ପାଟଣାଗଡ, (ବାଘୁଆବାର୍ତ୍ତା) ଲକଡାଉନ୍ ବେଳେ ସବୁକିଛି ବନ୍ଦ ଥିବା ବେଳେ ଜମୁଛି ଗଞ୍ଜେଇ ବେପାର। ମାଲେମାଲ ହେଉଛନ୍ତି ଗଞ୍ଜେଇ ମାଫିଆ। ଆଜି ଗଞ୍ଜେଇ ଚୋରା ଚାଲାଣ ବେଳେ ଦୁଇ ଜଣଙ୍କୁ ଗିରଫ କରିବା ସହ ପ୍ରାୟ ୮ କେଜିରୁ ଉର୍ଦ୍ଧ୍ଵ ଗଞ୍ଜେଇ ଜବତ କରିଛି। ଲକଡାଉନ ବେଳେ ଗଞ୍ଜେଇ ବେପାରୀ ସକ୍ରିୟ ହେଉଥିବା ପାଟଣାଗଡ଼ ପୋଲିସ କୌଣସି ସୂତ୍ରରୁ ଖବର ପାଇଥିଲା। ଏହାପରେ ପାଟଣାଗଡ଼ ପୋଲିସ ପାଟଣାଗଡ଼-ବଲାଙ୍ଗିର ମୁଖ୍ୟ ରାସ୍ତା ଭଇଁଷା ଛକ ଠାରେ ଜଗି ବସିଥିଲା। ଏହି ସମୟରେ ଫୁଲବାଣୀ ଅଞ୍ଚଳରୁ ପାଟଣାଗଡ଼ ଥାନା ଅନ୍ତର୍ଗତ ନେହେନାବନ୍ଧ ଗ୍ରାମକୁ ପାଣ୍ଡବ ବାଗ ଓ କେରବେଡା ଗାଁର ଗୋବିନ୍ଦ କୁମ୍ଭାର ଗଞ୍ଜେଇ ଧରି ବାଇକରେ ଆସୁଥିବା ବେଳେ ପୋଲିସ ଚଢଉ କରିଥିଲା। ସେମାନଙ୍କ ନିକଟରୁ ପ୍ରାୟ ୮ କେଜିରୁ ଉର୍ଦ୍ଧ୍ଵ ଗଞ୍ଜେଇ ଜବତ ହୋଇଛି। ଏହି ସମୟରେ ପାଣ୍ଡବ ବାଗ ଓ ଗୋବିନ୍ଦ କୁମ୍ଭାର ଘଟଣାସ୍ଥଳରୁ ଫେରାର ହେବାକୁ ଉଦ୍ୟମ କରିବା ବେଳେ ପୋଲିସ ସେମାନଙ୍କୁ କାବୁ କରିଥିଲା। ଏନେଇ ଥାନାରେ ଏକ ମାମଲା ରୁଜୁ କରି ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ସୂଚନା ଦେଇଛନ୍ତି।
