କେନ୍ଦ୍ର ରସାୟନ ଓ ସାର ମନ୍ତ୍ରୀଙ୍କୁ ଚିଠି ଲେଖିଲେ ରାଜ୍ୟ କୃଷି ମନ୍ତ୍ରୀ, ଖରିଫରେ ଧାର୍ଯ୍ୟଠାରୁ କମ ସାର ଯୋଗାଇ ଦିଆଯାଇଛି

ଭୁବନେଶ୍ୱର, (ବାଘୁଆବାର୍ତ୍ତା): ଖରିଫ ସମୟରେ ରାଜ୍ୟକୁ ଯେଉଁ ପରିମାଣରେ ସାର କେନ୍ଦର ସରକାର ଯୋଗାଣ କରିବା କଥା ସେହି ପରିମାଣରେ ରାଜ୍ୟକୁ କମ ମିଳିଛି । ମୁଖ୍ୟତଃ ମେ ଓ ଜୁନ ମାସ ଖରିଫ ଋତୁ ହୋଇଥିବାରୁ ଚାଷୀ ମାନଙ୍କର ସଠିକ ସମୟରେ ସାର ଆବଶ୍ୟକ କିନ୍ତୁ ଏହି ସମୟ ଭିତରେ ଯାହା ପରିସଂଖ୍ୟାନ ମିଳିଛି କେନ୍ଦ୍ର ସରକାର ଧାର୍ଯ୍ୟଠାରୁ ବହୁତ କମ ସାର ଯୋଗାଇଛନ୍ତି । ଏଥିନିମନ୍ତେ ରାଜ୍ୟ ସରକାରଙ୍କ କୃଷି ମନ୍ତ୍ରୀ ଡ.ଅରୁଣ କୁମାର ସାହୁ କେନ୍ଦ୍ର ସରକାରଙ୍କ ରସାୟନ ଓ ସାର ମନ୍ତ୍ରୀ ସଦାନନ୍ଦ ଗୌଡାଙ୍କ ପାଖକୁ ଚିଠି ଲେଖିଛନ୍ତି । ମେ ମାସରେ ରାଜ୍ୟ ୪୮.୯୫୦ ମେଟ୍ରିକ ଟନ ୟୁରିଆ ସାର ଆବଶ୍ୟକ କରୁଥିବା ବେଳେ କେନ୍ଦ୍ର ୩୪.୩୪୦ ମେଟ୍ରିକ ଟନ ୟୁରିଆ ଯୋଗାଣ କରିଛି । ଏହିପରି ଭାବେ ଜୁନ ମାସର ୧୮ ତାରିଖ ପର୍ଯ୍ୟନ୍ତ ୭୦.୮୩୦ ମେଟ୍ରିକ ଟନ ୟୁରିଆ ଦେବାକୁ ଥିବା ବେଳେ ରାଜ୍ୟକୁ ୧୮.୬୯୦ ମେଟ୍ରିକ ଟନ କେନ୍ଦ୍ର ଯୋଗାଇଛି । ସେହିପରି ମେ ଓ ଜୁନ ମାସ ୧୮ ତାରିଖ ସୁଦ୍ଧା ୩୭.୫୧୯ ମେଟ୍ରିକ ଟନ ଡି.ଏ.ପି. ୮.୮୦୩ ମେଟ୍ରିକ ଟନ ଏମ.ଓ.ପି ୪୬.୯୦୨ ମେଟ୍ରିକ ଟନ ଏନ.ପି.କେ କେନ୍ଦ୍ର ଯୋଗାଇ ଦେଇଛି । ଯେଉଁଠି ରାଜ୍ୟର ପାଇବାକୁ ହକ ଅଛି ୮୨.୦୦୦ ମେଟ୍ରିକ ଟନ ଡି.ଏ.ପି., ୨୮.୯୦୦ ମେଟ୍ରିକ ଟନ ଏମ.ଓ.ପି ଓ ୮୧.୬୦୦ ମେଟ୍ରିକ ଏନ.ପି.କେ । ଚଳିତ ଖରିଫରେ ରାଜ୍ୟକୁ ଧାର୍ଯ୍ୟ ଆମନ୍ତ୍ରିତ ପରିମାଣଠାରୁ କମ ସାର ମିଳିଥିବାରୁ ତୁରନ୍ତ କେନ୍ଦ୍ର ସରକାର ସମୁଦାୟ ସାର ଯୋଗାଇଦେବା ପାଇଁ ଚିଠିରେ ରାଜ୍ୟ କୃଷି ମନ୍ତ୍ରୀ ଦାବି କରିଛନ୍ତି ।