ମହିଳାରୁ ପୁରୁଷ ପାଲଟିଲେ ହଲିଉଡ ଷ୍ଟାର, ଏଲନ ପେଜ ରୁ ଏଲଟ ପେଜ

ନୂଆଦିଲ୍ଲୀ (ବାଘୁଆବାର୍ତ୍ତା): ମହିଳାରୁ ପାଲଟିଗଲେ ପୁରୁଷ । ହଲିଉଡର ପ୍ରସିଦ୍ଧ ଅଭିନେତ୍ରୀ ଏଲନ ପେଜ ଏବେ ଏଲଟ ପେଜ ନାଁରେ ଜଣାଶୁଣା । ସର୍ଜରୀ କରି ପୁରୁଷ ପାଲଟିବା ପରେ ଏବେ ସେ ନିଜର ୬ ପ୍ୟାକ ଆବ୍ସ ଦେଖାଇଛନ୍ତି । ଯାହାର ଫଟୋକୁ ଏଲଟ ସେଆର କରିଛନ୍ତି । ଏହି ଫଟୋ ଏବେ ଭାଇରାଲ ହେବାରେ ଲାଗିଛି । ଜୁନୋ ଏବଂ ଇଂସେପ୍ସନ ଭଳି ପ୍ରସିଦ୍ଧ ହଲିଉଡ ଫିଲ୍ମରେ କାମ କରିଥିବା ଏଲଟ ଡିସେମ୍ବର ୨୦୨୦ ରେ ଇନଷ୍ଟାଗ୍ରାମ ପୋଷ୍ଟ ଜରିଆରେ ସେ ଜଣେ ଟ୍ରାନ୍ସଜେଣ୍ଡର ବୋଲି ସୂଚନା ଦେଇଥିଲେ । ଏବେ ତାଙ୍କର ୬ ପ୍ୟାକ ଆବ୍ସର ଫଟୋ ସାମ୍ନାକୁ ଆସିବା ପରେ ଚାରିଆଡେ ଚର୍ଚ୍ଚା ଜୋର ଧରିଛି । ନିକଟରେ ଓପେରା ୱିନଫ୍ରେଙ୍କ ସହ ଇଣ୍ଟରଭ୍ୟୁରେ ଏଲଟ କହିଥିଲେ, ତାଙ୍କ ପିଲା ଦିନ ସାଧାରଣ ଥିଲା । ଯେତେବେଳେ ସେ କିଶୋର ଅବସ୍ଥାକୁ ଆସିଥିଲେ ସେତେବେଳେ ତାଙ୍କ ଶରୀରରେ ପରିବର୍ତ୍ତନ ହେବା ଦେଖିଥିଲେ । ଧୀରେ ଧୀରେ ହଲିଉଡରେ ପାଦ ଦେବା ପରେ ସେ ପୁରାପୁରି ବଦଳି ଯାଇଥିଲେ । ୨୦୦୭ରେ ଫିଲ୍ମ ‘ଜୁନୋ’ର ପ୍ରମୋସନ ବେଳେ ଏଲଟ ଓସ୍କାରର ରେଡ କାରପେଟ ପାଇଁ ଏକ ଡ୍ରେସ ପନ୍ଧିଥିଲେ । କିନ୍ତୁ ପରେ ଯେତେବେଳେ ସେ ନିଜର ଫଟୋ ଦେଖିଥିଲେ ସେତେବେଳେ ତାଙ୍କୁ ବେଶ ଅଡୁଆ ଲାଗିଥିଲା ବୋଲି କହିଛନ୍ତି । ପେଜ ଆହୁରି କହିଛନ୍ତି, ମହିଳାଙ୍କ ଡ୍ରେସ ପିନ୍ଧିବାକୁ ତାଙ୍କୁ ଭଲ ଲାଗୁନଥିଲା । ଏହା ପରେ ସେ ସର୍ଜରୀ କରିବା ପାଇଁ ନିଷ୍ପତ୍ତି ନେଇଥିଲେ । ସର୍ଜରୀ ପରେ ସେ ପୁଣି ନିଜକୁ ଫେରି ପାଇଥିବା କହିଛନ୍ତି । କେବଳ ସେତିକି ନୁହେଁ ଟ୍ରାନ୍ସଜେଣ୍ଡର ଲୋକଙ୍କ ସଘଂର୍ଷ କ’ଣ ତାହା ମୁଁ ବୁଝିପାରୁଛି ତେଣୁ ତାଙ୍କ ପ୍ରତି ମୋର ସମର୍ଥନ ସର୍ବଦା ରହିବ ବୋଲି ସେ କହିଛନ୍ତି । ଏହି ହଲିଉଡ ଷ୍ଟାର ଜଣକ ୨୦୧୪ରେ ନିଜକୁ ଲେସବିଆନ ଘୋଷଣା କରିଥିଲେ । ପରେ ୨୦୧୮ ରେ କାନାଡାର ଡ୍ୟାନ୍ସର ଏମ୍ମା ପୋର୍ଟରଙ୍କ ସହ ବିବାହ କରିଥିଲେ ।