ଅବ୍ୟବସ୍ଥାରେ ବଡ଼ପଣ୍ଡୁସର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର

ନୟାଗଡ଼, (ବାଘୁଆବାର୍ତ୍ତା) : ବଡ଼ପଣ୍ଡୁସର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ୯ଜଣ ଡାକ୍ତରଙ୍କ ଆବଶ୍ୟକତା ରହିଥିବା ବେଳେ ସରକାରଙ୍କ ତରଫରୁ ୫ ଜଣ ଡାକ୍ତର ନିଯୁକ୍ତ ହୋଇଛନ୍ତି । ସେମାନଙ୍କ ମଧ୍ୟରୁ ୩ଜଣ ଡାକ୍ତର ନିୟମିତ ଆସୁନଥିବା ବେଳେ ଡାକ୍ତରଖାନା ଦାୟିତ୍ୱରେ ଥିବା ଡା. ଆଶୁତୋଷ ପଟ୍ଟନାୟକ ସଦାସର୍ବଦା ଅନୁପସ୍ଥିତ ରହୁଥିବାରୁ କୈାଣସି ସରକାରୀ କାର୍ଯ୍ୟ ହୋଇପାରୁନାହିଁ । ଲୋକେ ଜନ୍ମ ପ୍ରମାଣପତ୍ର ପାଇଁ ବାରମ୍ବାର ଦୈଡ଼ି ନିରାଶ ହେଉଛନ୍ତି । ଏପରିକି ସରକାରୀ ମାଗଣା ଔଷଧକୁ ଡାକ୍ତରଖାନା ପଛପଟେ ପୋଡ଼ି ଦିଆ ଯାଇଥିବା ଦେଖିବାକୁ ମିଳିଛି । ଏଠାରେ ମାତ୍ର ଜଣେ ଠିକା ଡାକ୍ତର ଏବଂ ଆୟୁଷ ଡାକ୍ତର ନିୟମିତ ରୋଗୀ ଦେଖି ଫେରି ଯାଉଥିବା ବେଳେ ଦିନ ୧୨ଟା ପରଠାରୁ ଡାକ୍ତରଖାନା ଫାଙ୍କା ପଡ଼ୁଛି । ବଡ଼ପଣ୍ଡୁସର ଗ୍ରାମର ଶତାଧିକ ମହିଳା ଓ ପୁରୁଷ ଦିନ ୧୦ ଘଟିକାରୁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଘେରାଉ କରିବା ସହ ଡାକ୍ତରଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଦୀର୍ଘ ତିନିଘଣ୍ଟା ପରେ ଅତିରିକ୍ତ ସ୍ୱାସ୍ଥ୍ୟ ଅଧିକାରୀ ଡା. ସୁରେଶ ମିଶ୍ର ଘଟଣାସ୍ଥଳରେ ପହଂଚି ଉତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଛି ।