ବ୍ୟାଙ୍କ କର୍ମଚାରୀଙ୍କ ଘରେ କଳାକନା ବୁଲାଇଲେ ଲୁଟେରା: ଥାନାରେ ଅଭିଯୋଗ

ନୟାଗଡ଼, (ବାଘୁଆବାର୍ତ୍ତା): ବିଳମ୍ବିତ ରାତିରେ ବ୍ୟାଙ୍କ କର୍ମଚାରୀଙ୍କ ଘରେ କଳାକନା ବୁଲାଇଲେ ଲୁଟେରା । ଲକ୍ଷାଧିକ ଟଙ୍କାର ସୁନା ଗହଣା ଓ ୬୦ହଜାରୁ ଉର୍ଦ୍ଧ ଟଙ୍କା ଲୁଟି ନେଇଥିବା ନେଇ ଥାନାରେ ଅଭିଯୋଗ ହୋଇଛି । ସୂଚନାନୁସାରେ, ଫତେଗଡ଼ ଥାନା ଅନ୍ତର୍ଗତ ବାସୁଦେବପୁର ଗାଁର ଶରତ କୁମାର ସାହୁ ଓ ପରିବାର ଲୋକ ରାତିରେ ଶୋଇପଡିଥିବା ବେଳେ କିଛି ଲୁଟେରା ଗତକାଲି ବିଳମ୍ବିତ ରାତିରେ ବାରିପଟ କବାଟ ଭାଙ୍ଗି ଘରେ ପସିଥିଲେ । ବାରିପଟ କବାଟ ଭାଙ୍ଗି ମଝିଘରେ ଥିବା ଗଡରେଜକୁ ଟେକି ନେଇ ବାରିପଟେ ଭାଙ୍ଗି ସେଥିରେ ଥିବା ସମସ୍ତ ସୁନା ଗହଣା ସହ ୬୦ହଜାରରୁ ଉର୍ଦ୍ଧ ଟଙ୍କା ଲୁଟି ନେଇଥିବା ନେଇ ବ୍ୟାଙ୍କ କର୍ମଚାରୀ ଶରତ କୁମାର ସାହୁ ଫତେଗଡ଼ ଥାନାରେ ଅଭିଯୋଗ କରିଛନ୍ତି । ଅଭିଯୋଗକୁ ଭିତ୍ତି କରି ଫତେଗଡ଼ ଥାନା ଅଧିକାରୀ ଗିରିଜା ଶଙ୍କର ପଟ୍ଟନାୟକ ଓ ଏସଆଇ ସଞ୍ଜିବ ମହାନ୍ତି ଘଟଣାସ୍ଥଳରେ ପହଞ୍ଚି ନୟାଗଡ଼ ସାଇଣ୍ଟିଫିକ୍ ଟିମକୁ ଖବର ଦେଇଥିଲେ । ସାଇଣ୍ଟିଫିକ୍ ଟିମ୍ ପୁଲିସ୍ ଘଟଣାସ୍ଥଳରେ ପ୍ରାଥମିକ ତଦନ୍ତ କରିଥିବା ଜଣାପଡିଛି । ବ୍ୟାଙ୍କ କର୍ମଚାରୀଙ୍କ ଘରୁ ପାଖାପାଖି ୧୫ଲକ୍ଷରୁ ଉର୍ଦ୍ଧ ଟଙ୍କାର ସୁନା ଗହଣା ଓ ଆସବାପତ୍ର ଚୋରି ହୋଇଥିବା ଅନୁମାନ କରାଯାଉଛି । ଏନେଇ ଫତେଗଡ଼ ଥାନା ଅଧିକାରୀଙ୍କ ସହିତ ଯୋଗାଯୋଗ କରିଥିଲେ ମଧ୍ୟ ଯୋଗାଯୋଗ ହୋଇପାରିନଥିଲା ।