ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଦଶପଲ୍ଲା ଥାନା ନିକଟସ୍ଥ ଏକ ଜଳଖିଆ ଦୋକାନରେ କାମ କରୁଥିବା ଜଣେ ଯୁବକଙ୍କ ଝୁଲନ୍ତା ଶବ ଆଜି ଦୋକାନ ସାମ୍ନା ଲିମ୍ବ ଗଛରୁ ଉଦ୍ଧାର କରାଯାଇଛି । ସୂଚନାନୁସାରେ, ନୂଆଗାଁ ବ୍ଲକ ଅନ୍ତର୍ଗତ ବାହାଡ଼ଝୋଲା ଗ୍ରାମର ପବିତ୍ର କୁମାର ସାହୁଙ୍କ ପୁଅ ମନୋଜ କୁମାର ସାହୁ (୨୪) ଦୀର୍ଘଦିନ ହେବ ଦଶପଲ୍ଲା ବଜାରରେ ରହିଥିବା ତାଙ୍କ ଭିଣୋଇ ସୁରେଶ ସାହୁଙ୍କ ଜଳଖିଆ ଦୋକାନରେ କାମ କରୁଥିଲେ । ଗତକାଲି ସଟ୍ଡାଉନ୍ ଥିବାରୁ ଅନ୍ୟ କର୍ମଚାରୀମାନେ ଘରକୁ ଚାଲି ଯାଇଥିବା ବେଳେ ମନୋଜ ଏକାକୀ ଦୋକାନରେ ରହିଥିଲେ । ଆଜି ତାଙ୍କ ମୃତ ଦେହ ଦୋକାନ ସାମ୍ନା ଲିମ୍ବ ଗଛରେ ଝୁଲୁଥିବା ଦେଳା ଯାଇଥିଲା । ପୁଲିସ ଘଟଣାସ୍ଥଳରେ ପହଂଚି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଥିବା ବେଳେ ମନୋଜଙ୍କ ମୃତ୍ୟୁକୁ ନେଇ କଳ୍ପନାଜଳ୍ପନା ପ୍ରକାଶ ପାଇଛି । ତାଙ୍କୁ କେହି ହତ୍ୟା କରିଥାଇ ପାରନ୍ତି ବୋଲି ପରିବାର ଏବଂ ଅନ୍ୟ ଲୋକ ସନ୍ଦେହ ସୃଷ୍ଟି କରୁଥିବା ବେଳେ ଏହା ଆତ୍ମହତ୍ୟା ବୋଲି ଅନୁମାନ କରାଯାଉଛି ।
