ନୂଆଦିଲ୍ଲୀ, (ବାଘୁଆବାର୍ତ୍ତା): ମହାମାରୀ କରୋନା ସାରା ରାଜ୍ୟକୁ କବଳିତ କରି ରଖିଥିବା ବେଳେ ଦ୍ୱିତୀୟ ଲହରୀ ସବୁଠୁ ବଳି ଯାଇଛି । ଯେଉଁଥି ପାଇଁ ପ୍ରତିଦିନ ସଂକ୍ରମିତ ରୋଗୀ ଅକ୍ସିଜେନ୍ ଅଭାବରୁ ମତ୍ୟୁ ମୁଖରେ ପଡୁଛନ୍ତି । ଯାହାକୁ ନେଇ ଦିଲ୍ଲୀ ହାଇକୋର୍ଟ ସ୍ଥାନୀୟ କେଜ୍ରିୱାଲ ସରକାରଙ୍କ ଉପରେ ବର୍ଷିଥିବା ଜଣାପଡିଛି । ଦିଲ୍ଲୀ ହାଇକୋର୍ଟ ଦିଲ୍ଲୀ ସରକାରଙ୍କୁ ସିଧା ସିଧା ଶୁଣାଇଛନ୍ତି ଯେ, ଯଦି ମ୍ୟାନେଜ୍ କରି ନପାରୁଛ କହିଦିଅ । ଆମେ କେନ୍ଦ୍ରକୁ ଦାୟୀତ୍ୱ ଦେବୁ ବୋଲି ଦିଲ୍ଲୀ ହାଇକୋର୍ଟ କହିଛନ୍ତି । ହସ୍ପିଟାଲମାନଙ୍କରେ କରୋନା ଆକ୍ରାନ୍ତଙ୍କ ଚିକିତ୍ସାକୁ ନେଇ ଶୁଣାଣିରେ ରାଜ୍ୟ ସରକାରଙ୍କ ଓକିଲ ରାହୁଲ ମେହେରା ଅକ୍ସିଜେନ ଯୋଗାଣ ଲାଗି ରାଜ୍ୟ ସରକାର ଏକ ୱେବ୍ ପୋର୍ଟାଲ ଖୋଲିଥିବା ନେଇ କୋର୍ଟଙ୍କୁ କହିଥିଲେ । ଅକ୍ସିଜେନ ଅଭାବରୁ ଯେଉଁମାନଙ୍କର ମୃତ୍ୟୁ ହୋଇଛି ସେମାନଙ୍କ ଲାଗି ଦିଲ୍ଲୀ ସରକାର କ୍ଷତିପୁରଣ ଦେବା ଦରକାର ବୋଲି କୋର୍ଟ ରାୟ ଦେଇଛନ୍ତି । ଉକ୍ତ ଶୁଣାଣିରେ କୋର୍ଟଙ୍କ ନିର୍ଦ୍ଦେଶାନୁସାରେ, ମୁଲତାନ ଏୟାର, ସେଠ ଏୟାର ଓ ବିନାୟକ ଅକ୍ସିଜେନ୍ ସପ୍ଲାୟର ଉପସ୍ଥିତ ଥିଲେ । ନିର୍ଦ୍ଦେଶ ସତ୍ତେ୍ୱ ଯେଉଁମାନେ କୋର୍ଟରେ ଅନୁପସ୍ଥିତ ଥିଲେ ସେମାନଙ୍କ ବିରୋଧରେ ଅଦାଲତ ଅବମାନନା ମୋକଦ୍ଦମା ଋଜୁ ହୋଇଛି । ଶୁଣାଣି ବେଳେ କୋର୍ଟ ସେଠ୍ ଏୟାରର ଯାଞ୍ଚ ସହ କାର୍ଯ୍ୟାନୁଷ୍ଠାନ ଲାଗି ନିର୍ଦ୍ଦେଶ ଦେଇଥିବା ଜଣାପଡିଛି ।





