ଯୁବତୀଙ୍କ ସନ୍ଦେହ ଜନକ ମୃତ୍ୟୁ: ମାଟିତଳେ ପୋତି ଦେଇଥିଲେ ପରିବାର ଲୋକ

ଯାଜପୁର, (ବାଘୁଆବାର୍ତ୍ତା): ଜଣେ ଯୁବତୀର ସନ୍ଦେହ ଜନକ ଅବସ୍ଥାରେ ମୃତ୍ୟୁ ହୋଇଥିବା ବେଳେ ପରିବାର ଲୋକ କାହାକୁ କିଛି ନଜଣାଇ ମାଟି ତଳେ ପୋତି ଦେଇଥିଲେ । ଆଜି ପୁଲିସ୍ ଖବର ପାଇ ଘଟଣାସ୍ଥଳରେ ପହଞ୍ଚି ମାଜିଷ୍ଟ୍ରେଟଙ୍କ ଉପସ୍ଥିତିରେ ମାଟି ତଳେ ପୋତା ହୋଇଥିବା ଯୁବତୀର ଶବ ଉଦ୍ଧାର କରିଛି ପୁଲିସ୍ । ଏଭଳି ଘଟଣା ଘଟିଛି ଓସିସି କଲୋନୀ ଅଞ୍ଚଳରେ । ସୂଚନାନୁସାରେ, ଯାଜପୁର ଜିଲ୍ଲା ଧର୍ମଶାଳା ଥାନା ଓସିସି କଲୋନିରେ ଜଣେ ଯୁବତୀର ମୃତ୍ୟୁ ହୋଇଥିଲା । ହେଲେ ପରିବାର ଲୋକ କାହାକୁ କିଛି ନଜଣାଇ ଗାଁ ଶ୍ମଶାନରେ ଶବକୁ ଦାହ ନକରି ପୋତି ଦେଇଥିଲେ । ଯୁବତୀର ମୃତ୍ୟୁକୁ ନେଇ ସନ୍ଦେହ ହେବା ପୁଲିସ୍ ବିଶେଷ ସୁତ୍ରରୁ ଖବର ପାଇ ହଠାତ୍ ମୃତ ଯୁବତୀଙ୍କ ଘରେ ପହଞ୍ଚିଥିଲା । ପରିବାର ଲୋକଙ୍କୁ ପଚରାଉଚରା କରିବା ପରେ ଆଜି ମାଜିଷ୍ଟ୍ରେଟଙ୍କ ଉପସ୍ଥିତିରେ ଜେସିବି ମେସିନରେ ମାଟି ଖୋଳି ଶବ ଉଦ୍ଧାର କରି ଶବ ବେବଚ୍ଛେଦ କରିବା ପାଇଁ ଯାଜପୁର ହସ୍ପିଟାଲକୁ ପଠାଇବା ସହିତ ଧର୍ମଶାଳା ଥାନାରେ ଏକ ଅପମୃତ୍ୟୁ ମାମଲା ଋଜୁକରି ତଦନ୍ତ ଆରମ୍ଭ ହୋଇଛି । ଉଦ୍ଧାର ହୋଇଥିବା ଶବଟି ୨୨ବର୍ଷିୟ ଉପାସନା ଜେନାଙ୍କର ବୋଲି ଜଣାପଡିଛି । ଶବ ବେବଚ୍ଛେଦ ରିପୋର୍ଟ ଆସିଲେ ସତ୍ୟାସତ୍ୟ ଜଣାପଡିବ ବୋଲି ଧର୍ମଶାଳା ପୁଲିସ ପକ୍ଷରୁ ସୂଚନା ମିଳିଛି ।