ମାଓବାଦୀ କହି ଲୁଟୁଥିଲେ, ଶେଷରେ ପୁଲିସ ପଞ୍ଝାରେ

ଦାରିଙ୍ଗବାଡ଼ି, (ବାଘୁଆବାର୍ତ୍ତା): ଦାରିଙ୍ଗବାଡ଼ି ପୋଲିସ୍ ପଞ୍ଝାରେ ପଡିଛନ୍ତି ୪ ନକଲି ମାଓବାଦୀ । ମାଓବାଦୀଙ୍କ ନାଁ ନେଇ ଲୋକଙ୍କ ଘରୁ ଲୁଟୁଥିଲେ ଏମାନେ । ଘଟଣା ଘଟିଛି ଦାରିଙ୍ଗବାଡ଼ି ଥାନା ଅଂଚଳରେ । ବାଲିଗୁଡା ଏସଡିପିଓ ମନୋଜ କୁମାର ପୂଜାରୀ ଦାରିଙ୍ଗବାଡ଼ି ଥାନାରେ ଏକ ସାମ୍ବାଦିକ ସମ୍ମିଳନୀ କରି ଘଟଣା ସମ୍ପର୍କରେ ସୂଚନା ଦେଇଛନ୍ତି । ଏହି ଘଟଣାରେ ୪ ଜଣ ଦୁର୍ବୁତ୍ତ ଗିରଫ ହୋଇଥିଲା ବେଳେ ଗୋଟିଏ ଦେଶୀ ବନ୍ଧୁକ,ସୁନା,ଟଙ୍କା ଓ ଛୁରୀ ଆଦି ଅସ୍ତ୍ରଶସ୍ତ୍ର ପୋଲିସ ଜବତ କରିଛି । ଗତ ୧୦ ତାରିଖ ରାତି ୧୨ ଟା ସମୟରେ ନିଜକୁ ମାଓବାଦୀର ପରିଚୟ ଦେଇ ଦାରିଙ୍ଗବାଡ଼ି ଥାନା ମକପାଟା ଗାଁ ର ପ୍ରମୋଦ ପ୍ରଧାନ ଓ ଟେପାରୀ ଗାଁ ର ବିଶ୍ବନାଥ ପ୍ରଧାନଙ୍କ ପରିବାର ଲୋକଙ୍କୁ ଭୋକରେ ଅଛୁ କିଛି ଖାଇବାକୁ ଦିଅ ବୋଲି କହି ଦୁର୍ବୁତ୍ତ ମାନେ କବାଟ ଖୋଲିବାକୁ କହିଥିଲେ । ହେଲେ ଏହି ଦୁଇ ପରିବାର ଭୟରେ କବାଟ ନ ଖୋଲିବାରୁ ଵୋମା ପକାଇ ଘର ଉଡ଼ାଇଦେବୁ ବୋଲି ସେମାନେ ଧମକ ଦେଇଥିଲେ । ଦୁର୍ବୃତ୍ତମାନଙ୍କର ଏହି ଧମକ ଶୁଣି ପ୍ରମୋଦ ପ୍ରଧାନ ଓ ବିଶ୍ୱନାଥ ପ୍ରଧାନଙ୍କ ପରିବାର ଲୋକ କବାଟ ଖୋଲିବାକୁ ବାଧ୍ୟ ହୋଇଥିଲେ । କବାଟ ଖୋଲିବା ପରେ ଅସ୍ତ୍ରଶସ୍ତ୍ର ଦେଖାଇ ଘରେ ଥିବା ଟଙ୍କା,ସୁନା,ଡାଲି,ଚାଉଳ ଲୁଟି ନେଇଥିଲେ ୬ଜଣ ଦୁର୍ବୃତ୍ତ । ଘଟଣାକୁ ନେଇ ଦୁଇ ପରିବାର ଭୟଭୀତ ହୋଇପଡ଼ିଥିଲେ । ପରବର୍ତ୍ତୀ ସମୟରେ ଦାରିଙ୍ଗବାଡ଼ି ଥାନାରେ ଲିଖିତ ଅଭିଯୋଗ କରିଥିଲେ ଉଭୟ ପରିବାର । ଅଭିଯୋଗ ପ୍ରକାରେ ଦାରିଙ୍ଗବାଡ଼ି ଥାନା ଅଧିକାରୀ କୌଶିକ ମାଝୀ ଓ ସବ୍ ଇନ୍ସପେକ୍ଟର ସୌମ୍ୟକାନ୍ତ ପଣ୍ଡା ଘଟଣାର ତଦନ୍ତ ଆରମ୍ଭ କରିଥିଲେ । ନିଜକୁ ମାଓବାଦୀ ବଲାଉଥିବା ନକଲି ମାଓବାଦୀ ଗ୍ୟାଙ୍ଗର ୪ ଜଣକୁ ବିଭିନ୍ନ ସ୍ଥାନରେ ଚଢ଼ାଉ କରି ପୋଲିସ ଗିରଫ କରିବାରେ ସଫଳ ହୋଇଥିଲା । ହେଲେ ଆଉ ଦୁଇ ଜଣ ଏବେବି ଫେରାର୍ ଥିବା ଜଣାପଡ଼ିଛି । ଗିରଫ ଚାରିଜଣ ହେଲେ ସିମନବାଡ଼ି ଗ୍ରାମର କୃପାକର ମୁଖୀ(ବାଣୁଆ),ଅଶୋକ ରଞ୍ଜନ ନାୟକ(ଡିଲୁ),ଜେରେହ ନାୟକ(ଅମର) ଓ ବାଲିଗୁଡା ଥାନା ସୀତାପଙ୍କା ଗ୍ରାମର ବଳରାମ ପ୍ରଧାନ । ଦାରିଙ୍ଗବାଡ଼ି ପୋଲିସ୍ ଘଟଣାରେ ସମ୍ପୃକ୍ତ ଚାରିଜଣ ନକଲି ମାଓବାଦୀଙ୍କୁ ଗିରଫ କରିବା ସହ ସେମାନଙ୍କ ନିକଟରୁ ନଗଦ ୧୦ହଜାର ୫୦୦ଟଙ୍କା, ୧୪ ଗ୍ରାମ ସୁନା,ଗୋଟିଏ ଦେଶୀ ବନ୍ଧୁକ,ଖଣ୍ଡା,କାତି,ଛୁରି ଜବତ କରିଛି ।