ନୟାଗଡ଼,(ବାଘୁଆବାର୍ତ୍ତା): ସାରା ବିଶ୍ୱରେ ଆତଙ୍କ ସୃଷ୍ଟି କରିଥିବା କରୋନା ମୁକାବିଲା ପାଇଁ ଭାରତ ସରକାର ସାରା ଭାରତକୁ ୨୧ ଦିନ ପାଇଁ ଲକ୍ ଡାଉନ ଘୋଷଣା କରିଥିବା ବେଳେ ଏହା ଆଜି ଆଜି ୭ମ ଦିନରେ ପହଂଚିଛି । ଦିନ ଯେତିକି ବିତୁଛି ଭୟ ସେତିକି ବଢ଼ୁଛି । ଏହାକୁ ନେଇ ଜିଲ୍ଲା ପ୍ରଶାସନ ସାରା ଜିଲ୍ଲାରେ କଟକଣା କରିଥିବା ବେଳେ ଆଜି ଦଶପଲ୍ଲା ସହରରେ ଦଶପଲ୍ଲା ବିଡିଓ ଆଜି ଗୋଟିଏ ଦିନରେ ୨୦ରୁ ଉର୍ଦ୍ଧ୍ୱ ବାଇକ ଓ ଗୋଟିଏ ଅଟୋ ଜବତ କରିଥିବା ଜଣାଯାଇଛି । ସୂଚନାନୁସାରେ, ଦଶପଲ୍ଲା ବିଡିଓ ଦେବୀ ପ୍ରସାଦ ମହାନ୍ତି ବାହାନାକାରୀ ବାଇକ ଆରୋହୀଙ୍କୁ ଆଜି ସିଧା ସଳଖ ଚାଲିକି ଯିବାର ମଜା ଚଖାଇଛନ୍ତି । ଯେଉଁ ବ୍ୟକ୍ତିମାନେ କ୍ଷୀର ପ୍ୟାକେଟ୍, ଔଷଧ, ପରିବା ବାହାନାରେ ଆସି ସହର ମଧ୍ୟରେ ଖଙ୍କି ମାରୁଛନ୍ତି । ସେମାନଙ୍କ ବାଇକକୁ ଆସନ୍ତା ୧୪ ତାରିଖ ପର୍ଯ୍ୟନ୍ତ ବିଡିଓ ଜବତ କରିଥିବା ଜଣାଯାଇଛି । ଆଜି ବାଇକ ସହ ଏକ ଅଟୋକୁ ମଧ୍ୟ ଜବତ କରାଯାଇଥିବା ବେଳେ ଏହି ବ୍ୟକ୍ତିମାନେ ମୋଟ ଅଙ୍କର ଜୋରିମାନା ଦେଇ ୧୪ ତାରିଖ ପରେ ନିଜ ବାଇକ ନେବେ ବୋଲି ଜଣାଯାଇଛି । ଯାହାକୁ ନେଇ ଦଶପଲ୍ଲା ଓ ଆଖପାଖ ଅଂଚଳରୁ ଆସି ସହରରେ ଆଡ୍ଡା ମାରୁଥିବା ଲୋକଙ୍କୁ ସଂଖ୍ୟା କମିଥିବା ଜଣାଯାଇଛି ।
