ବଲାଙ୍ଗିର (ବାଘୁଆବାର୍ତ୍ତା): ସମ୍ପତ୍ତି ପାଇଁ ଜଣେ ବ୍ୟକ୍ତି ତାଙ୍କ ବଡ଼ ଭାଇଙ୍କୁ ହତ୍ୟା କରିଥିବା ଅଭିଯୋଗ ହୋଇଛି । ଘଟଣାଟି ବଲାଙ୍ଗିର ଜିଲ୍ଲା କୁସମେଲ ଗାଁର । ମୃତ ବ୍ୟକ୍ତିଙ୍କ ନାଁ ଚନ୍ଦ୍ରଶେଖର କରଚେଲ । ତାଙ୍କ ସାନ ଭାଇ ତଥା ଅଭିଯୁକ୍ତ ନୀରଜ କରଚେଲ । ଚନ୍ଦ୍ରଶେଖରଙ୍କ ମୃତଦେହ ଆଜି ବଲାଙ୍ଗିର ସଦର ଥାନା ଅନ୍ତର୍ଗତ ଭାଲୁଡୁଙ୍ଗୁରୀ ଗାଁ ନିକଟସ୍ଥ ପାହାଡ ପାଖରୁ ମିଳିଥିଲା । ମୃତ ଦେହଟିକୁ ଦେଖି ସ୍ଥାନୀୟ ଲୋକେ ପୁଲିସକୁ ଖବର ଦେଇଥିଲେ । ବଲାଙ୍ଗୀର ଏସଡିପିଓ ତୋଫାନ ବାଗ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ । ତଦନ୍ତ ବେଳେ ଶବଟି ଚନ୍ଦ୍ରଶେଖରଙ୍କର ବୋଲି ଜଣାପଡିଥିଲା । ପୁଲିସ ମୃତଦେହକୁ ବ୍ୟବଛେଦ ପାଇଁ ବଲାଙ୍ଗିର ଭୀମଭୋଇ ମେଡିକାଲ କଲେଜ ଓ ହସପିଟାଲକୁ ପଠାଇ ଦେଇଛି । ମେ’ ୫ ତାରିଖରୁ ଚନ୍ଦ୍ରଶେଖର ନିଖୋଜ ଥିଲେ । ନୀରଜଙ୍କ ସହିତ ତାଙ୍କର ସମ୍ପତ୍ତି ଭାଗବଣ୍ଟାକୁ ନେଇ ଝଗଡା ଲାଗି ରହିଥିଲା । ତେଣୁ ନୀରଜ ତାଙ୍କୁ ହତ୍ୟା କରି ପାହାଡ ନିକଟରେ ଫିଙ୍ଗି ଦେଇଛି ବୋଲି ପରିବାର ଲୋକେ ଅଭିଯୋଗ କରିଛନ୍ତି । ଅଭିଯୁକ୍ତ ନୀରଜ କରଚେଲଙ୍କୁ ସଦର ଥାନା ପୁଲିସ ଅଟକ ରଖି ପଚରାଉଚରା କରୁଛି ।
