ଢେଙ୍କାନାଳ, (ବାଘୁଆବାର୍ତ୍ତା): ଓଡିଶାରୁ ରାଜ୍ୟ ବାହାରକୁ ବେଧଡ଼କ ଚାଲିଛି ଗୋ-ମାଂସ ବେଆଇନ ଚାଲାଣ । କଟକ ତିଗିରିଆ ଅଞ୍ଚଳରୁ ଢେଙ୍କାନାଳ ଦେଇ ଟନ ଟନ ଚାଲାଣ ହେଉଛି ଗୋ-ମାଂସ । ବିଶେଷ ସୂତ୍ରରୁ ଖବର ପାଇ ଗୁରୁବାର ବିଳମ୍ବିତ ରାତିରେ ଏପରି ଏକ ଗାଡିକୁ ମାଡି ବସିଛି ଢେଙ୍କାନାଳ ଟାଉନ ଥାନା ପୋଲିସ । ସୂତନାଯୋଗ୍ୟ ଯେ, ଆଠଗଡ ତିଗିରିଆ ଅଞ୍ଚଳରୁ ଶଙ୍କରପୁର ଛକ ଓ ଢେଙ୍କାନାଳ ଦେଇ ଗୋମାଂସ ବୋଝେଇ କଣ୍ଟେନେରଟି ପଶ୍ଚିମବଙ୍ଗ କୋଲକତା ଅଞ୍ଚଳକୁ ଯାଉଥିଲା । ବିଶେଷ ସୂତ୍ରରୁ ସୂଚନା ପାଇ ଢେଙ୍କାନାଳ ସହରର କଲେଜ ବାଇପାସରୁ ପିଛା କରଥିଲା ଟାଉନ ପୋଲିସ । ତେବେ ଗୋବିନ୍ଦପୁର ଫାଣ୍ଡି ପୋଲିସ ସହାୟତାରେ ଗୋବିନ୍ଦପୁର ଫାଣ୍ଡି ନିକଟରେ ଏହି କଣ୍ଟେନେରକୁ କାବୁ କରିଥିଲା ପୋଲିସ । ଏହି ଗୋରୁ ବୋଝେଇ କଣ୍ଟେନର ପଛରେ ଯାଉଥିବା ଦୁଇଟି ଗାଡିରେ ମାଂସ ଚାଲାଣ କରି ମାଫିଆମାନେ ଫେରାର ହେବାରେ ସକ୍ଷମ ହୋଇଛନ୍ତି । ତେବେ ମାଂସ ବୋଝେଇ କଣ୍ଟେନେର ଜବତ କରିଛି ପୋଲିସ । ଗାଡିର ଡ୍ରାଇଭରକୁ ଗିରଫ କରି ଯାଞ୍ଚ କରାଯାଇଛି । ତେବେ ତିଗିରିଆ ଅଞ୍ଚଳରୁ ପ୍ରାୟ ୭ ଟନ୍ରୁ ଉର୍ଦ୍ଧ୍ବ ଗୋ-ମାଂସ କୋଲକତା ଅଞ୍ଚଳକୁ ଯାଉଥିବା ପୋଲିସ ପ୍ରାଥମିକ ତଦନ୍ତରୁ ଜାଣିପାରିଛି । ଏହା ପଛରେ ଏକ ଗୋ-ମାଂସ ଚାଲାଣକାରୀ ରାକେଟ କାମ କରୁଥିବା ତଦନ୍ତରୁ ଜଣାପଡିଛି । ତେବେ ଏତେ ମାତ୍ରାରେ ଗୋ-ମାଂସ ଚାଲାଣକୁ ନେଇ ସ୍ଥାନୀୟ ଅଞ୍ଚଳରେ ବେଶ ଆଲୋଡନ ସୃଷ୍ଟି କରିଛି ।





