ପ୍ରକାଶ ପାଇଲା ଶିକ୍ଷକ ବଦଳି କ୍ୟାଲେଣ୍ଡର

ଭୁବନେଶ୍ୱର, (ବାଘୁଆବାର୍ତ୍ତା): ଶିକ୍ଷାବର୍ଷ ୨୦୨୫-୨୬ ପାଇଁ ରାଜ୍ୟର ସମସ୍ତ ପ୍ରାଥମିକ ଓ ମାଧ୍ୟମିକ ସ୍କୁଲର ଶିକ୍ଷକମାନଙ୍କ ବଦଳି ପ୍ରକ୍ରିୟା କ୍ୟାଲେଣ୍ଡର ପ୍ରକାଶ ପାଇଛି । ବଦଳି ପ୍ରକ୍ରିୟା ପାଇଁ ଆଜିଠୁୁ ଆବେଦନ ଆରମ୍ଭ ହେବ । ଯାହା ୩୦ ତାରିଖ ପର୍ଯ୍ୟନ୍ତ ଚାଲିବ । ଏନେଇ ବୁଧବାର ଦୁଇଟି ପୃଥକ ଚିଠି ପ୍ରକାଶ ପାଇଛି । ମାଧ୍ୟମିକ ସ୍କୁଲ ଶିକ୍ଷକଙ୍କ ବଦଳି ପାଇଁ ସ୍କୁଲ ଓ ଗଣଶିକ୍ଷା ବିଭାଗର ଯୁଗ୍ମ ସଚିବ ଗିରିଶ ଚନ୍ଦ୍ର ସିଂ ମାଧ୍ୟମିକ ଶିକ୍ଷା ନିର୍ଦ୍ଦେଶକଙ୍କୁ ପ୍ରଦାନ କରିଥିବା ବେଳେ ଆଉ ଏକ ଚିଠି ଅତିରିକ୍ତ ସଚିବ ଯଦୁମଣି ମହଲା ପ୍ରାଥମିକ ଶିକ୍ଷା ନିର୍ଦ୍ଦେଶକଙ୍କୁ ପ୍ରଦାନ କରିଛନ୍ତି । ମାଧ୍ୟମିକ ସ୍କୁଲର ପ୍ରଧାନଶିକ୍ଷକ ଓ ଅନ୍ୟ ଶିକ୍ଷକଙ୍କ ହେବାକୁ ଥିବା ବଦଳି ଆବେଦନ ଗୁରୁବାରଠାରୁ ଆରମ୍ଭ ହେବ । ୩୦ରେ ଆବେଦନ ସରିବା ପରେ ୩୧ ତାରିଖରେ ଜିଲ୍ଲା ଶିକ୍ଷାଧିକାରୀମାନେ ଆବେଦନକୁ ଅପଲୋଡ୍ କରିବେ । ଜୁନ୍ ୫ରେ ସ୍ୱାସ୍ଥ୍ୟଗତ ସମସ୍ୟା ଥିବା ଶିକ୍ଷକଙ୍କ ଆବେଦନକୁ ରାଜ୍ୟ ମେଡିକାଲ ବୋର୍ଡ ତର୍ଜମା କରିବ । ଜୁନ୍ ୧୧ରେ ଯୋଗ୍ୟ ବିବେଚିତ ଶିକ୍ଷକଙ୍କ ତାଲିକା ପ୍ରକାଶ ପରେ ୧୩ ତାରିଖରେ ବଦଳି ନିର୍ଦ୍ଦେଶ ବାହାରିବ । ସେହିପରି ଯେଉଁ ସ୍କୁଲରେ ଆବଶ୍ୟକତାଠାରୁ ଅଧିକ ଶିକ୍ଷକ ରହିଛନ୍ତି ସେମାନଙ୍କ ତାଲିକା ମେ ୩୧ରେ ପ୍ରକାଶ ପାଇବ । ଜୁନ୍ ୧୫ ସୁଦ୍ଧା ଡିଇଓମାନେ ସମାନୁପାତିକ ଶିକ୍ଷକ ପ୍ରସ୍ତାବ ପ୍ରସ୍ତୁତ କରିବେ । ଜୁନ୍ ୩୦ ତାରିଖ ସୁଦ୍ଧା ବଦଳି ନିର୍ଦ୍ଦେଶ ପ୍ରଦାନ କରାଯିବ । ସେହିପରି ପ୍ରାଥମିକ ସ୍କୁଲମାନଙ୍କରେ ଥିବା ଶିକ୍ଷକ ଜିଲ୍ଲାସ୍ତରୀୟ, ଅନ୍ତଃଜିଲ୍ଲାରେ ଥିବା ଦୁଇ ଜଣଙ୍କ ମଧ୍ୟରେ ଆପୋସ ବଦଳି ଓ ଜିଲ୍ଲା ମଧ୍ୟରେ ବଦଳି ପାଇଁ ମଧ୍ୟ ଆଜିଠୁ ଆବେଦନ କରାଯିବ । ୩୦ ତାରିଖରେ ଆବେଦନ ସରିବା ପରେ ଜୁନ୍ ୩ ତାରିଖ ସୁଦ୍ଧା ପ୍ରସ୍ତାବକୁ ବିଇଓମାନେ ଡିଇଓଙ୍କୁ ଦେବେ । ଜୁନ୍ ୫ ସୁଦ୍ଧା ଏହି ପ୍ରସ୍ତାବକୁ ଶିକ୍ଷା ନିର୍ଦ୍ଦେଶକଙ୍କୁ ଦିଆଯିବ । ଜୁନ୍ ୯ ସୁଦ୍ଧା ନିର୍ଦ୍ଦେଶକ ଏହି ପ୍ରସ୍ତାବକୁ ଅନୁମୋଦନ କରିବେ । ୧୧ ତାରିଖରେ ତାଲିକା ଓସେପା ୱେବସାଇଟ୍ରେ ମିଳିବ । ୧୩ ତାରିଖରେ ନୂଆ ସ୍ଥାନରେ ଯୋଗଦେବାକୁ ନିର୍ଦ୍ଦେଶ ରହିଛି । ଯଦି କୌଣସି ସ୍କୁଲରେ ଆବଶ୍ୟକତା ଠାରୁ ଅଧିକ କିମ୍ବା କମ୍ ଶିକ୍ଷକ ଅଛନ୍ତି ସେମାନଙ୍କ ତାଲିକା ମେ ୧୭ରେ ଓସେପା ପ୍ରସ୍ତୁତ କରିବ । ମେ ୨୬ ସୁଦ୍ଧା ଏକ କମିଟି ଗଠନ କରାଯିବ, ଜୁନ୍ ୩ ସୁଦ୍ଧା ତାଲିକାକୁ କମିଟି ଚୂଡ଼ାନ୍ତ କରିବ । ଜୁନ ୧୦ ସୁଦ୍ଧା ସମସ୍ତ ନିଷ୍ପତ୍ତି ବିଭାଗକୁ ଜଣାଇ ଦିଆଯିବ । ଜୁନ୍ ୧୨ ତାରିଖ ସୁଦ୍ଧା ବିଇଓ, ଡିଇଓ ବଦଳି ନିର୍ଦ୍ଦେଶ ପ୍ରକାଶ କରିବା ସହ ଓସେପାକୁ ପ୍ରଦାନ କରାଯିବ । ଜୁନ୍ ୧୩ ତାରିଖ ସୁଦ୍ଧା ସ୍କୁଲରେ ଶିକ୍ଷକ ଯୋଗଦେବେ ।