ଆସନ୍ତୁ ଜାଣିବା ଆଖିର ମହତ୍ୱ କ’ଣ ?

ମନୁଷ୍ୟ ଓ ପ୍ରାଣୀଙ୍କୁ ପ୍ରକୃତି ଦେଇଥିବା ଉପହାର ମଧ୍ୟରେ ଆଖି ବା ଚକ୍ଷୁ ସର୍ବଶ୍ରେଷ୍ଠ । ଆଖି ଦ୍ୱାରା ଆମେ ଦୁନିଆର ସୁନ୍ଦର ରୂପ ରାଶିକୁ ଉପଭୋଗ କରିପାରୁ । ଆଖି ସ୍ନେହ ଓ ପ୍ରେମର ଆମନ୍ତ୍ରଣ ଦିଏ ସେହି ଆଖି ପୁଣି କ୍ରୋଧିତ ହେଲେ ଅନଳର ବର୍ଷା ହୋଇଯାଏ । ଅଶିକ୍ଷିତ ଲୋକଟିଏ ଆଖିର ଭାଷା ଓ ଇଶାରାରେ ସବୁ କିଛି ଜଣାଇ ଦେଇପାରେ । ଆଖି ସୌନ୍ଦର୍ଯ୍ୟ ବୃଦ୍ଧିର ଗନ୍ତାଘର ।

ସେହି ଆଖି ବିଷୟରେ ସମ୍ୟକ୍ ତଥ୍ୟ ….

ମଣିଷ ପ୍ରତି ୬ ସେକେଣ୍ଡରେ ଥରେ ଲେଖାଏଁ ଆଖିପତା ପକାଇ ଥାଏ ଅର୍ଥାତ ପୂରା ଜୀବନ କାଳ ମଧ୍ୟରେ ଆମେ ୨୫ କୋଟି ଥର ଆଖି ପତା ପକାଇ ଥାଉ । ସ୍ତନ୍ୟପାୟୀ ପ୍ରାଣୀଙ୍କ ମଧ୍ୟରୁ ମଣିଷ ଓ ମାଙ୍କଡକୁ ଛାଡି ଦେଲେ ଅନ୍ୟ କେହି ରଙ୍ଗ ବାରି ପାରନ୍ତି ନାହିଁ । ଅନୁକୂଳ ପରିସ୍ଥିତିରେ ମଣିଷର ଆଖି ୧ କୋଟି ପର୍ଯ୍ୟନ୍ତ ରଙ୍ଗ ବାରିପାରେ । ବିଶ୍ୱରେ ସାଢ଼େ ସାତ ପ୍ରତିଶ୍ରତ ପୁରୁଷ ଓ ୧ ପ୍ରତିଶତ ମହିଳା ସଠିକ ରଙ୍ଗ ବାରି ପାରନ୍ତି ନାହିଁ । ଲାଲ ଓ ସବୁଜ ରଙ୍ଗର ସଠିକତା ବାରିବାରେ ଚେକୋସ୍ଲୋଭିକିଆର ଲୋକମାନେ ବିଶ୍ୱର ସବୁ ଲୋକଙ୍କଠାରୁ ନିମ୍ନରେ । ମନୁଷ୍ୟ ଆଖିରେ ଥିବା ୩ ରୁ ୪ ମାଇକ୍ରାନ ବ୍ୟାସ ବିଶିଷ୍ଟ ସୂକ୍ଷ୍ମ ଛିଦ୍ର ମାଧ୍ୟମରେ ଅନ୍ୟ ଦିଗରୁ ଆସୁଥିବା ତେଜିୟାନ ରଶ୍ମିକୁ ଜାଣିପାରେ । ସୂଚନା ଥାଉକି ଏକ ମାଇକ୍ରାନ୍ ହେଉଛି ଏକ ମିଲିମିଟରର ଏକହଜାର ଭାଗରୁ ୧ ଭାଗ୍ୟ । କଳା ଓ ହଳଦିଆ ରଙ୍ଗର ମିଶ୍ରଣ ଆଖି ଉପରେ ଗଭୀର ପ୍ରଭାବ ପକାଇଥାଏ । ଜନ୍ମରୁ ଅନ୍ଧ ବ୍ୟକ୍ତିମାନେ ସ୍ୱପ୍ନରେ କେବଳ ଧ୍ୱନୀ ହିଁ ଶୁଣିଥାନ୍ତି । ଏହା ଅସମ୍ଭବ ଲାଗିଲେ ମଧ୍ୟ ସତ୍ୟ ଯେ ଛିଙ୍କିଲାବେଳେ ମଣିଷର ଦୁଇ ଆଖି ପୂରାପୁରି ଖୋଲା ରହିଥାଏ । ମଣିଷମାନଙ୍କର ଆଖି ଭଳି ଅନ୍ୟାନ୍ୟ ପ୍ରାଣୀମାନଙ୍କ ଆଖିର ମଧ୍ୟ ବହୁ ଅଲୌକିକ ଗୁଣ ରହିଛି । ପେଚା ତା’ର ଆଖି (ଡୋଳା) କୁ କୌଣସି ଆଡକୁ ବୁଲାଇପାରେ ନାହିଁ । ମାତ୍ର ଶରୀରର କୌଣସି ଅଙ୍ଗକୁ ନ ହଲାଇ ମୁଣ୍ଡକୁ ବିପରୀତ ଦିଗକୁ ବୁଲାଇବାରେ ସଫଳ ହୁଏ । ଏଥିଯୋଗୁଁ ଏହା ତାର ପଛପଟେ ଥିବା ଜିନିଷକୁ ମଧ୍ୟ ଦେଖିପାରେ । ମାଛିର ଆଖି ୪ ହଜାର ମୁଖିକାଙ୍କୁ ନେଇ ସଂରଚିତ । ଏଥିଯୋଗୁଁ ଏକ ନିର୍ଦ୍ଦିଷ୍ଟ ସ୍ଥାନରେ ସ୍ଥିର ରହିଥିଲେ ମଧ୍ୟ ତାର ଶତ୍ରୁ କେଉଁ ଦିଗରୁ ଆସୁଛି ସେ ସହଜରେ ଜାଣିପାରେ । ରାତିରେ ବିଲେଇ ଆଖି ଚମକିବାର କାରଣ ହେଉଛି ଏହାର ଆଖି କୋଡିକା ଉପରେ ଥିବା ପରଦା, ଯେଉଥିରେ କି ପ୍ରକାଶର ପରିବର୍ତ୍ତନ ରହିଛି । ବିଲେଇର ଆଖି ନୀଳ, ସବୁଜ, ହଳଦିଆ, ନାରଙ୍ଗୀ ହୋଇପାରେ । କେତେକ ବିଲେଇଙ୍କର ଉଭୟ ଆଖି ଭିନ୍ନ ଭିନ୍ନ ହୋଇଥିବାର ଦେଖାଯାଏ ।ଡଲଫିନ ଶୋଇଲାବେଳେ ଗୋଟିଏ ଆଖି ଖୋଲା ରଖିଥାଏ । ଷ୍ଟାର ମାଛର ପ୍ରତ୍ୟେକ ବାହୁର ଅଗ୍ରଭାଗରେ ଗୋଟିଏ ଲେଖାଏଁ ଆଖି ରହିଥାଏ । ବାଜପକ୍ଷୀର ଆଖିରେ ୧୩ ହଜାର ଲେନ୍ସ ଓ ସ୍ନାୟୁ ରହିଥାଏ । ଏଥିଯୋଗୁଁ ସେ ୮ ମାଇଲ ଉପରୁ ପୃଥିବୀ ପରେ ଦୌଡୁଥିବା ଠେକୁଆକୁ ସହଜରେ ଦେଖିପାରେ । ଆଖି ମଣିଷର ଅମୂଲ୍ୟ ସମ୍ପଦ । ନେତ୍ରହୀନ ବ୍ୟକ୍ତିମାନଙ୍କୁ ପୃଥିୀର ସୌନ୍ଦର୍ଯ୍ୟ ଦେଖାଇବା ପାଇଁ ଏବେ ମାନବ ସମାଜ ଚେଷ୍ଟିତ । ତେଣୁ ମରିବା ପୂର୍ବରୁ ମଣିଷମାନେ ଅନ୍ୟମାନଙ୍କ ପାଇଁ ସେମାନଙ୍କର ଆଖିକୁ ଦାନ କରି ଦେଇଯାଇଥାନ୍ତି । ସେହି ଆଖି ଜଣେ ନେତ୍ରହୀନଙ୍କୁ ବିଶ୍ୱର ନୂଆ ରୂପ ଦେଖାଇ ପାରିଥାଏ ।