ଉମରକୋଟ, (ବାଘୁଆବାର୍ତ୍ତା): ଉମରକୋଟ ପୋଲିସକୁ ବଡ ସଫଳତା । ୩ ଲୁଟେରାଙ୍କୁ ଗିରଫ କରିବା ସହ ୧ ଲକ୍ଷ ୮୪ ହଜାର ଟଙ୍କା ଓ ଗୋଟିଏ ଫୋନ୍ ଉମରକୋଟ ପୋଲିସ ଜବତ କରିଛି । ନବରଙ୍ଗପୁର ଉମରକୋଟ ତୋହରା ପଞ୍ଚାୟତର ନିଧନ ଗୌଡ଼ ଜାମପାଣି ଗ୍ରାମର ଧନୁର୍ଜୟ ଗୌଡ଼ ଓ ତାଙ୍କ ଦୁଇ ପୁଅଙ୍କଠାରୁ ଏକ ଜମି ବନ୍ଧକ ବାବଦକୁ ଦେଇଥିବା ୨ ଲକ୍ଷ ୧୦ ହଜାର ଟଙ୍କା ଫେରସ୍ତ ପାଇଥିଲେ । ସେହି ଟଙ୍କାକୁ ନିଜେ ଗଣି ନପାରିବାରୁ ନିକଟସ୍ଥ ଗାଁ କେରିପଦର ନିଜ ସମ୍ପର୍କୀୟ ଭାଇ ଅଗାଧୁ ଗୌଡ଼ଙ୍କ ପାଖକୁ ଯାଇଥିଲେ । ଟଙ୍କା ଗଣାଇବା ପରେ ନିଧନ ଗୋଡ଼ ଜାମପାଣି ଓ ଫୁଣ୍ଡେଲଯୋଡ଼ି ଗ୍ରାମ ଦେଇ ଉକ୍ତ ଟଙ୍କାକୁ ଏକ ରୁମାଲରେ ଗୁଡ଼ାଇ ଚାଲି ଚାଲି ଫେରୁଥିବା ସମୟରେ ବାଟରେ ଜାମପାଣି ଗ୍ରାମର ପଦ୍ମନ୍ ଗୌଡ଼, କେଶବ ଗୌଡ଼ ଓ ଜଗନ୍ନାଥ ଗୌଡ ନିଧନଙ୍କ ମୁଣ୍ଡ ପଛପଟ ଏକ ଠେଙ୍ଗାରେ ଆକ୍ରମଣ କରି ୨ ଲକ୍ଷ ୧୦ ହଜାର ଟଙ୍କା ନେଇ ଚମ୍ପଟ ମାରିଥିଲେ । ଏନେଇ ଉମରକୋଟ ଥାନାରେ ଏକ ମାମଲା ରୁଜ୍ଜୁ କରାଯାଇଥିଲା । ଘଟଣାର ତଦନ୍ତ ସମୟରେ ସାଇବର ୟୁନିଟ୍ର ସହାୟତା ଫଳରେ ତିନି ଅଭିଯୁକ୍ତଙ୍କୁ କୋରାପୁଟ ଜିଲ୍ଲାର କୁମୁଲି କାମତା ନିକଟରୁ ଗିରଫ କରିବା ସହ ତାଙ୍କଠାରୁ ମୋଟ ୧ ଲକ୍ଷ ୮୪ ହଜାର ଟଙ୍କା ଓ ଗୋଟିଏ ମୋବାଇଲ ଫୋନ୍ ଜବତ କରିଛି ପୋଲିସ । ଏନେଇ ଅଧିକ ତଦନ୍ତ ଜାରି ରହିଛି ।





