ଗଣିଆ, (ବାଘୁଆବାର୍ତ୍ତା) : ସମସ୍ୟାର ବଳୟ ଭିତରେ ଛନ୍ଦି ହୋଇ ପଡ଼ିଛି ରାଜ୍ୟର ପ୍ରଥମ ଇକୋ ଭିଲେଜ । ଆବଶ୍ୟକ ଭିତ୍ତିଭୂମିର ଅଭାବ ସମସ୍ୟାକୁ ଦ୍ୱିଗୁଣିତ କରିଛି । ଗ୍ରାମବାସୀଙ୍କର ସହଯୋଗ ଓ ଚେଷ୍ଟା ଫଳରେ ସମଗ୍ର ଦେଶରେ ଏକ ଆଦର୍ଶ ଗ୍ରାମ ରୂପେ ଉଭା ହୋଇଥିବା ଗଣିଆ ବ୍ଲକ ଛାମୁଣ୍ଡିଆ ପଞ୍ଚାୟତର ମୁଦୁଲିଗାଡ଼ିଆରେ ଦେଖା ଦେଇଛି ଅନେକ ସମସ୍ୟା । ଶିକ୍ଷା, ସ୍ୱାସ୍ଥ୍ୟ ଓ ପାନୀୟ ଜଳ ସମସ୍ୟା ଏଠାରେ ମୁଖ୍ୟ ସମସ୍ୟା ରୂପେ ମୁଣ୍ଡ ଟେକିଛି । ଗ୍ରାମରେ ୨୪ଟି ପରିବାରରେ ଶହେ ଜଣ ଲୋକ ବସବାସ କରନ୍ତି । ଗ୍ରାମକୁ ଅଦ୍ୟାବଧି ପାଇପ୍ ଦ୍ୱାରା ବିଶୁଦ୍ଧ ପାନୀୟ ଜଳ ଯୋଗାଣ ହୋଇ ପାରିନଥିôବା ବେଳେ ଏଠାରେ ଶିଶୁ ଓ ମହିଳା ମାନଙ୍କ ପାଇଁ ନା ଅଛି ଅଙ୍ଗନୱାଡି, ନାଁ ଅଛି ପ୍ରାଇମେରୀ ସ୍କୁଲ, ନା ଅଛି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର । ଏଠାରୁ ଦେଢ଼ କିଲୋମିଟର ଦୂର ବେଠିଆସାହିରେ ଥିବା ଅଙ୍ଗନୱାଡି ଓ ପ୍ରାଥମିକ ବିଦ୍ୟାଳୟ ଉପରେ ନିର୍ଭର କରିବାକୁ ପଡ଼ୁଛି । ଅନ୍ୟ ପକ୍ଷରେ ଗ୍ରାମରେ ବାସ କରୁଥିବା ୨୪ଟି ପରିବାର ଚାଷ ଉପରେ ନିର୍ଭର କରନ୍ତି । ଏମାନଙ୍କ ମଧ୍ୟରୁ ୧୭ଟି ପରିବାର କଚ୍ଚା ଘରେ ବାସ କରନ୍ତି । ସେହିପରି ଗ୍ରାମର ୧୨ ଜଣ ବାର୍ଦ୍ଧକ୍ୟ ଭତ୍ତା ପାଉଥିବା ବେଳେ ୩୧ ଜଣ ଖାଦ୍ୟ ସୁରକ୍ଷା ଯୋଜନାରେ ରାସନ ପାଉଛନ୍ତି । ୨୦୧୬ ମସିହାରେ ମଙ୍ଗାନାସି ଠାରେ ନିର୍ମିତ ହୋଇଥିବା ସାତକୋଶିଆ ସ୍ୟାଣ୍ଡ ରିସର୍ଟ ଏମାନଙ୍କ ପାଇଁ ସାହା ଭରସା । ସ୍ୟାଣ୍ଡ ରିସର୍ଟ ଏମାନଙ୍କ ପାଇଁ ଭାତହାଣ୍ଡି ପାଲଟିଥିବା ବେଳେ କରୋନା ଯୋଗୁଁ ତାହା ମଧ୍ୟ ବନ୍ଦ ହୋଇ ଯାଇଛି । କରୋନାର ଦୁଃଖ ସାଙ୍ଗକୁ ମହାନଦୀରେ ବନ୍ୟା ଆସି ସମସ୍ତ ଚାଷ ଜମି ଜଳମଗ୍ନ ହୋଇ ଯାଇଛି । ପ୍ରତିବର୍ଷ ମହାନଦୀରେ ବଢି ଆସିଲେ ଉକ୍ତ ଗ୍ରାମ ଜଳବନ୍ଦି ଅବସ୍ଥାରେ ରହି ଆସିଛି । ମାଳବନ୍ଧ ନିର୍ମାଣ ହୋଇ ନଥିବାରୁ ପ୍ରତିବର୍ଷ ବର୍ଷା ଦିନେ ଏମାନଙ୍କ ପାଇଁ ଅଭିଶାପ ପାଲଟିଥାଏ । ଯେହେତୁ ଏହା ଏକ ଆଦର୍ଶ ଗ୍ରାମ ରୂପେ ପରିଗଣିତ ହେଉଛି ଏହାର ଭିତ୍ତିଭୂମିରେ ଉନ୍ନତି କରିବା ନିତ୍ୟାନ୍ତ ଆବଶ୍ୟକ ହୋଇ ପଡିଛି । ଏଠାରେ ଶିକ୍ଷା,ସ୍ୱାସ୍ଥ୍ୟ ଓ ପାନୀୟଜଳ ସମସ୍ୟାକୁ ସୁଧାରିବା ନିହାତି ଆବଶ୍ୟକ । ସରକାର କୋଟି କୋଟି ଟଙ୍କା ଖର୍ଚ୍ଚ କରୁଥିଲେ ମଧ୍ୟ ମୁଦୁଲିଗାଡିଆ ପାଇଁ ସହାୟତାର ହାତ ବଢାଉନାହାନ୍ତି । କେବଳ ଇକୋ ଭିଲେଜ ମାନ୍ୟତାରେ ସୀମିତ ହୋଇ ରହିଛି ଉକ୍ତ ଗାଁ । ଏହି ଗ୍ରାମର ମୌଳିକ ସମସ୍ୟା ପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେବା ଆବଶ୍ୟକ ହୋଇପଡ଼ିଛି ।
