ପୂର୍ବତନ ଆଇଏଏସ୍ ଅମିତ୍ ଖରେ ହେଲେ ପ୍ରଧାନମନ୍ତ୍ରୀଙ୍କ ନୂଆ ପରାମର୍ଶଦାତା

ଭୁବନେଶ୍ୱର, (ବାଘୁଆବାର୍ତ୍ତା): ମାନବ ସମ୍ବଳ ଏବଂ ସୂଚନା ପ୍ରସାରଣ ମନ୍ତ୍ରଣାଳୟରେ ସଚିବ ଭାବରେ କାର୍ୟ୍ୟ କରିଥିବା ପୂର୍ବତନ ଆଇଏଏସ୍ ଅମିତ ଖରେଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରାମର୍ଶଦାତା ଭାବରେ ନିଯୁକ୍ତ କରାଯାଇଛି। ୧୯୮୫ ବ୍ୟାଚ୍ ଆଇଏଏସ୍ ଅଧିକାରୀ ଅମିତ ଖରେ ସେପ୍ଟେମ୍ବର ୩୦ ରେ ଉଚ୍ଚଶିକ୍ଷା ସଚିବ ପଦରୁ ଅବସର ନେଇଥିଲେ। ତାଙ୍କ ନିଯୁକ୍ତି ସମ୍ପର୍କରେ ସୂଚନା ସରକାରୀ ଆଦେଶରେ ଦିଆଯାଇଛି। ସୂଚନା ଅନୁଯାୟୀ କ୍ୟାବିନେଟର ନିଯୁକ୍ତି କମିଟି ଅମିତ ଖରେଙ୍କୁ ପିଏମ ମୋଦୀଙ୍କ ପରାମର୍ଶଦାତା ଭାବରେ ନିଯୁକ୍ତିକୁ ଅନୁମୋଦନ କରିଛି। ସେ ପ୍ରଧାନମନ୍ତ୍ରୀଙ୍କର ପରାମର୍ଶଦାତା ଭାବରେ କାର୍ୟ୍ୟ କରିବେ। ଚୁକ୍ତି ଆଧାରରେ ତାଙ୍କର ଚାକିରି ହେବ। ଏହା ବ୍ୟତୀତ ପୁନଃ ନିଯୁକ୍ତି ସମ୍ବନ୍ଧୀୟ ସରକାରଙ୍କ ସମସ୍ତ ନିୟମ ତାଙ୍କ ପାଇଁ ପ୍ରଯୁଜ୍ୟ ହେବ। ବର୍ତ୍ତମାନ ତାଙ୍କୁ ଦୁଇ ବର୍ଷ ପାଇଁ କିମ୍ବା ପରବର୍ତ୍ତୀ ନିର୍ଦ୍ଦେଶ ପର୍ୟ୍ୟନ୍ତ ନିଯୁକ୍ତ କରାଯାଇଛି। ଏହା ପରେ ମଧ୍ୟ ତାଙ୍କ କାର୍ୟ୍ୟକାଳ ବୃଦ୍ଧି କରାଯାଇପାରେ। ଚଳିତ ବର୍ଷ ଦେଶରେ କାର୍ୟ୍ୟକାରୀ ହୋଇଥିବା ନୂତନ ଶିକ୍ଷା ନୀତିର ଡ୍ରାଫ୍ଟ ପ୍ରସ୍ତୁତ କରିବାରେ ତାଙ୍କୁ ଏକ ଗୁରୁତ୍ୱପୁର୍ଣ୍ଣ ଅବଦାନ ଭାବରେ ବିବେଚନା କରାଯାଇଛି। ଏହା ବ୍ୟତୀତ ସେ ଡିଜିଟାଲ୍ ମିଡିଆ ସମ୍ବନ୍ଧରେ ନିୟମ ସ୍ଥିର କରିବାରେ ମଧ୍ୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ନିକଟରେ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ଡିଜିଟାଲ ମିଡିଆ ସମ୍ବନ୍ଧରେ ନିୟମ ଜାରି କରିଛି।