ଖାଇବାକୁ ପଡିବ । ଏପରି ହେଲେ ପୁଅ ଠିକ୍ ହୋଇଯିବ । ଲକଡାଉନ୍ ଥିବାରୁ ଗାଡିମଟର ବନ୍ଦ ରହିଛି । ଘର ପାଖରେ ଯେଉଁ ଔଷଧ ଦୋକାନ ରହିଛି ସେଠାରେ ଉକ୍ତ ମେଡିସିନ ଉପଲବ୍ଧ ନଥିଲା । କେତେ କାହାକୁ ଗୁହାରି କରିଥିଲେ ମଧ୍ୟ କେହି ଶୁଶିନଥିଲେ । ଅନ୍ୟପଟେ ପୁଅ ମେଡିସିନ ନଖାଇଲେ ଗୋଟିଏ ଦିନ ମଧ୍ୟ ରହିପାରିବ ନାହିଁ । ବୁଧବାର ସୁଦ୍ଧା ମେଡିସିନ ଶେଷ ହେବାକୁ ଥିବବେଳେ ଡେରି ନକରି ରବିବାର ଦିନ ସାଇକେଲ ନେଇ ବାହାରିଥିଲି ବେଙ୍ଗାଲୁରୁ । ରାତି ହୋଇଯିବାରୁ ଏକ ମନ୍ଦିରରେ ଶୋଇଥିଲି। ପରଦିନ ଅର୍ଥାତ ସୋମବାର ଡାକ୍ତରଖାନାରେ ପହଞ୍ଚି ମେଡିସିନ ଆଣିଥିଲି ଏବଂ ସେହିଦିନ ହିଁ ଫେରିଥିଲି । ମଙ୍ଗଳବାର ଘରେ ପହଞ୍ଚିବା ପରେ ଆଶ୍ବସ୍ଥି ଲାଗିଥିଲା ।’ ସତରେ ପିଲାମାନଙ୍କ ପାଇଁ ପିତାମାନଙ୍କ ଭଲପାଇବା ଶବ୍ଦରେ ପ୍ରକାଶ କରିବା ଅସମ୍ଭବ । ଏପରି ପିତାଙ୍କୁ ଶତ ସହସ୍ର ସଲାମ
ଲକଡାଉନ ସମୟରେ ପୁଅର ଔଷଧ ପାଇଁ ବାପା ସାଇକେଲରେ ଗଲେ ୩୦୦ କିଲୋମିଟର
