ଡ୍ରାବିଡ-ରୋହିତ ଯୋଡ଼ିରେ ଆରମ୍ଭ କଲେ ପ୍ରଥା

ନୂଆଦିଲ୍ଲୀ, (ବାଘୁଆବାର୍ତ୍ତା): ଟିମ ଇଣ୍ଡିଆ ରାଞ୍ଚି ଟି-୨୦ରେ ନ୍ୟୁଜିଲ୍ୟାଣ୍ଡକୁ ୭ ୱିକେଟରେ ପରାସ୍ତ କରିଛି । ଏହି ମ୍ୟାଚ୍ ସହ ନୂଆ ଅଧିନାୟକ ରୋହିତ ଶର୍ମା ଓ ମୁଖ୍ୟ କୋଚ୍ ରାହୁଲ ଡ୍ରାବିଡଙ୍କ ଯୋଡ଼ି ଭାରତ ପାଇଁ ଟି-୨୦ ସିରିଜ୍ ଜିତିଛନ୍ତି । ଏବେ ୩ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍କୁ ଭାରତ ଆଗୁଆ ୨-୦ରେ କବଜା କରି ନେଇଛି । ଆସନ୍ତାକାଲି କୋଲକାତାରେ ୩ୟ ଟି-୨୦ ଖେଳାଯିବ। ତେବେ ରାଞ୍ଚି ଟି-୨୦ରେ ସମସ୍ତଙ୍କ ନଜରକୁ ଆସିଥିଲେ ଡେବ୍ୟୁଟାଣ୍ଟ ହର୍ଷଲ ପଟେଲ । ସେ ଆଇପିଏଲ ୨୦୨୧ରେ ସର୍ବାଧିକ ୱିକେଟ ଦଖଲକାରୀ ବୋଲର ମାନ୍ୟତା ପାଇଥିଲେ । ମ୍ୟାଚ୍ ପୂର୍ବରୁ ତାଙ୍କୁ ଭେଟରାନ ଦ୍ରୁତ ବୋଲର ଅଜିତ ଅଗରକର ଭାରତୀୟ କ୍ୟାପ୍ ପ୍ରଦାନ କରିଥିଲେ । ମ୍ୟାଚରେ ହର୍ଷଲ ୪ ଓଭରରେ ୨୫ ରନ୍ ବ୍ୟୟ କରି ୨ଟି ୱିକେଟ ଦଖଲ କରିଥିଲେ । ଏହି ପ୍ରଦର୍ଶନ ପାଇଁ ତାଙ୍କୁ ମ୍ୟାନ ଅଫ ଦି ମ୍ୟାଚ୍ ମଧ୍ୟ ମିଳିଥିଲା । ତେବେ ଅଗରକର ମ୍ୟାଚ ପୂର୍ବରୁ ହର୍ଷଲଙ୍କୁ ଭାରତୀୟ କ୍ୟାପ୍ ଦେବାକୁ ଘଟଣାକୁ ନେଇ କିମ୍ବଦନ୍ତୀ କ୍ରିକେଟର ସୁନୀଲ ଗାଭାସ୍କର ବଡ଼ ବୟାନ ଦେଇଛନ୍ତି । ମ୍ୟାଚ୍ରେ କମେଣ୍ଟ୍ରୀ କରୁଥିବା ବେଳେ ସୁନୀଲ ଗାଭାସ୍କର କହିଛନ୍ତି, “ରାହୁଲ ଡ୍ରାବିଡ ପୁରୁଣା ପ୍ରଥା ପୁଣି ଆରମ୍ଭ କରିଛନ୍ତି । ପୁରୁଣା ପ୍ରଥା ଅନୁଯାୟୀ ପୂର୍ବତନ କ୍ରିକେଟର ଭାରତ ପାଇଁ ଡେବ୍ୟୁ କରୁଥିବା ଯୁବ ଖେଳାଳିଙ୍କୁ କ୍ୟାପ ଦେଉଥିଲେ । ଅଜିତ ଅଗରକରଙ୍କ ଠାରୁ ହର୍ଷଲ ପଟେଲ ଭାରତୀୟ କ୍ୟାପ ଗ୍ରହଣ କରିଛନ୍ତି । ଏହା ନିଶ୍ଚିତ ଗୋଟିଏ ଭଲ ପରମ୍ପରା । ଅନୀଲ କୁମ୍ବଲେ ଏହି ପ୍ରଥା ଆରମ୍ଭ କରିଥିଲେ । ମ୍ୟାଚ୍ ଦିନ ଯେଉଁ ପୁରୁଣା ଖେଳାଳି ପଡ଼ିଆରେ ଉପସ୍ଥିତ ରହୁଥିଲେ, ତାଙ୍କ ଦ୍ୱାରା ନୂଆ ଖେଳାଳିଙ୍କୁ ଭାରତୀୟ କ୍ୟାପ ଦିଆଯାଉଥିଲା । ରବି ଶାସ୍ତ୍ରୀ-ବିରାଟ କୋହଲିଙ୍କ ସମୟରେ ଏହି ପ୍ରଥା ବନ୍ଦ ହୋଇଯାଇଥିଲା । ରାହୁଲ ଡ୍ରାବିଡ ଓ ରୋହିତ ପୁଣି ଏହି ପ୍ରଥା ଆରମ୍ଭ କରିଛନ୍ତି ।