ନାବାଳକ ସମେତ ୫ ଜଣଙ୍କୁ ଗିରଫ
ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଶରଣକୁଳ ଥାନା ଅନ୍ତର୍ଗତ ଚଡ଼େୟାପଲ୍ଲୀ ଗ୍ରାମରେ ଗତ ଜାନୁୟାରୀ ମାସ ୨୦ ତାରିଖରେ ଅନୁଷ୍ଠିତ ତାରିଣୀ ଯାତ୍ରାରେ ଜଣେ ଯୁବକଙ୍କୁ ସଂଘବଦ୍ଧ ଆକ୍ରମଣ କରାଯାଇଥିଲା । ଉକ୍ତ ଯୁବକ ହେଲେ ପଞ୍ଚରିଡ଼ା ମାନପୁର ଗ୍ରାମର ପରମାନନ୍ଦ ବାଘ । ତାଙ୍କୁ ଗୁରୁତର ଅବସ୍ଥାରେ ଶରଣକୁଳ ସ୍ୱାସ୍ଥ୍ୟ କେନ୍ଦ୍ର ଓ ପରେ ନୟାଗଡ଼ ମୁଖ୍ୟ ଚିକିତ୍ସାଳୟରେ ଭର୍ତ୍ତୀ କରାଯାଇଥିଲା । ସେଠାରୁ ଭୁବନେଶ୍ୱର ସମ ହସ୍ପିଟାଲ ଓ ପରେ କଟକ ସମ ହସ୍ପିଟାଲକୁ ପଠାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୁଲିସ ସୂଚନାନୁସାରେ, ଜାନୁୟାରୀ ୨୦ ତାରିଖ ଦିନ ଚଡ଼େୟାପଲ୍ଲୀ ଗ୍ରାମ ତାରିଣୀ ଯାତ୍ରାକୁ ପରମାନନ୍ଦ ଏବଂ ତାଙ୍କ ଭଉଣୀ ଏକ ସ୍କୁଟିରେ ବୁଲିବାକୁ ଯାଇଥିଲେ । ଗାଁ ମୁଣ୍ଡ ପାଖରେ ସ୍କୁଟି ରଖି ଯାତ୍ରା ଦେଖିବା ସମୟରେ ହଠାତ୍ ତାଙ୍କୁ ସଂଘବଦ୍ଧ ଆକ୍ରମଣ କରାଯାଇଥିଲା । ଏହା ପରେ ତାଙ୍କୁ ଟେକି ନେଇ ପଞ୍ଚାୟତ ଅଫିସ ନିକଟରେ ନିର୍ଦ୍ଧ୍ୱମ ମାଡ଼ ମାରିଥିଲେ । ଏହାକୁ ନେଇ ଅଭିଯୋଗ ଆଧାରରେ ଶରଣକୁଳ ଥାନାରେ ଏକ ମାମଲା ରୁଜୁ ହୋଇଥିଲା । ନୟାଗଡ଼ ଆରକ୍ଷୀ ଅଧିକ୍ଷକ ନିର୍ଦ୍ଦେଶକ୍ରମେ ଶରଣକୁଳ ପୁଲିସ ଏବଂ ନୟାଗଡ଼ ଟାଉନଥାନା ପୁଲିସକୁ ନେଇ ଏକ ସ୍ୱତନ୍ତ୍ର ଟିମ ଗଠନ କରାଯାଇଥିଲା । ନୟାଗଡ଼ ଏସଡିପିଓ ଜ୍ୟୋତି ରଞ୍ଜନ ସାମନ୍ତରାୟ ଏହାର ନେତୃତ୍ୱ ନେଇଥିଲେ । ପୁଲିସ ଟିମ ଭୁବନେଶ୍ୱରର ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତ ୪ ଜଣଙ୍କୁ ଗିରଫ କରିଛନ୍ତି । ଅଭିଯୁକ୍ତମାନେ ହେଲେ ଚଡ଼େୟାପଲ୍ଲୀ ଗ୍ରାମର କାହ୍ନୁଚରଣ ବିଶ୍ୱାଳ, ସୋନୁ ନିଗମ, ରତିକାନ୍ତ ମନ୍ତ୍ରୀ, ଶଙ୍କର ଚୈାଧୁରୀ । ଏମାନଙ୍କ ସହ ଜଣେ ନାବାଳକକୁ ଗିରଫ କରାଯାଇଥିବା ଜିଲ୍ଲା ପୁଲିସ ମୁଖ୍ୟାଳୟରୁ ସୂଚନା ମିଳିଛି ।
