ନବରଙ୍ଗପୁର, (ବାଘୁଆବାର୍ତ୍ତା): ହାତୀଗାଁରେ ପଶିଲେ ହାତୀ । ନବରଙ୍ଗପୁର ଜିଲ୍ଲାରେ ପ୍ରଥମ ଥର ଦେଖିବାକୁ ମିଳିଛି ହାତୀ ପଲ । ଜିଲ୍ଲାର ରାଇଘର ବ୍ଲକ ଅନ୍ତର୍ଗତ ସମ୍ବଲପୁର ନିକଟ ହାତୀ ଗାଁ ସଂରକ୍ଷିତ ଜଙ୍ଗଲରେ ହାତୀପଲ ଓଡ଼ିଶା ଜଙ୍ଗଲ ଦେଇ ହାତୀଗାଁ ଭିତରକୁ ପଶି ଆସିଥିଲେ । ଗତକାଲି ରାତିରୁ ଛତିଶଗଡ଼ ଗରିଆବନ୍ଧର ସାଲେଭାଟା ଜଙ୍ଗଲରୁ ଆସିଥିଲେ ହାତୀପଲ । ସାରା ରାତି ଓଡିଶା ଜଙ୍ଗଲରେ ତାଣ୍ଡବ ରଚିବା ସହିତ ଫସଲ ନଷ୍ଟ କରିଛନ୍ତି । ରାତି ତମାମ ହାତୀ ଗାଁରେ ରହିବା ପରେ ସକାଳ ସମୟରେ ପୁଣି ଛତିଶଗଡ଼ ଜଙ୍ଗଲକୁ ଫେରି ଯାଇଥିଲେ । ଖବର ପାଇ ରାଇଘର ରେଞ୍ଜରଙ୍କ ନେତୃତ୍ୱରେ ବନ ବିଭାଗର ଏକ ଟିମ୍ ଜଙ୍ଗଲ କୁ ଯାଇ ହାତୀର ଗତିବିଧି ଚିହ୍ନଟ କରି ଫେରିଛନ୍ତି । ହାତୀ ପଲର ପାଦ ଚିହ୍ନ ଦେଖିବା ସହିତ ସେମାନଙ୍କ ଚଲାପଥ ଅନୁସରଣ କରି ଛତିଶଗଡ ସୀମା ପର୍ୟ୍ୟନ୍ତ ଯାଇ ଫେରି ଆସିଛନ୍ତି । ହାତୀ ପଲ ପଶିବା ଏହି ଅଞ୍ଚଳରେ ପ୍ରଥମ ଘଟଣା ବୋଲି ସ୍ଥାନୀୟ ବାସିନ୍ଦା କହିଛନ୍ତି ।
