ଜୟପୁର, (ବାଘୁଆବାର୍ତ୍ତା): ସାଇବର ଠକଙ୍କ ହାବୁଡ଼ରେ ପଡିଲେ ଜୟପୁର ବିଧାୟକ ତାରା ପ୍ରସାଦ ବାହିନୀପତିଙ୍କ ପରିବାର । ବିଧାୟକଙ୍କ ପରିବାର ଠାରୁ ୪ ଲକ୍ଷ ଟଙ୍କା ଲୁଟିନେଲେ ଦୁର୍ବୃତ୍ତ । ଅଭିଯୋଗ ପରେ ବିହାରରୁ ଦୁର୍ବୃତ୍ତଙ୍କୁ କାବୁ କଲା କୋରାପୁଟ ପୋଲିସ । ଏମାନଙ୍କ ଠାରୁ ଦେଢ ଲକ୍ଷ ଟଙ୍କା ପୋଲିସ ଉଦ୍ଧାର କରିଥିବା ବେଳେ ବଳକା ଟଙ୍କା ପୋଲିସ ଉଦ୍ଧାର କରି ପାରିନାହିଁ । ଦୁର୍ବୃତ୍ତମାନେ କିଛି ସିମେଣ୍ଟ କମ୍ପାନୀର ଡିଲରସିପ୍ କରାଇ ଦେବାକୁ କହି ବିଧାୟକଙ୍କୁ ଫୋନ କରି ତାଙ୍କ ତଥ୍ୟ ମାଗିଥିଲେ । ଏହାସହ ଗୋଟିଏ ଲିଙ୍କ୍ ପଠାଇଥିଲେ । ଆଉ ଏହି ଲିଙ୍କରେ କ୍ଳିକ୍ କରି ଓଟିପି ସେୟାର କରିବା ପରେ ଆକାଉଣ୍ଟରୁ ୪ ଲକ୍ଷ ଟଙ୍କା କଟି ଯାଇଥିଲା । ଏହି ଟଙ୍କା ତାଙ୍କ ପରିବାରର ଜଣେ ସଦସ୍ୟଙ୍କ ଆକାଉଣ୍ଟରୁ କଟିଥିଲା । ଏହା ପରେ ଦୁର୍ବୃତ୍ତମାନେ ଡିଲରସିପ୍ କରାଇ ଦେବା ତ ଦୂରର କଥା ଆଉ ଫୋନ୍ ବି ରିସିଭ୍ କରୁନଥିଲେ । ଶେଷରେ ନିରାଶ ହୋଇ ବିଧାୟକଙ୍କ ପରିବାର କୋରାପୁଟ ପୋଲିସର ସହାୟତା ନେଇଥିଲେ । ତେଣୁ କୌଣସି ଲୋଭର ବଶବର୍ତ୍ତୀ ନହୋଇ ସଚେତନ ରହିଲେ ହିଁ ସାଇବର ଠକଙ୍କ କବଳରୁ ବର୍ତ୍ତି ହେବ ବୋଲି ବିଧାୟକ ତାରା ପ୍ରସାଦ ବାହିନୀପତି କହିଛନ୍ତି ।





